ˈCƖƐCƖƐKÏBHÏ 14
Sɛɛ Lagɔ yɩbhä ɔ ˗a nɩ bʋbɔɔ ˈnɩ?
˗Mä ˈcɩɛcɩɛkïbhë kʋgbä˗ta ˈmö, ˗a ˈyɩ a˗a ˈylɩmö nɩɩ lagɔgligbï ˈwuë mii ˈnɩɛ Lagɔ dlɩ yɔwʋ nɛnɩ. ˗Maa, ˗a bhɛnɩ ˗a ˈkä ˗aa ˈwälaɲɔ sɛ ɔ yɩbhää bʋbɔ. Sɛ ɔ “yɩbhä ɔ ˗a nɩ bʋbɔɔ” ˈnɩ? (Zaakö 1:27) Sɛɛ Biblë gbää yɩ dɔˈwʋ, ˗a nɩ ˈyiɛ ˗ka ˈylɩmö.
1. ˈSaa ˗aˈa bʋbɔbʋbʋʋ ˈkä ɔ ˈwʋ ˗glɛ ˈnɩ?
˗Aˈa bʋbɔbʋbʋʋ kä wʋ ˈkä Biblë ˈwʋ ˗glɛ. Sɛˈɛ Zezwii ˈɲɛ a˗a Lagɔ ˈdɩ nɩɩ: “˗Naˈa wɛlɩɩ yɩ ˈyize mɩɩ kää ˗tiamö gbëaa ˈmö.” (Zaa 17:17) Lagɔgligbï ˗mimii ˈnɩɛ Lagɔ ˈa wɛlɩɩ ˗yɩ ˗wʋä ˗mä Biblë ˈmö ˗gänɩ. Nɩkpa a ˈcɩawɛlɩɩ ˗ɲɛ nɩkpa a ˈzʋzʋsaa ˈsɔ ˈmö wa ˗gänɩɛ. Zoova ˈnɩɛ nɩkpa ˗wa sɛɛ ‘ˈɔ wɛlɩɩ ˈklʋkpamö ˗waa.’ (Zɛlɩ Maakö 7:9 ˈmö.) Maa sɛɛ Biblë gbää, ˗a ˗kɔɔ ˗sɩbhä bʋbɔɔ ˈn ˗a ˗kä ˈɔ ˈdɩmözʋwɛlɩɩ ˗gänɩ, ˈmäna yɩ zoo dlɩ zɛmö.
2. Sɛ ˗a kä ɔ ˗a ˈkä Zoova bʋbɔ ˈnɩ?
Zoova mɔɔ ˈwälaɲɩɛ zaa, ɔ ˈyize mö ˗a kää ˗a ˈkä bʋbɔ. (’Ylimötulanɩlii 4:11) Mii sɛɛ zɛmö nɩɩ ˗a kä ˗a ˈkɔ ˗waa, ˈn ɔ ˈyize mö ˗a kää ˗a ˈkä bʋbɔ. ˗Aaa ˗kä ˗a ˈkä ˗glɛkwlɩ ˗ɲɛ tɛlɩtɛlɩli ˗mimii ˈsɔ ˈmö ghlɛnɩ nzɩ ˗a ˈkɔ bʋbɔ.—Zɛlɩ Isaïe 42:8 ˈmö.
˗Aˈa bʋbɔbʋbʋʋ ˈkä Zoova ‘dlɩ yɔwʋ nɛnɩ a dɔˈwʋ, ˗aˈa nɛmönɛmösaa nɩ ˗wʋ ˈwlɩlɩ.’ (Ghlɔɔmö a ˗nʋa 12:1) Mii sɛɛ zɛmö nɩɩ, ˗a kä ˗a ˈkä ˈɔ ˈpäpägböö ˗gänɩ ˗mä ˗aˈa zɩkpaa ˈmö. Miɛ nɩɩ, ˗muë ˗waa Zoova, sɛ ɔ gbää kwäkwänɩkwäkwänɛ a dɔˈwʋ, ˈmö wa zʋä ˈklʋkpamö. ˈN nʋnʋlizokuu, siklɛtɩ ˗ɲɛ gëji a ˈbhuabhu ˈsɔ ˈn nʋ ˈnɩmänɩmʋ, gwë wa ˈdioniɛ.a
3. ˗Yɩ kä ɔ ˈŋlɩ ˈn ˗a ˗ɲɛ ˗aa lagɔdaayuë ˈsɔ ˗a kä ɔ ˗a ˈkä Zoova ˈgämö bʋbɔnɩ ˈnɩ?
ˈDimasiea ˈwuë ˈmö a ˈwluyɩbhäyɩbhɩ ˗a bhɛɛ kä ˈŋlɩ ˈn ˗a ‘ˈghlimanɩɛ Zoova ˈa ŋlɩɩ ˗mä lagɔzɩkpa ˈmö.’ (Psaume 111:1, 2) ˗A ghlɛnɩˈɛ lwɩɩ ˗a bhlɩɛ ˈmö ˈn ˗a ˈghlimanɩɛ ˈɔ ŋlɩɩ. (Zɛlɩ Psaume 104:33 ˈmö.) Zoova ˗wa ɔ ˗waɲɩɛ, nza ɔ yɩbhää nɩɩ ˗a nɩ mö ˈwluyɩbhäyɩbhɩ ˈwʋ. Ɛˈɛ ˗bhö ɲɩasɛ, maa ɔ ˗yi sɛ nɩɩ yɩ bhɛnɩ yɩ ˗kaɲɩ kwänɩ ˗a ˈkä ˈkwädlɩkwädlɩnɩ a ˗bhölɩbhölɛ ghlɩ. ˗Mä ˈwluyɩbhäyɩbhɩ ˈwʋ, ˗a ˗kä ˗mumuë swɩ ɲɛmʋ ˈmö ˈpä, ˗aˈbhï swɩ ɲɛmʋ ˈmö yɩ paaɲɩɛ.
ˈCƖƐ ˗LII ˗MIMII
˗Yɩ kää ˈŋlɩ ˈn Zoova ˈnɩɛ ˈyɩbhä ˗a ˈkä tɛlɩtɛlɩli ˈmö ghlɛnɩ nzɩ ˗a ˈkɔ bʋbɔɔ, ˈn ˗lii ˗yɩ kää dɛsɛ ˗a ˈkää ˈmö ghlɛnɩ ˗a ˈkä Lagɔ ˈa ŋlɩɩ ˈghlimanɩ, ˈyi ˈylɩmö.
4. ˗A nɩ tɩ tɛlɩtɛlɩli ˈmö ghlɛnɩ ˗a ˈkä Lagɔ bʋbɔɔ
Sɛɛ ˗a ˗yi ɔ sɛ nɩɩ ˗a ˗kä ˗sɩbhä a ˗lii ˈmö ghlɛnɩ, yɩˈɩɛ Lagɔ dlɩ yɔwʋ nɛnɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä Biblë ˈmö, Lagɔ a ˗nʋa ˗mumuë ghlɛnɩɛ tɛlɩtɛlɩli ˈmö ˈn wa yoo bʋbɔɔ, ˈsaa ˈplɩ ɔ ˈwʋ ˈnɩ?
Nɩkpa ˗mumuë pä wabhlɩ dlɩ nɩɩ, wa ˗kä tɛlɩtɛlɩli ˈmö ghlɛnɩ wa ˈkä Lagɔ bʋbɔɔ, mii ˈkää ˈŋlɩ ˗kä wa ˈkä Lagɔ yɔwʋ ˈdionɩ. ˗Maa ˗sɩbhä a ˗li ˈla ˈnaa ˈkä ɔ gbä wa ˈkä Lagɔ gwë ˈdionɩ ˗a? Zɛlɩ Exode 20:4-6 ˈmö, ˈn Psaume 106:35, 36 ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ:
Tɛlɩtɛlɩli a ˗mi nɩkpa ghlɛnɩ ɔ ˈmö ˗mä ˈwa bʋbɔbʋbʋ ˈmö ˈnɩ?
˗A ˗kä tɛlɩtɛlɩli ˈmö ghlɛnɩ ˈn ˗a ˗kä Zoova bʋbɔɔ, sɛ ɔ pä bhä yɩ dɔˈwʋ dlɩ ˈnɩ?
Nɩkpɛ ˈkä tɛlɩtɛlɩli ˈmö ghlɛnɩ ɔ ˈkä Lagɔ bʋbɔ a dɔˈwʋ, sɛɛ ˗n yɩli ɔ ˗naa ˈwʋ ˈnɩ?
5. ˗A ˗kä Zoova a ˈyize bʋbɔ yɩ ˗yiɲɩ yiowɛlɩɩ a galɛ ˈmö ˗sɛ
Sɛɛ Zoova yɩbhää, ˗a ˗kɔɔ ˗sɩbhä bʋbɔɔ, sɛ yɩ bhɛnɩɛ yɩ ˗kaɲɩ yiowɛlɩɩ a galɛ ˈmö ˗sɛ, ˈyi ˈylɩmö. ˈZʋ ˗lɛ VIDEO.
Zɛlɩ Psaume 91:14 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗a ˗waa Zoova a za, ˗a ˗kɔɔ ɔ ˈyize bʋbɔɔ, ˈsaa ɔ gbä bhä ɔ ˗kaɲɩ ˈwlu nʋ ˈnɩ?
6. ˗Mä ˈwluyɩbhäyɩbhɩɩ ˈwʋ ˗mä ˗a bʋbɔnɩɛ Zoova
ˈWluyɩbhäyɩbhɩɩ ˈwʋ, ˗a ˈkä Zoova ˈa ŋlɩɩ ˈghlimanɩ ˈn ˗a ˈkä swɩ ɲɛmʋ ˈmö ˈpäpänɩ a dɔˈwʋ, ˗a bhlɩ ˈlwɩ ˈn ˗a bhïlamöˈɛ ˗mä. Zɛlɩ Psaume 22:22 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Mumuë ˈa wɛlɩɩ wa bhïlaa ˗mä ˈwluyɩbhäyɩbhɩ ˈwʋ, yɩ ˗bhömö ɔ ˈmäna ˈwʋ ˗a?
˗N yɩbhä ɔ ˗n ˈkä ˗naɲɩ ˈwlu gïganɩ ˗n ˈkä ˗mä ˈwluyɩbhäyɩbhɩ ˈwʋ bhïlamö ˗a?
7. ˗A ˗kä ˈsaa ˗a cɩɛɛ a wɛlɩɩ ˗mumuë ˈɲɛɛ, yɩ ˗bhö teɲii Zoova ˈmäna ˈwʋ
Ki ˗a bhɛnɩɛ ˗a ˈkä ˈmö ghlɛnɩ nzɩ ˗a ˈkä nɩkpa Biblë ˈmö a wɛlɩɩ ˈɲɛ, yɩˈɩɛ muënɩ. Zɛlɩ Psaume 9:1 ˈn 34:1 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Lii ˗n ˈcɩɛ ˗mä Biblë ˈmö, yɩ glaˈmö a ˗lu ˗muɲɩ wɛlɩɩ ˗n yɩbhä ɔ ˗n ˈkä ˗mumuë ˈɲɛ ˈnɩ?
NƖKPA ˗MUMUË LƐ NƖƖ: “Nɩkpɛ ˈnɩɛ bhɛnɩ ɔ ˈkä Lagɔ dlɩ yɔwʋ nɛnɩ.”
Sɛɛ ˗n pä ɔ ˗naa yɩ dɔˈwʋ dlɩ ˈnɩ?
DƐSƐKÄKÏBHÏ
˗Mä ˈwluyɩbhäyɩbhɩ ˈwʋ, ˗a ˗kä ˗aˈa ˈwälaɲɔɔ ˈa ŋlɩɩ ˈghlimanɩ, ˗a ˗kä ˈsaa ˗a cɩɛɛ a wɛlɩɩ ˗mumuë ˈɲɛɛ, ˈn ˗a ˗kɔɔ ɔ ˈyize bʋbɔɔ, ˗a yo teɲii ˈmäna ˈwʋ ˗bhö.
ˈWʋligbanɩkïbhï
Sɛɛ Zoova yɩbhää ˗a nɩ bʋbɔɔ, sɛ ˗a ˈkɩ ɔ ˈcɩɛ ˈnɩ?
˗Yɩ kä ɔ ˈŋlɩ ˈn ˗a kä ɔ ˗a ˈkä Zoova a ˈyize bʋbɔ ˈnɩ?
˗Wa yɩbhää wa ˈkä Lagɔ dlɩ yɔwʋ nɛnɩɩ, ˗a ˗ɲʋa ˈsɔ, ˗a kä ˗a ˈkä Lagɔ ˈgämö bʋbɔnɩ. ˗Yɩ kä ɔ ˈŋlɩ ˈnɩ?
YILII YƆWƲ
ˈŊlɔ ˗bhlʋ ˗ɔ ˗sɛɛ ˈfʋ a ˗lagwɩ a bʋbɔbʋbʋ kɛˈmö, ˗yɩ kää ˈŋlɩ ˈn ɔ ˗wʋä ˈmäna ˈmö, zɛlɩ yɩ wɛlɩɩ ˈmö.
« La Bible transforme des vies » (La Tour de Garde, 1er juilliet 2011)
ˈSaa ˗kamöä kwänɩ nzɩ ˗n ˈkä ˗mä ˈwluyɩbhäyɩbhɩ ˈwʋ bhïlamö, ˈcɩɛ ˗sɩbhä.
« Loue Jéhovah dans l’assemblée » (La Tour de Garde, janvier 2019)
Sɛɛ ɲɛgbayu ˗bhlʋ ˈtɛmanɩɛ ˈyli yɔwʋ nzɩ ɔ ˈkäa ˈwluyɩbhäyɩbhɩɩ ˈwʋ mö ˈyize, ˈyi ˈylɩmö.
Nɩkpa a ˗bɛ, klʋwa ˈmö wa ghlɛnɩɛ ˈmö ˈn wa bʋbɔɔ Lagɔ. ˗Maa, ˗abhʋa ˗abhlɩ ˗sɩbhä ˗a kä ɔ ˗a ˈkä ˈzʋmö ˗a?
a ˗Mä ˈcɩɛcɩɛkïbhï ˗mimii ˈmö, ˗a yi kïbhï ˈlɛ yɔwʋ yɩlɩ.