Sɛɛ Biblë gbä ɔ lagɔzuzukuu a dɔˈwʋ ˈnɩ?

Zoova yɩbhä nɩɩ ˗a nɩ yɩbhlɩnɩ ˈɔ ŋëyi ˗ɛ ˗wʋä ˗mä zlɩ ˈmö. ˗Mä ˈɔ ŋëyi ˈla ˈmö, lagɔzuzukuu ˈmö wa laa “Lagɔ a ˈyuë.” (Job 38:7) Sɛɛ Biblë gbä ɔ lagɔzuzukuu a dɔˈwʋ ˈnɩ? ˈSaa yɩ bhɛnɩ ɔ yɩ ˈkä nɩkpa ˈwlu nʋ ˈnɩ? Lagɔzuzukuu ˈwuë Lagɔ ˈa ŋëyi ˈmö a ˗nʋa yɩ glɩnɩ bhä ˗a?

1. ˈSaa wa la ɔ lagɔzuzukuu ˈnɩ?

Lagɔzuzukuu ˈmö Zoova ˈwälaa ˈwë ˈn ɔ yiɛ bhla dʋdʋkpäta ˈwäla. Zoova a saa, ˗sɩbhä yɩ ˗wʋä, ˗aaa bhɛnɩ ˗a ˈkɩ ˈylɩmö ˈn ˗mä yɩ ˗bhölɩnɩɛ zlɩ ˈmö. (Ebleewaa 1:14) Lagɔzuzuku a miniɲwɩ ˗bhölɩ ˈn yɩ ˗wʋ bhʋlʋbhlʋ ˈyɩ sɛ. (’Ylimötulanɩlii 5:11) Lagɔzuzuku ˈla, ‘Zoova ˈa wɛlɩɩ ˈmö yɩ ˗pʋnɩɛ ˈyukwli, ˈmö yɩ zʋä ˈklʋkpamö.’ (Psaume 103:20) Bhlaˈmö, Zoova tie a˗a lagɔzuzukuu yɩ ˈkä nɩkpa ˈɔ wɛlɩɩ ˈɲɛ yɩ ˈkʋa kwänɩ ˈn yɩ ˈkʋa puë. Zɩˈɛ a dɔˈwʋ, lagɔzuzuku kwänɩ Klɩtɩɛwaa ˈn wa ghlɩɛ nɩkpaa ˗wa yɩbhää wa ˈkä Lagɔ yɩbhlɩnɩ.

2. Sataa ˗ɲɛ ˈɔ zuzukuzokuu ˈsɔ ˗muë wa glɩnɩ ɔ ˈnɩ?

Lagɔzuzukuu ˗mimii Zoova ˈmö yɩ ˈbhööä ˈbɩwʋ. Lagɔzuzukwëa ˗a ˗sɛɛ tɛɛ Lagɔ ˈklʋkpamö, ˈmö wa laa “zuzukuzoku a ˈkifii wa laˈɛɛ Sataa, mɔɔ ɲimaa ˗dʋdʋkpäta ˗gömö a nɩkpaa ˈwlumö.” (’Ylimötulanɩlii 12:9) Sataa yɩbhä a˗a ɔ ˈkä ˗mumuë ˗gömö ˈkämanɩ, ˗sɩbhä a za ɔ nʋä tɛkänɩkpaa ˗ɲɛ lagɔazuzukuu mimii ˈsɔ ylʋ, ˈn wa yiɛ Lagɔ ˈklʋkpamö ˗sɛ. Lagɔzuzuku ˈla ˗yɩ ˗sɛ Lagɔ ˈklʋkpamö ˈmö, ˈmö wa laa zuzukuzokuu. Zoova yiɛ zuzukuzoku ˈla ˗mä zlɩ ˈmö kpëti ˈn ɔ yiɛ mäˈä dʋdʋ ˈwʋ sɛ bhlɩ. Ɔ yiaˈa ˗pa ˈyli bhɩa.—’Ylimötulanɩlii 12:9, 12.

3. Sɛɛ Sataa ˗ɲɛ zuzukuzoku ˈsɔ nʋ ɔ nɩkpa ylʋ ˈnɩ?

ˈWʋyɩbhäyɩbhʋ nɩkpa ghlɛnɩɛ ˈmö ˈn wa ˗ɲɛ zuzukuu ˈsɔ bhïlaa, ˈmö Sataa ˗ɲɛ ˈɔ zuzukuzokuu ˈsɔ ghlɛnɩɛ ˈmö ˈn wa dulaa nɩkpa a ˗bɛ. A yɩɛ, ˈwʋyɩbhäwaa, nɩkpa ˗wa nʋä ˗zɛlɩ a libhoo, guwaa, ˈn gwäzɩnʋwaa, ˈmö ˗mumuë möä zɛmö. Sɛ wa dulaˈɛ nɩkpa ˗sɩbhä ma˗a nɩɩ nɩkpa ˈmö wa ˈsunɩɛ ˗mä, wa ˈkä dlɩ ˈpä nɩɩ ˗wa yɛɛ ˈku ˈwë, wa bhɛnɩ wa ˗ɲʋa ˈsɔ ˈkä bhïla. Maa, Zoova lɛ nɩɩ: “ˈWʋyɩbhäwaa ˗ɲɛ guwaa ˈsɔ, a nɩ tʋa zɛmö mö.” (Lévitique 19:31) Zoova yɩbhä ɔ ˗kaɲɩ ˈwʋ ˗kʋ Sataa ˗ɲɛ ˈɔ zuzukuzokuu ˈsɔ a za, nza ɔ ɲɩaɲɩɛ ˈdɩmözʋwɛlɩ ˈlɛ. Lagɔ a ˗gblɩwaa wa glɩnɩɛ, ˈn wa yɩbhä wa ˗kaɲɩ ˈkwädlɩ ˗lizoku ˈwlu nʋ.

ˈCƖƐ ˗LII ˗MIMII

4. Lagɔzuzukuu kwänɩ nɩkpaa ˗wa yɩbhää wa ˈkä Zoova yɩbhlɩnɩ

ˈLɩlɩlɩ a dɔˈwʋ, lagɔzuzukuu mii ˈnɩɛ yɩɲɩgäsɛ lagɔwɛlɩɩ bia. Maa, lagɔwɛlɩbiawaa ˈmö yɩ kwänɩɛ, ˈn wa ghlɩɛ nɩkpaa ˗wa yɩbhää wa ˈkä Lagɔ yɩbhlɩnɩ. Zɛlɩ ’Ylimötulanɩlii 14:6, 7 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• ˗Yɩ kä ɔ ˈŋlɩ ˈn lagɔzuzukuu kä ɔ yɩ ˗kaɲɩ kwänɩ ˗mä lagɔwɛlɩbiabiu ˈmö ˈnɩ?

• ˗N yiaˈa ˗sɩkaa sɛ nɩɩ lagɔzuzukuu bhɛnɩ yɩ ˗kamö kwänɩ, nzɩ ˗n ˈkä nɩkpaa ˗wa yɩbhää wa ˈkä Biblë ˈmö ˈnʋ ghlɩ. Yɩ paamö ɔ swɩ ɲɛmʋ ˈmö ˗a? ˗Yɩ kä ɔ ˈŋlɩ ˈnɩ?

5. ˗A nɩ ˈdionɩ ˈwʋyɩbhäyɩbhʋ gwë

Sataa ˗ɲɛ zuzukuzokuu ˈsɔ, Lagɔ a ˗gblɩwaa wa glɩnɩɛ. ˗Sɩbhä ˗a glɩnɩˈɛ wa ˗gblɩwaa. Zɛlɩ Lwiikö 9:38-42 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˈSaa zuzukuzokuu nʋ ɔ nɩkpa ˈwlu ˈnɩ?

˗Aaa ˈyɩbhä ˗a ˈkä ˗aɲɩ zuzukuzokuu ˈwʋ jlinɩ. Zɛlɩ Deutéronome 18:10-12 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• ˈSaa zuzukuzokuu ghlɛnɩ ɔ ˈmö ˈn yɩ yɔlɔa ɔ nɩkpa, ˈn yɩ ˗ɲʋa bhïla ɔ ˈnɩ? ˗Mä ˗naˈa pɩɔ ˈyli a dɔˈwʋ, ˗lii ˗mii zuzukuzokuu ghlɛnɩ ɔ ˈmö ˈnɩ?

• Zoova ˗kä nɩɩ nɩkpaa nɩ tɩ ˈwʋyɩbhäyɩbhʋ a ˈke ˗bhlʋ aˈbhë ˗gänɩ, ˗na dɔˈwʋ ɔ kä ɔ zugo ˗a? ˗Yɩ kä ɔ ˈŋlɩ ˈnɩ?

ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.

VIDEO: “Sataa ˗kaaɲɩ ˗mä ˈpä a nɩ ˗sɛ nimï” (5:02)

• ˗Mä video ˈlɛ ˈmö, Palesa ˈa yuu ˗su a˗a zikpë sɔɔ ˈmö. ˗Na dɔˈwʋ yɩ nɛnɩ bhä ˗a? ˗Yɩ kä ɔ ˈŋlɩ ˈnɩ?

• Zuzukuzokuu a za, ˈsaa Palesa nʋ bhä nzɩ ɔ ˈkä ɔɲɩ ˈwʋ ˗kʋ ˈnɩ?

˗Tiamö a Klɩtɩɛwaa ˈnɩ ˈtatinɩ zuzukuzokuu ˈyi yɩ ˈkuë ylʋ nʋ. Zɛlɩ Nʋnʋlii 19:19 ˈn 1 Kolɛɛtɩ a ˗nʋa 10:21 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗N ˗kä ˗bhlɛ ˗lii ˗mimii ˗yɩ ˗glɛ zuzukuzokuu ˈwʋ ˗kää, ˗yɩ kä ɔ ˈŋlɩ ˈn ˗n kä ɔ ˗n ˈki sia ˈnɩ?

6. Wa yɛ Sataa ˗ɲɛ ˈɔ zuzukuzokuu ˈsɔ ˈwlu ˈplɩ

Sataa mɔɔ ˈKämanɩɛ zuzukuzokuu ˗gömö. Maa lagɔzuzukuu yɩbhlɩ, Zezwii, wa laˈɛ lagɔzuzukuu a ˈkifii Misɛlɩ, mɔɔ ˈkämaniɛ ˗gömö. Lagɔzuzukuu a ˈkifii Misɛlɩ ˈtɛɛ ɔ ˈmö ˗a? Zɛlɩ ’Ylimötulanɩlii 12:7-9 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• Misɛlɩ ˗ɲɛ ˈɔ lagɔzuzukuu ˈsɔ mʋa ˈtɛɛ ɔ ˈmö ˈnɩɩ, maa Sataa ˗ɲɛ ˈɔ zuzukuzokuu ˈsɔ mʋa ˈtɛɛ ɔ ˈmö ˗a?

• Na dɔˈwʋ, nɩkpɛ a ˗mɔ glɩnɩɛ Zezwii a ˗nɔ kä bhä ɔ ˈkä Sataa ˗ɲɛ ˈɔ zuzukuzokuu ˈsɔ ˗gu ˗a?

˗N bhɛnɩ ˗n ˈkä Sataa ˗ɲɛ ˈɔ zuzukuzokuu ˈsɔ ˈwlu ˈplɩ. Zɛlɩ Zaakö 4:7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Sɛɛ ˗n ˈkä ɔ ˈzʋ nzɩ ˗n ˈkä Sataa ˗ɲɛ ˈɔ zuzukuzokuu ˈsɔ ˈwlu ˈplɩ ˈnɩ?

DƐSƐKÄKÏBHÏ

Lagɔzuzukuu, yɩ kwänɩɲɩ. Sataa ˗ɲɛ ˈɔ zuzukuzokuu ˈsɔ, Zoova a ˗gblɩwaa yɩ glɩnɩɛ, ˈn ˈwʋyɩbhäyɩbhʋ ˈmö yɩ ghlɛnɩɛ ˈmö ˈn yɩ dulaa nɩkpaa.

ˈWʋligbanɩkïbhï

• Nɩkpa ˗wa yɩbhää wa ˈkä Zoova yɩbhlɩnɩ, sɛɛ lagɔzuzukuu kwänuë ɔ ˈnɩ?

• ˗Muë ˗lɛ ɔ Sataa ˗ɲɛ ˈɔ zuzukuzokuu ˈsɔ ˈnɩ?

• ˗Lii ˗yɩ ˗glɛ ˈwʋyɩbhäyɩbhʋ ˈwʋ, ˗yɩ kä ɔ ˈŋlɩ ˈn ˗aa ɔ ˗kä ˗a ˈki tɛkäsɛ aˈbhë kɛ zɩ ˈnɩ?

YILII YƆWƲ

˗Yɩ kää ˈŋlɩ ˈn ˗a kɩɛ dlɩ ˈwʋ nɩɩ wa ˗kä lagɔzuzukuu ˈwuë a ˈkifii Misɛlɩ nʋʋ, Zezwii ˈmö wa gaa, ˈyi ˈylɩmö.

« Qui est l’archange Michel ? » (Ɛtɛnɛtɩ ˈklʋ a ˈcɩɛcɩɛkïbhë)

Zuzukuzokuu a ˈkifii Sataa, ˗mä nɩkpa ˈmö ˗mä ɔ ˗wʋ bhä ˗a, maa ˗tiamö a nɩkpɛ bhä ˗a?

« Le Diable : principe du mal ou personne réelle ? » (Ɛtɛnɛtɩ ˈklʋ a ˈcɩɛcɩɛkïbhë)

Sɛɛ ˈŋlɔ ˗bhlʋ ˈzʋä ˈn ɔ yiɛ zuzukuzokuu a galɛ ˈmö ˈwlʋ, ˈyi ˈylɩmö.

« Elle a trouvé un but dans la vie » (La Tour de Garde, 1er juillet 1993)

Sɛɛ Sataa ghlɛnɩɛ ˈwʋyɩbhäyɩbhʋ ˈmö ˈn ɔ dulaa nɩnkpa, ˈyi ˈylɩmö.

“˗Damina, gupäpʋ ˈn ˈwʋyɩbhäyɩbhʋ a gbëawɛlɩɩ” (Lagɔ ˈa ˈpɩwʋlelea ˈwʋ a ˈyio, ˈpɩɔ 5)