ˈCƖƐCƖƐKÏBHË 04
˗Mɔ ˗lɛ ɔ Lagɔ ˈnɩ?
Sɛɛ nɩkpaa ˈmaa ˈkä a ˈwlʋ, ˗lagwɩɩ wa bʋbɔɔ yɩˈɩɛ muënɩ. Maa Biblë bhïla Lagɔ ˗bhlʋ a wɛlɩɩ ˗ɔ ˈghïlie ˗ɔ zie ˈpɩwʋ a ˗lagwɩɩ ˈwuë ˈwʋ. (2 Chroniques 2:5) Lagɔ ˗mu ɔ ˈnɩ? ˈN ˗yɩ kä ɔ ˈŋlɩ ˈn Lagɔ ˈla ˈghïli ɔ, wʋ ˈkä ˗lagwɩɩ ˗miˈla ˈwuë ˈwʋ zi ˈnɩ? ˗Mä ˈcɩɛcɩɛkïbhë ˈlɛ ˈmö, sɛɛ Lagɔ ˈla yɩbhää ˗n nɩ yɩbhlɩnɔɔ, mö ˗a ˈkää ˈylɩmö.
1. A ˈyɩ ɔ Lagɔ ˈa ˈŋlɩ ˈnɩ? ˈN ˈsaa tula ɔ nɩɩ ɔ yɩbhä ˗a nɩ yɩbhlɩni ˈnɩ?
Lagɔ sʋlʋnɩɲɩ ɔɲɩ ˗mä Biblë ˈmö. Ɔ lɛ nɩɩ: “˗Amöä Zoova. ˈNa ŋlɩɩ miɛ.” (Zɛlɩ Isaïe 42:5, 8 ˈmö.) Wa ˗kä “Zoova” nʋʋ, Ebleegbʋ ˈmö a dɔˈwʋ, sɛˈɛ yɩ sɛɛ zɛmö nɩɩ, “ɔ bhɛnɩ ɔ ˈkä ˈsaa ɔ yɩbhää nʋ.” Zoova yɩbhä nɩɩ, ˗a nɩ yɩbhlɩnɩ ˈɔ ŋlɩɩ. (Exode 3:15) Sɛɛ ˗a ˗yi ɔ sɛ ˈnɩ? ˗Mä Biblë ˈmö, ˈɔ ŋlɩɩ cɛlɩ ˗mä ˈwʋ a 7.000 a sɛ ˈn yɩ kä ˗gömö!a Wa ˗kä Zoova nʋʋ, “˗ɔ ˗lɛ ˗tiamö a Lagɔ ˗mä zlɩ ˈmö ˈn mäˈä dʋdʋ ˈwʋ,” ˈmö wa laa ˗sɩbhä.—Deutéronome 4:39.
2. Sɛ Biblë gbä ɔ Zoova a dɔˈwʋ ˈnɩ?
Biblë lɛ nɩɩ, ˗lagwɩɩ ˈwuë nɩkpaa bʋbɔɔ a dɔˈwʋ, Zoova a ˈyize mɔɔ ˗lɛ ˗tiamö a Lagɔ. ˗Yɩ kä ɔ ˈŋlɩ ˈnɩ? ˗Lii a ˗bɛ mii kää ˈŋlɩ. Zoova a ˈyize mɔɔ ˗lɛ Lagɔtapɛ ˈn ɔ ˈyize mɔɔ “ˈkämanɩɛ mäˈä ˈpɩwʋ a ˗lii ˈwuë ˗gömö.” (Zɛlɩ Psaume 83:18 ˈmö.) Wa ˗kä mɔɔ ˗lɛ Lagɔtapɛ nʋʋ, mii sɛɛ zɛmö nɩɩ, ɔ bhɛnɩ ɔ ˈkä ˈsaa ˈwuë ɔ yɩbhää nʋ. Mɔɔ “wälaa ˈpɩwʋ a ˗lii ˈwuë,” ˗mä zlɩ ˈmö a ˗nɩɩ, ˈn mäˈä dʋdʋ ˈwʋ a ˗nɩɩ. (ˈKlʋkälɩwɛlɩɩ 4:8, 11) Zoova a ˈyize mɔɔ ˗bhölɩɛ ˈkwädlɩkwädlɩnɩ, ˈn ɔ yi ˈkwädlɩkwädlɩnɩ ˗bhölɩ ˈyize.—Psaume 90:2.
ˈCƖƐ ˗LII ˗MIMII
Lagɔ ˈa ŋlɩɩ ˗ɲɛ ˈɔ bhɩzɩŋlɩɩ ˈsɔ, sɛɛ yɩˈɩɛ yɔwʋ mönɩɩ, mö ˗a ˈkää ˈylɩmö. Sɛ ɔ sʋlʋnɩɲɩɛ ˈɔ ŋlɩɩ, ˈn ˈsaa kää ˈŋlɩ ˈn ɔ ˗yiɲiɛ sʋlʋnɩɩ, ˗a yiˈɛ ˈylɩmö.
3. Lagɔ kä bhɩzɩŋlɩ a ˗bɛ, maa ɔ kä ˈŋlɩ ˗bhlʋ ˗kpöö
Nɩkpɛ a bhɩzɩŋlɩ ˗ɲɛ ˈɔ ˗tiamö a ŋlɩɩ ˈsɔ, sɛ yɩˈɩɛ yɔwʋ mönɩɩ, ˗n ˈkɩ ˈmö ˈnʋ a dɔˈwʋ, ˈzʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Sɛɛ bhɩzɩŋlɩ “˗Alowli” ˗ɲɛ nɩkpɛ a ˗tiamö a ˈŋlɩ ˈsɔ ˈnɩɛ ɔ yɔwʋ mönɩ ˈnɩ?
Biblë lɛ nɩɩ, nɩkpaa bʋbɔ ˗lagwɩ a ˗bɛ, ˈn wa la nɩkpa a ˗bɛ ˗Alowli. Zɛlɩ Psaume 136:1-3 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mɔ ˗lɛ ɔ “˗lagwɩ ˈwuë a Lagɔ,” ˈn ˈkämanɩwaa ˈwuë a ˈKämanɩɲɔɔ ˈnɩ?
4. Zoova yɩbhä nɩɩ, ˗a nɩ yɩbhlɩnɩ ˈɔ ŋlɩɩ ˈn ˗a nɩ ˗dii ˈŋlɩ
Sɛɛ ˗n ˗yi ɔ sɛ nɩɩ, Zoova yɩbhä nɩɩ, ˗a nɩ yɩbhlɩnɩ ˈɔ ŋlɩɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Na dɔˈwʋ, Zoova yɩbhä ɔ nɩɩ, ˗a nɩ yɩbhlɩnɩ ˈɔ ŋlɩɩ ˗a? ˗Yɩ kä ɔ ˈŋlɩ ˈnɩ?
Zoova yɩbhä nɩɩ, nɩkpaa nɩ lanɔɔ ˈɔ ŋlɩɩ ˈmö. Zɛlɩ Ghlɔɔmö a ˗nʋa 10:13 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗A ˗kä Zoova ˈɔ ŋlɩɩ ˈmö lanɩɩ, ˗yɩ kä ɔ ˈŋlɩ ˈn yɩ kä ɔ dɛsɛ ˈnɩ?
Nɩkpɛ ˗kä ˗naˈa ŋlɩɩ ˈwʋ ligbanɩɩ, ˈn ɔ ˗kami ˈmö lanɩɩ, ˈsaa yɩ nʋmö ɔ ˈwlu ˈnɩ?
˗N ˗kä Zoova ˈɔ ŋlɩɩ ˈmö lanɩɩ, ˗na dɔˈwʋ ˈsaa yɩ nɔ bhä ˈwlu ˈnɩ?
5. Zoova yɩbhä nɩɩ ˗n nɩ ˈzʋ ɔ bheyi
Bhlɩ wa laa Kabɔjɩ, ˗mä a ˈŋlɔ ˗bhlʋ ˗ɔ paa Sotɛnɩ, ɔ lɛ nɩɩ, ɔ yɩbhlɩnɩɛ Lagɔ ˈa ŋlɩɩ, “yɩ ˈzo teɲii ˈmäna dlɩ zɛmö.” ˈZʋ ˗lɛ VIDEO ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, Sotɛnɩ yɩbhlɩnɩɛ Lagɔ ˈa ŋlɩɩ, ˈsaa yɩ nɔ bhä ˈwlu ˈnɩ?
ˈLɩlɩlɩ a dɔˈwʋ, ˗n ˗kä ˗n ˈkä nɩkpɛ a bheyi ˈzʋʋ, ˗n kä ˗n ˈkɔ ˗yi, ˈn ˗n ˈkäˈɛ ˈɔ ŋlɩɩ ˗yi. Zɛlɩ Zaakö 4:8a ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
ˈSaa Zoova yɩbhä ɔ ˗n nɩ nʋ ˈnɩ?
˗N ˗kä Lagɔ ˈa ŋlɩɩ yɩbhlɩnɩ, ˈn ˗n ˗kɔɲɩ ˈmö lanɩɩ, sɛ yɩ ˗kamö ɔ kwänɩ ˗n ˈkä ɔ bheyi ˈzʋ ˈnɩ?
NƖKPA ˗MUMUË LƐ NƖƖ: “Lagɔ ˗bhli ˗bhlʋ ˗kpöö, zaa ŋlɩ ˗mi ˗a yo ˈmö lanɩ ˗kë, yɩˈɩɛ ˗lu nʋ.”
˗N kɩ ɔ dlɩ ˈwʋ nɩɩ, Lagɔ ˈa ŋlɩɩ mii ˗lɛ Zoova ˗a?
Sɛɛ ˗n ˈkä ɔ nɩkpɛ dlɩ ˗gömö ˗sɛsɛnɩ nɩɩ, Lagɔ yɩbhä ˗a nɩ lanɔɔ ˈɔ ŋlɩɩ ˈmö ˈnɩ?
DƐSƐKÄKÏBHÏ
˗Tiamö a Lagɔ ˈa ŋlɩɩ, mii ˗lɛ Zoova. Ɔ yɩbhä nɩɩ, ˗a nɩ yɩbhlɩnii ˈn ˗a nɩ lanɔɲɩ ˈmö, ˗lɛ a dɔˈwʋ ˗a yi ɔ bhɛya ˈzʋ.
ˈWʋligbanɩkïbhï
Sɛɛ Zoova ˗ɲɛ ˗lagwɩ ˗miˈla ˈwuë nɩkpaa bʋbɔɔ ˈsɔ ˈnɩɛ ɔ yɔwʋ mönɩ ˈnɩ?
˗Yɩ kä ɔ ˈŋlɩ ˈn ˗a kä ɔ ˗a ˈkä Lagɔ, ˈɔ ŋlɩɩ ˈmö lanɩ ˈnɩ?
ˈSaa tula ɔ nɩɩ, Zoova yɩbhä ˗n nɩ ˈzʋ ɔ bheyi ˈnɩ?
YƖLII YƆWƲ
Yɩlɩ ˗lii a ˈki ngbï yɔwʋ, ˗yɩ kää ˈŋlɩ ˈn ˗a kɩɛ dlɩ ˈwʋ nɩɩ, Lagɔ ˗bhölɩ.
ˈSaa kää ˈŋlɩ ˈn ˗a kɩɛ dlɩ ˈwʋ nɩɩ Lagɔ ˗bhölɩ ˈkwädlɩ, yɩlii yɔwʋ.
Sɛɛ wa ˗dɩ a˗a bhlaˈmö Lagɔ ˈa ŋlɩɩ ˈŋlɩ, ˗a ˈnɩ ˗sɩbhä ˗yi aˈbhë ˗kë, ˗yɩ kää ˈŋlɩ ˈn ˗a kää ˗a ˈkɩ ˈŋlɩ ˗dɩ ˈyize, ˈyi ˈylɩmö.
˗A ˈkä Lagɔ ˈɔ ŋlɩɩ ˈmö lanɩ, yɩ kä ɔ dɛsɛ ˗a? ˈSaa kää ˈŋlɩ ˈn ˗a bhɛnɩɛ ˗a ˈkä gbä nɩɩ Lagɔ kä ˈŋlɩ, ˈyi ˈylɩmö.
« Combien de noms Dieu a˗t˗il ? » (Ɛtɛnɛtɩ ˈklʋ a ˈcɩɛcɩɛkïbhë)
a Sɛɛ Lagɔ ˈa ŋlɩɩ sɛɛ zɛmö ˈn ˈsaa kää ˈŋlɩ ˈn yɩ ˈnɩɛ ˗mä Biblïa ˗mimii ˈmö ˗wʋʋ, ˗n ˗kä ˗n ˈki sasɛ ˈmö ˈnʋʋ, yɩlɩ ˗mä Appendice A4 ˈmö, ˗mä La Bible. Traduction du monde nouveau ˈmö.