Sɛɛ Zoova ˈa Bhlɩnɩwaa a ˈwluyɩbhäyɩbhɩ kä ɔ ˗na ˗li a ˗lii ˈmö ˈnɩ?

Zoova ˈa Bhlɩnɩwaa ˗kamö ɔ tɛkäsɛ ˈwa ˈwluyɩbhäyɩbhɩɩ ˈwʋ wäzɩnɩ ˗a? ˗N ˈnɩ ˗bhlɛ tɛkäsɛ ˈwa ˈwluyɩbhäyɩbhɩɩ ˈwʋ mö, ˗n yi ˗kamä ˈtikïyie ˈwʋ gʋgɔ, ˗n yiˈɛ ˗kamä ˗naɲɩ nimï ˈyɩbhä nɩɩ: ‘ˈSaa wa nʋ ɔ ˗mä ˈwluyɩbhäyɩbhɩ ˈla ˈwʋ ˈnɩ? ˗Yɩ kä ɔ ˈŋlɩ ˈn yɩ kä ɔ dɛsɛ ˈnɩ? ˗Yɩ kä ɔ ˈŋlɩ ˈn n ˈki ɔ ˈwʋ mö ˈnɩ?’ ˗Mä ˈcɩɛcɩɛkïbhëa ˈlɛ ˈmö, ˗n ˗ɲɛ ˗mumuë ˈsɔ a ˗kä ˈwlu ˈyɩbhä a sɛ yɩ ˗kamöä Lagɔ yɔwʋ ˈdianɩ, ˈn sɛ yɩ ˗kamöˈɛ ˗naˈbhë kwänɩ, ˗n yi ˈmö ˈnʋ.

1. ˗Yɩ kä ɔ ˈŋlɩ ˈn Zoova a ˗nʋa yɩbhä ɔ ˈwlu ˈnɩ?

˗Yɩ kää ˈŋlɩ ˈn ˈwluyɩbhäyɩbhɩɩ kää dɛsɛ a dɔˈwʋ, sɛɛ Biblë a ˈcɛlɩcɛlɩɲɔ ˗bhlʋ gbää miɛ dɛˈɛ: “˗Mä nɩkpa a ˗bʋbʋ ˈkɔdʋ ˈmö, n yi Zoova ˈa ˈŋlɩ ˈghlimanɩ.” (Psaume 26:12) Sɛ ˗bhlʋ ˗kpɔ ˈla, ˗sɩbhä ˈwluyɩbhäyɩbhɩɩ ˗bhöä Zoova ˈa Bhlɩnɩwaa ˈmäna ˈwʋ. ˗Mä bhlɩɩ ˈwuë ˗gömö, wa yɩbhä ˈdimasiea ˈwuë ˈmö ˈwlu, wa ˈkä Lagɔ ˈa ˈŋlɩ ˈghlimanɩ, wa bhlɩnɔ ˈn wa bhibheoo. ˈYlʋbö ˈwuë ˈmö, wa libhï ˈtɛɲɩ ˈwʋ ˈn wa bhɛɛ ˈwluyɩbhäyɩbhɩɩ ˈkädɩ nzɩ wa ˈkä Lagɔ bʋbɔ.

2. ˈSaa ˗n ˈkä ɔ ˗mä ˗aˈa ˈwluyɩbhäyɩbhɩɩ ˈwʋ ˈcɩɛ ˈnɩ?

˗Mä ˗aˈa ˈwluyɩbhäyɩbhɩ ˈwʋ, Lagɔ ˈa wɛlɩɩ mö ˗a cɩɛɛ ˗mä. “Wa sɛsɛni ˈmö ˈtɩɩ, ˈn wa sʋlʋnɩɲɩɛ sɛ yɩ sɛɛ zɛmö.” (Zɛlɩ Néhémie 8:8 ˈmö.) ˗N ˗kä ˈwluyɩbhäyɩbhɩ ˈwʋ möö, ˗n yi Zoova a dɛ ˈcɩɛ, ˗n yiˈɛ ˈɔ ˗wʋwʋsaa a kii ˈcɩɛ. ˗N ˗kä sɛ yɩbhlɩnɩ nɩɩ ɔ ˗wamö teɲii, yɩ yi gbä ˗n yo yɔwʋ ˈdionɩ, ˈn sɛ ɔ ˗kamöä kwänɩ ˗naˈa zɩkpaa ˈkä ˈmäna ˈwʋ ˗bhö, ˗n yiˈɛ ˈcɩɛ.—Isaie 48:17, 18.

3. ˗Mä ˗aˈa ˈwluyɩbhäyɩbhɩɩ ˈwʋ a ˗nʋa, sɛ wa bhɛnɩ ɔ wa ˗kamö kwänɩ ˈnɩ?

Zoova lɛ nɩɩ, ‘A˗a nɩ ˈzʋzʋnɩ ˈdɩ ˈmö, ˗a ˈkä ˈkwädlɩ ˗wawanɩ ˈyize, ˗li a ˗li a nʋnʋ dɔˈwʋ, ˗a ˈkä ˈyli yɔˈwʋ ˈtɛɛ. ˗A nɩ ˈyɩbhä ˈkwädlɩ ˈwlu Lagɔ ˈa wɛlɩɩ a za.’ (Ebleewaa 10:24, 25) ˗Mä ˗aˈa ˈwluyɩbhäyɩbhɩ ˈwʋ, ˗n yi nɩkpa ˈylɩmö ˗wa ˗wawanɩɛ ˗tiamö, ˈn ˗mumuë ˗wa yɩbhää wa ˈkä Lagɔ yɩbhlɩnɩ ˗na saa. Sɛ wa ˈkää Biblë ˈmö ghlɛnɩ wa ˈkä swɩ ɲɛmʋ ˈmö ˈpäpänɩ, ˗n yiˈɛ ˈylɩmö. (Zɛlɩ Ghlɔɔmö a ˗nʋa 1:11, 12 ˈmö.) ˈWluyɩbhäyɩbhɩ ˈla ˈwʋ, ˗waaa ˈŋwlɩ ˗kä muë, ˗waaa ghïla ˗wʋ muë, ˈn wa yɛ kwäkwänɩ ˈwë muë, nɩkpa a ˗muë ˗wʋä ˈkwädlɩ ˈmäna ˈmö, ˈki a ˗mi wa yi ˈmö ˗wʋ ˗kë, ˗n yua ˗mä ˈylɩmö. ˗Lii ˗yɩ kää ˈŋlɩ ˈn Zoova yɩbhää nɩɩ ˗a nɩ ˈyɩbhä ˈkwädlɩ ˈwlu, yɩ glaˈmö a ˗nɩ mö ˗a ˈyɩɛ daˈa ˈylɩmö!

ˈCƖƐ ˗LII ˗MIMII

4. Zoova ˈa Bhlɩnɩwaa a ˈwluyɩbhäyɩbhɩɩ

Tɛkäklɩtɩɛwaa a ˈtɛɲɩ ˈmö, Klɩtɩɛwaa ˈwlu wa yɩbhä a˗a ˈkwädlɩ ˈn wa bʋbɔ a˗a Zoova. (Ghlɔɔmö a ˗nʋa 16:3-5) Zɛlɩ Kolɔɔsɩ a ˗nʋa 3:16 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Sɛɛ tɛkäklɩtɩɛwaa bʋbɔ a˗a bhä Zoova ˈnɩ?

VIDEO: ˈSaa wa nʋ ɔ ˗mä Lagɔ ˈa ˈKämanɔɔ a ˗budu ˈmö ˈnɩ? (2:12)

• ˈSaa plɩɛ ˗mä Lagɔ ˈa ˈKämanɔ a ˗budu ˈmö ˈwʋ, sɛ yɩ ˗ɲɛ Kolɔɔsɩ a ˗nʋa 3:16 ˈmö a wɛlɩɩ mönɩ ɔ yɔwʋ ˈnɩ?

• ˗Mä video ˈlɛ ˈmö, ɛ ˗käˈɛ ˗mä desɛɛ ˈmö, ˗n ˈyɩ ɔ ˗lu ˗mumuu ˈylɩmö ˗wʋ nɛnɩmöä dlɩ yɔwʋ ˗a?

Zɛlɩ 2 Kolɛɛtɩ a ˗nʋa 9:7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗Yɩ kä ɔ ˈŋlɩ ˈn waˈaa bia ɔ moni a ˗dɔkwɩ ˗mä Zoova ˈa Bhlɩnɩwaa a ˈwluyɩbhäyɩbhɩ ˈwʋ ˈnɩ?

˗N ˗ɲɛ ˗ɔ ˈcɩamöä Biblë ˈsɔ, ˈsaa a ˈkää ˗mä ˈwluyɩbhäyɩbhɩ ˈwʋ ˈylɩmö, ˗a nɩ yɩlɩnii ˈgämö yɔwʋ.

• ˈWluyɩbhäyɩbhʋ a pɩɔ ˗mʋ ˗bhömö ɔ teɲii ˈmäna ˈwʋ ˈnɩ?

˗N ˗yi a˗a bhä sɛ ˗a?

˗Mä jw.org ˈklʋ, dɛɛ wa bhɛnɩɛ ˈwluyɩbhäyɩbhɩ ˈn ˈtɛɲɩ ˗mɛ ˈmö wa bhɛniɛ ˗mä bhlɩɩ ˈwuë ˗gömö, ˗n bhɛnɩ ˗n ˈkɩ ˗mä ghlɩ.

1. (1) ˗Aˈa ˈwluyɩbhäyɩbhɩɩ, yɩ kä bhïlabhuluu ˈmö, yɩ käˈɛ ˈylimötulanɩlii ˈn videwi ˈmö. ˈWluyɩbhäyɩbhɩ ˗kä tɛɛ yi, ˗a bhlɩ ˈn ˗a bhibhee ˈn yɩ ˗käˈɛ zɛmö bhɩɛ yi, ˗a bhlɩ ˈn ˗a bhibhee.

2. (2) Wa ˗kä ˈwluyɩbhäyɩbhɩ a pɩɩ ˗mimii ˗bhɛ dɔˈwʋ ˗wʋ, ˈyukwlipʋnɩwaa bhɛnɩ wa ˈkä bhïlamö.

3. (3) Nɩkpa ˈwuë bhɛnɩ wa ˈkä yi: ˈLigbï ˈwuë ˈmö a ˗nʋa, waˈaa ˈŋwlɩ ˗kä, waˈaa ghïla ˗wʋ, wa yɛɛ gɔ, ˈn ˈyuë.

4. (4) ˗N ˗kä ˈwluyɩbhäyɩbhɩ ˈla ˈwʋ yi, ˗n ˈnaa ˈkä ˗lu ˈpɛnɩ. Waˈaa bia ˗mä moni a ˗dɔkwɩ.

5. ˗N kä ˗n ˈkä ˈyli yɔwʋ ˈtɛmanɩ ˗n ˈkä ˈwluyɩbhäyɩbhɩɩ ˈwʋ mö

˗A nɩ yɩlɩɛ ˗ka Zezwii a ˗lowluwa a wɛlɩɩ yɔwʋ. ˈYlʋbö ˈwuë ˈmö, ˗mä Nazalɛɛtɩ ˗mä wa ˈbhöö a˗a, ˈn wa mö a˗a Zeluzalɛɛmö ˈwluyɩbhäyɩbhɩɩ ˈwʋ. ˈYioo wa bhliɛ, wʋ bhɛ 100 km, ˈn wʋ kä ˗gägö ˈmö. Zɛlɩ Lwiikö 2:39-42 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• ˗Na dɔˈwʋ, ˈyioo wa bhliɛ ˗këë, ˈn wa möä ˗mä Zeluzalɛɛmö, wʋ ˈnʋa bhä yɔlɔa ˗a?

• ˗Yɩ kä ɔ ˈŋlɩ ˈn ˗n ˈkä ɔ ˈyli yɔwʋ ˈtɛmanɩ, nzɩ ˗n ˈkä ˈwluyɩbhäyɩbhɩ ˈwʋ mö ˈnɩ?

• ˗Na dɔˈwʋ, yɩ kä ɔ dɛsɛ ˗a? ˗Yɩ kä ɔ ˈŋlɩ ˈnɩ?

• ˗Yɩ kä ɔ ˈŋlɩ ˈn ˗a kä ɔ ˗a ˈkä ˈkwädlɩ ˈwluyɩbhäyɩbhɩ ˈwʋ mö ˈnɩ?

DƐSƐKÄKÏBHÏ

˗N ˗kä ˈwluyɩbhäyɩbhɩ ˈwʋ mö, ˗n yi ˗lii a ˗bɛ ˈcɩɛ Zoova a dɛ, ˗n ˗ɲɔ ˈsɔ, a yi teɲii ˈwʋ ˗wʋnɩ, ˈn ˗n ˗ɲɛ ˗mumuë ˈsɔ a yo ˈgämö bʋbɔnɩ.

ˈWʋligbanɩkïbhï

• ˗Yɩ kä ɔ ˈŋlɩ ˈn Zoova yɩbhä ɔ nɩɩ, ˗a nɩ ˈyɩbhä ˈwlu ˈnɩ?

• ˈSaa ˗n ˈkä ɔ ˈcɩɛ ˗mä Zoova ˈa Bhlɩnɩwaa a ˈwluyɩbhäyɩbhɩ ˈwʋ ˈnɩ?

• ˗N pä ɔ dlɩ nɩɩ, ˈwluyɩbhäyɩbhɩ bhɛnɩ yɩ ˗kamö kwänɩ, ki ˗mimii ˈmö a dɔˈwʋ ˗a?

YILII YƆWƲ

˗N ˈkä ˈwluyɩbhäyɩbhʋ ˈwʋ mö, dlɩ yɩ libhëamö bhä ˗a? Nɩkpɛ ˗bhlʋ ˈwluyɩbhäyɩbhɩ ˈwʋ a mömɛ libhëa a˗a dlɩ, ˈn yɩ yoo bhäla dlɩ yɔwʋ nɛnɩmanɩ, ˈyɩ ɔ wɛlɩɩ ˈylɩmö.

Sɛ wa pälaɲɩɛ ˈmänasɛ, ˗a ˈnaa ˈkɩ ˗zɩ ˈwʋ dlʋ (4:16)

Sɛɛ ɲɛgbayu ˗bhlʋ ˗waa ˈwluyɩbhäyɩbhɩɩ, ˈn sɛɛ ɔ ˈtɛmanɩɛ ˈyli yɔwʋ ɔ ˈki ˈwʋ mö ˈyize, ˈyi ˈylɩmö.

ˈWluyɩbhäyɩbhɩ nɛnɩmanɩɩ teɲii dlɩ yɔwʋ! (4:33)

Sɛɛ ˗mumuë pää ˈwluyɩbhäyɩbhɩɩ a dɔˈwʋ dlɩ.

« Pourquoi assister aux réunions tenues à la salle du Royaume ? » (Ɛtɛnɛtɩ ˈklʋ a ˈcɩɛcɩɛkïbhë)

Nɩkpɛ ˗ɔ glɩnɩ a˗a jɛzlʋɲɔɔ, ɔ möä Zoova ˈa Bhlɩnɩwaa ˈwluyɩbhäyɩbhʋ ˈwʋ, yɩ gbä ɔ yiɛ ˈmö zigbonɩ.

« Je ne sortais jamais sans mon arme » (La Tour de Garde, 1er juillet 2014)