ˈCƖƐCƖƐKÏBHË 07
Sɛɛ Zoova ˗wʋ ɔ ˈnɩ?
˗Na dɔˈwʋ, sɛɛ Lagɔ ˗wʋ ɔ ˈnɩ? Lagɔ a ˗mɔ kää teɲii dɛsɛ, ˗ɔ ˈbhʋɔnɩɲɩɛ dɛ, ˗zɛlɩ a saa, ˗sɩbhä ɔ ˗wʋ bhä ˗a? ˗Na dɔˈwʋ ɔ ˈtɛɛ ˈmö, maa ɛˈɛ ˗bhö nɩkpɛ, sɛɛ ˈvuu ˈkɔdʋ ˗wʋˈɛ ˗sɩbhä ɔ ˗wʋä. ˗Sɩbhä ˗n pä ɔ dlɩ ˗a? ˈLɩlɩlɩ a dɔˈwʋ, sɛɛ Zoova ˗wʋ ɔ ˈnɩ? ˗Mä ˈɔ wɛlɩɩ Biblë ˈmö, Zoova sʋlʋnɩmö ˈɔ ˗wʋwʋsaa a kii, ˈn ɛ tulaˈɛ nɩɩ, ˗na gbʋ plɛnɔ.
1. ˗Yɩ kä ɔ ˈŋlɩ ˈn ˗aaa ɔ bhɛnɩ ˗a ˈkä Lagɔ ˈylɩmö ˈnɩ?
“Lagɔ ˈwugɔmʋʋ ɔ glɩnɩɛ.” (Zaa 4:24) Zoova ˈnɩɛ nɩkpɛ a kpökpa ˗kä, ˈwugɔmʋʋ ɔ glɩnɩɛ. ˈN ˗mä zlɩ ˈmö mää ˗aaa bhɛnɩ ˗a ˈkä ˈylɩmö, ˗mä ɔ ˗bhölɩnɩɛ.
2. ˗N ˗yi ɔ Zoova ˈa ˗wʋwʋsaa a kii a glaˈmö a ˗nɩ ˗a?
˗Aaa bhɛnɩ ˗a ˈkä Zoova ˈylɩmö abhlɩ, ˗maa ˗a ˗kɔɔ yɩbhlɩnɩ, sɛ ɔ ˗bhölɩɛ ˗tiamö, ˈn sɛɛ ˈɔ ˗wʋwʋsaa a kii ˈnɩɛ ˗sɩbhä a sɛ ˗wʋ a za, ˗a yo ˗waa. Biblë lɛ nɩɩ: “ˈSaa ˗wʋä ˗kpöö ˈwʋ ˈmö Zoova ˗waa, ˈn ɔ ˗nʋa ˗wa ˗gänɔɔ ˈyize, ɔ ˈnaa ˈkʋa ˈwʋ ylɛ.” (Psaume 37:28) Biblë nʋˈɛ nɩɩ, Lagɔ, “dlɩ zɛmö ɔ nɛnɩɛ teɲii ˈn ɔ kää nɩkpa a ŋäzɩdlɩ.” ˗Wa ˗wʋä ˈklɩyɩyɛ ˈmö, wa ŋäzɩdlɩ ɔ kää teɲii. (Zaakö 5:11) “˗Muë dlɩ ylinɩɛ ˈmlɩ, Zoova ˗wʋä ˈkwädlɩ yɔwʋ, ɔ puëˈɛ ˗muë swɩ yɛɛ yɔwʋ ˈkunɩ ˈlɩlɩlɩ.” (Psaume 34:18, kpʋ zɛmö a kïbhea) ˗N ˗yi ɔ sɛ nɩɩ ˗aˈa nʋnʋlii, yɩ bhɛnɩ yɩ ˈkä Zoova ˈmäna dlɩ zɛmö ˈzʋ, yɩ bhɛnɩˈɛ yɩ ˈkɔ swɩ yɔwʋ ˈkuanɩ ˗a? Nɩkpɛ ˗kä ˗blipäsɛ ˗lizokuu nʋʋ, yɩ bhɛnɩ yɩ ˈkä Zoova swɩ yɔwʋ ˈkuanɩ, ˈn yɩ yoo teɲii yɔwʋ kälɩ. (Psaume 78:40, 41) Maa nɩkpɛ ˗kä ˗li a ˗lii nʋʋ, teɲii yɩ zoo ˈmäna dlɩ zɛmö.—Zɛlɩ Proverbes 27:11 ˈmö.
3. Sɛɛ Zoova tula ɔ nɩɩ ɔ ˗waɲɩ ˈnɩ?
Zoova ˈa ˗wʋwʋsaa a ke ˗a nɛnɩɛ ˗a zie ˈwʋ, ˗wawʋ muä. ˈLɩlɩlɩ a dɔˈwʋ, “Lagɔ, ˗wawʋ ɔ glɩnɩɛ.” (1 Zaa 4:8) Biblë a ˈyize ˈmö Zoova ˈnɩɛ ˈmö ghlɛnɩ nzɩ ɔ kaɲɩ ˈylimö tulanɩ nɩɩ, ɔ ˗waɲɩ. Maa ˗lii ɔ ˈwälaa, ɔ ghlɛniˈɛ ˈmö ˈn ɔ tulanɩɲɩɛ ˗sɩbhä ˈylimö. (Zɛlɩ Nʋnʋlii 14:17 ˈmö.) Sɛɛ ɔ ˈwälaɲɩɛ, ˈpäniɛ ˗ka dlɩ kɛ. Ɔ gbä ˈn ˗a yɩɛ ˈylimönanɩ kuleliea ˈylɩmö. ˈLwɩ a ˗mii ˗ŋwaa ˈyukwli ˈmö, ɔ gbä ˈn ˗a ˗pʋniɛ ˈyukwli, ˈn ɔ gbä ˈn ˗a liˈɛɛ lile a ˗ma nɛnɩɛ ŋli. Ɔ yɩbhä nɩɩ, ˗bhölɩbhölɛ nɩ ˗bhöɲɩ ˈmäna ˈwʋ.
ˈCƖƐ ˗LII ˗MIMII
ˈSaa Zoova ghlɛnɩɛ ˈmö ˈn ɔ yiɛ zɩzɛlii ˈwälaa, ˈcɩɛ yɩ dɛ. Sɛɛ Zoova tulanɩɲɩɛ ˈɔ ˗wʋwʋsaa a kii ˗yɩɩɛ ˗sɩbhä a sɛ ˗wʋ ˈylimö, tɛlɩ sɛ ˗n ˈkɩ yɩbhlɩnɩ.
4. Lagɔ a ˈwugɔmʋʋ, ˈɔ ˈmötɛɛnɔɔ ɔ nʋnɩɛ libho ˈmö muä
Sɛɛ ˗a ghlɛnɩɛ ˗aˈa kätɩkpöö ˈmö ˈn ˗a nʋä libho, ˗sɩbhä Zoova ghlɛnɩɛ ˈɔ ˈwugɔmʋʋ ˈmö ˈn ɔ nʋä libho. Biblë lɛ nɩɩ, Lagɔ ˈa ˈwugɔmʋʋ ˈnɩ ˗bhö nɩkpɛ, maa ˈmötɛɛnɔɔ Lagɔ ghlɛnɩɛ ˈmö ˈn ɔ nʋä ˗lii ˈwuë, ˈmö wʋ glɩnɩɛ. Zɛlɩ Lwiikö 11:13 ˈn Nʋnʋlii 2:17 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Wa ˈyɩbhänɩɛ Lagɔ ˈɔ ˈwugɔmʋʋ, “ɔ yʋäɲɩ ˈɲɛ.” Zaa ˗na dɔˈwʋ, Lagɔ ˈa ˈwugɔmʋʋ nɩkpɛ wʋ glɩnɩ ɔ ˈnɩɩ, maa ˈɔ ˈmötɛɛnɔɔ ˈmö wʋ glɩnɩ bhä ˗a? ˗Yɩ kä ɔ ˈŋlɩ ˈn ˗n gbä ɔ ˗sɩbhä ˈnɩ?
Zoova, ˈɔ ˈwugɔmʋʋ ˈmö ɔ ghlɛnɩɛ ˈmö, ˈn ɔ yiɛ zɩzɛlii ˈwäla. Zɛlɩ Psaume 33:6 ˈn 2 Piɛlɩ 1:20, 21 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Zoova ghlɛnɩ a˗a bhä ˈɔ ˈwugɔmʋʋ ˈmö ˈnɩ?
5. Zoova kä ˗wʋwʋsaa a ˈki ˗yɩ gbää ˈn ˗a mönɔɔ
Moyizɩ glɩnɩ a˗a nɩkpɛ a ˗mɔ ˈtɛɛnɩ a˗a teɲii Lagɔ dlɩ. Maa ɔ yɩbhä a˗a ɔ ˈkä sasɛ ˈɔ ˈwälaɲɔɔ yɩbhlɩnɩ. Zaa Moyizɩ yoo ˈdɩ ˈɲɛ nɩɩ: “Sʋlʋnɩɩ ˗naˈa ˈzʋzʋsaa, ˗lɛ a dɔˈwʋ n ˗kamö yɩbhlɩnɩ.” (Exode 33:13) ˗Sɩbhä a za, Zoova yiɛ ˈɔ ˗wʋwʋsaa a kii Moyizɩ sʋlʋnɩ. Zɛlɩ Exode 34:4-6 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Zoova ˈa ˗wʋwʋsaa a kii ˗mi ɔ sʋlʋnɩ a˗a bhä Moyizɩ ˈnɩ?
Zoova ˈa ˗wʋwʋsaa a kii ˈwuë a dɔˈwʋ, ˗ma nɛnɩmö ɔ dlɩ yɔwʋ ˈnɩ?
6. Zoova ˈzʋnɩɲɩ ˈyli
Zoova a ˗nʋa, Ebleewaa, göwa wa glɩnɩ a˗a ˗mä Ezipötɩ ˗bhölɩ ˈmö. Dɛɛ wa ˗wʋ a˗a ˈklɩ ˈyɩ dɔˈwʋ, ˈsaa yɩ nʋ ɔ Zoova ˈwlu ˈnɩ? ˈZʋ ˗lɛ ˈYUKWLIPƲNƖLU ˈn ˗pʋnɩ Exode 3:1-10 ˈyukwli, Zeliˈɛ ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ.
Nɩkpa ˗kä ˈklɩ ˈyɩ dɔˈwʋ ˗wʋʋ, a ˈsaa yɩ nʋä Zoova ˈwlu, ˈsaa wɛlɩ ˈlɛ ˈcɩamö ɔ yɩ dɔˈwʋ ˈnɩ?—Yɩlɩ ˗mä gbɛlɩ 7 ˈn 8 ˈmö.
˗Na dɔˈwʋ, Zoova yɩbhä bhä ɔ ˗kaɲɩ ˗tiamö kwänɩ ˗a? ˈN ɔ bhɛnɩ bhä ɔ ˗kaɲɩ kwänɩ ˗a? ˗Yɩ kä ɔ ˈŋlɩ ˈnɩ?
7. ˗Lii Zoova ˈwälaa, yɩ tulanɩɲɩ ˈɔ ˗wʋwʋsaa a kii ˈylimö
˗Lii Zoova ˈwälaa, ˈmö ɔ ghlɛnɩɛ ˈmö ˈn ɔ tulanɩɲɩɛ ˈɔ ˗wʋwʋsaa a kii ˈylimö. ˈZʋ ˗lɛ VIDEO. Zɛlɩ Ghlɔɔmö a ˗nʋa 1:20 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä Zoova ˈa ˈwälawälalii ˈmö, ˈɔ ˗wʋwʋsaa a kii mi ˈwlʋnɩ ɔ ˗mä ˈyli ˈnɩ?
NƖKPA ˗MUMUË LƐ NƖƖ: “Lagɔ ˈnɩ ˗bhö nɩkpɛ, maa ˈmötɛɛnɔ a ˗mu ˗wʋä saa ˈwuë, ˈmö ɔ glɩnɩɛ.”
Sɛɛ ˗n yɩli ɔ ˗naa ˈwʋ ˈnɩ?
˗Yɩ kä ɔ ˈŋlɩ ˈn ˗n pä ɔ ˗sɩbhä dlɩ ˈnɩ?
DƐSƐKÄKÏBHÏ
Zoova, ˈwugɔmʋʋ ɔ glɩnɩɛ zaa ˗aaa bhɛnɩ ˗a ˈkɔ ˈylɩmö. Ɔ kä ˗wʋwʋsaa a ˈki a ˗bɛ ˗yɩ zɩɛ dlɩ kɛ. Maa ˗wawʋ muu ziɛ ˈwʋ.
ˈWʋligbanɩkïbhï
˗Yɩ kä ɔ ˈŋlɩ ˈn ˗aaa ɔ bhɛnɩ ˗a ˈkä Zoova ˈylɩmö ˈnɩ?
ˈSaa ˗lɛ ɔ Lagɔ ˈa ˈwugɔmʋʋ ˈnɩ?
˗Dɩ Zoova ˈa ˗wʋwʋsaa a kii a glaˈmö ˗nɩ ˈŋlɩ.
YILII YƆWƲ
Zoova ˈa ˗wʋwʋsaa a ˈkii a glaˈmö a ˗nɩ ˗mʋäna ˗yɩ kää teɲii dɛsɛ, ghlɛnii ˈmö ˗n ˈkɔ sasɛ yɩbhlɩnɩ.
« Quelles qualités Dieu a˗t˗il ? » (La Tour de Garde no 1 2019)
˗Lii ˗yɩ tulaa nɩɩ, Zoova ˈnɩɛ saa ˈwuë ˗wʋ ˈyi ˈylɩmö.
« Dieu est˗il partout ? Est˗il omniprésent ? » (Ɛtɛnɛtɩ ˈklʋ a ˈcɩɛcɩɛkïbhë)
˗Yɩ kää ˈŋlɩ ˈn Biblë nʋä nɩɩ, Lagɔ ˈa ˈwugɔmʋʋ, Lagɔ ˈa kätɩkpö miɛ, ˈyi ˈylɩmö.
« Qu’est˗ce que l’esprit saint ? » (Ɛtɛnɛtɩ ˈklʋ a ˈcɩɛcɩɛkïbhë)
ˈKukwlekäɲɔ ˗bhlʋ ˈniɛ a˗a dlɩ ˈwʋ ˗kä nɩɩ Lagɔ ˗wɔɔ. Maa ˈsaa kwänɔɔ ˈn ˈɔ dlɩpäsaa yiɛ ˈmö zigbonɩ, ˈyi ˈylɩmö.
« J’ai maintenant le sentiment de pouvoir aider les autres » (La Tour de Garde, 1er octobre 2015)