ˈCƖƐCƖƐKÏBHË 30
ˈA dlɩsɛkänɩkpaa ˗wa yɛɛ ˈku ˈwë yi glu ˈwlʋ!
˗Aa nɩkpɛ ˗kä ˈkuu, yɔwʋ yɩ kälɩɛ teɲii ˈn dlɩ ˈmlɩ yɩ yilanɩɛ. Nza Biblë gbää nɩɩ ˈkwie, ˗aa ˗gblɩɲɔɔ. (1 Kolɛɛtɩ a ˗nʋa 15:26) ˗Mä ˈcɩɛcɩɛkïbhë 27 ˈmö, ˗a ˈyɩ a˗a ˈylɩmö nɩɩ Zoova yiaˈa ˗pa ˗aˈa ˗gblɩɲɔ ˈla ˈyli bhɩa. Maa, ˈsaa ɔ ˈkä ɔ nʋ ˗wa yɛɛ ˈku ˈwë a dɔˈwʋ ˈnɩ? ˗Mä ˈcɩɛcɩɛkïbhë ˈlɛ ˈmö, ˗lu ˗bhlʋ ˗wʋä ˗sɩbhä a sɛ ˗wʋ, Zoova gbää ɔ ˈkä zɩkö nʋ, ˗a yi wʋ wɛlɩɩ ˈcɩɛ. Miɛ nɩɩ ɔ yi nɩkpa a miliyalie ˈwʋ ˈsɔ ˗bhölɩbhölɛ ˈɲɛ, ɔ yua glu ˗sɛ ˈn wa yi ˈkwädlɩkwädlɩnɩ ˗bhölɩ. Yɩ yi ɔ ˗tiamö ˗sɩbhä ˈwʋ ˈplɩ ˗a? Ɔ ˗kʋä glu ˗sɛ ˈwë, ˗mä zlɩ ˈmö ˗mä wa ˈkä ɔ ˗bhölɩnɩ ˈnɩɩ, maa mäˈä dʋdʋ ˈwʋ bhä ˗a?
1. ˈSaa Zoova ˈkä ɔ nʋ ˗aˈa dlɩsɛkänɩkpaa ˗wa yɛɛ ˈku ˈwë a dɔˈwʋ ˈnɩ?
Nɩkpaa ˗wa yɛɛ ˈku ˈwë, Zoova yɩbhä ɔ ˈkʋa ˈwʋ ˈsɔ ˗bhölɩbhölɛ ˈɲɛ. Zɔɔbö, nɩkpɛ a ˗mɔ ˈtɛɛnɩ a˗a teɲii Lagɔ dlɩ ˈmö ɔ glɩnɩ a˗a. Ɔ kɩ a˗a dlɩ ˈwʋ nɩɩ ɔ ˗kä ˈku ˈwë, Lagɔ ˈnaa ˈkɔ ˈwʋ dlʋ. Sɛˈɛ ɔ ˈɲɛɛ Lagɔ ˈdɩ nɩɩ: “˗N ˗yii wäzɩ, ˈn n yi ŋulu [˗mä lesikpëa ˈmö.]”—Zɛlɩ Job 14:13-15 ˈmö.
2. Sɛɛ ˗a ˗yi ɔ sɛ nɩɩ ˗wa yɛɛ ˈku ˈwë yi glu ˈwlʋ ˈnɩ?
Dɛɛ Zezwii ˗wʋ a˗a mäˈä dʋdʋ ˈwʋ, Lagɔ ˈɲɔ a˗a ˈmötɛɛnɔɔ ɔ ˈkä nɩkpa glu ˗sɛ. Ŋlʋyuke ˗bhlʋ ˗ɔ kä a˗a ˈylʋbö 12, ɔ ˗ɲɛ ˈkuzleŋlɔ ˗bhlʋ a ˗yowli ˈsɔ, wa yɛ a˗a ˈku ˈwë ˈn Zezwii yua gäla. (Maakö 5:41, 42; Lwiikö 7:12-15) Bhäla, ˈn Zezwii a ˈtua Lazaa yiɛ ˈku. Wa ziza Lazaa, ˈyli ˗mʋäna yɛ ˈplɩ ˈwë ˈn Zezwii yoo glu ˗sɛ. Ɔ ˈkɔɔ glu ˗sɛɛ yii, ɔ bhibhee Lagɔ ˈwë ˈn ɔ yiɛ nɩɩ, “Lazaa, ˈwlʋ ˗mä lesikpë ˈmö!” ˈN “Lazaa yiɛ gɔlɔ, ˈn ɔ yiɛ ˗mä lesikpëa ˈmö ˈwlʋ.” (Zaa 11:43, 44) Sɛɛ ˈmäna ˈlɩbhää teɲii Lazaa a ˗lowluwa ˗ɲɛ ɔ ˈtuawa ˈsɔ, a nɩ ˈpäniɛ ˗ka dlɩ kɛ!
3. Dlɩtɛɛnɩdɛ a ˗ma ˗a kä ɔ ˗aˈa dlɩsɛkänɩkpaa ˗wa ˈkuä a dɔˈwʋ ˈnɩ?
Biblë lɛ nɩɩ, “Lagɔ yuë glu ˗sɛ.” (Nʋnʋlii 24:15) Dɛɛ Zezwii ˗wʋ a˗a mäˈä dʋdʋ ˈwʋ a nɩkpa ɔ ˗sɛ a˗a glu, waˈaa ˗mä zlɩ ˈmö mö. (Zaa 3:13) Zaa, dɛɛ Zezwii ˗sʋa glu, wa ˈwuë ˈmäna. Saa ˗bhlʋ ˗kpɔ ˈla, ˗sɩbhä Zezwii ˈkää nɩkpa a miliyalie glu ˗sɛ wa ˈkä ˈkwädlɩkwädlɩnɩ mäˈä dʋdʋ ˈwʋ ˗bhölɩnɩ, ˗mä ˈbhlɩ a ˗bhlɩɩ ˈmö. Ɔ lɛ nɩɩ ˗muë ˗a yɛ a˗a ˈwʋ dlʋ ˈwë, Lagɔ ligbanɩɛ ˗bhlɛ ˈwʋ ˈyize, wa yi glu ˈwlʋ.—Zaa 5:28, 29.
ˈCƖƐ ˗LII ˗MIMII
˗Yɩ kää ˈŋlɩ ˈn ˗a kɩɛ dlɩ ˈwʋ nɩɩ Zezwii kä ˈmötɛɛnɔ ɔ ˈkä ˗wa yɛɛ ˈku ˈwë glu ˗sɛ ˈn ɔ bhɛnɩ ɔ ˈkɩ ˗tiamö nʋʋ, ˗a nɩ ˈyi ˈylɩmö. Sɛɛ glusɛsʋ a wɛlɩɩ bhɛnɩɛ yɩ ˗kamö swɩ ɲɛmʋ ˈmö ˈpä, ˈn sɛ yɩ bhɛnɩˈɛ yɩ ˗kamö dlɩtɛɛnɩdɛ ˈɲɛ, ˗a nɩ yɩlii yɔwʋ.
4. Zezwii tula a˗a nɩɩ ɔ bhɛnɩ ɔ ˈkä ˗wa yɛɛ ˈku ˈwë glu ˗sɛ
ˈSaa Zezwii nʋä ɔ ˈtua Lazaa a dɛ, ˈcɩɛ sasɛ yɩ wɛlɩɩ. Zɛlɩ Zaa 11:14, 38-44 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ ˗a ˗yi ɔ sɛ nɩɩ Lazaa ˈku a˗a ˗tiamö ˈnɩ? —Yɩlɩ ˗mä gbɛlʋ 39 ˈmö.
ˈN Lazaa ˗kä a˗a ˗mä zlɩ ˈmö möö, Zezwii yi a˗a bhä nɩɩ ɔ nɩ sɩbhä ˈwlu ɔ ˈkä mäˈä dʋdʋ ˈwʋ ˗bhölɩnɩɛ yi ˗a?
5. Nɩkpa a ˈkɔkɔmlɛ yi glu ˈwlʋ!
Zɛlɩ Psaume 37:29 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Nɩkpa a miliyalie mʋa ˈkää glu ˈwlʋ, maa dɛɛ wa ˈkä ɔ ˗bhölɩnɩ ˈnɩ?
Zoova a bʋbɔbʋbɔwaa a ˈyize ˈmö Zezwii ˈnɩɛ glu ˗sɛɛ yi, maa ɔ yiˈɛ nɩkpa ˗mumuë a ˗bɛ glu ˗sɛ. Zɛlɩ Nʋnʋlii 24:15 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Wa ˈkää glu ˈwlʋ a glaˈmö, ˗mɔ ˗n yɩbhä ɔ ˗naa ˗n ˈkä ˈylɩmö ˈnɩ?
ˈPänɩɛ ˗ka kïbhë ˈlɛ dlɩ kɛ: Sɛɛ ˈyu ˗käˈɛ ŋämö dɔˈwʋ ˗wʋ ˈn ɔ dɩba bhɛnɩˈɛ ɔ ˈkɔ gälaa, ˗sɩbhä Zezwii bhɛnɩɛ ɔ ˈkä ˗wa yɛɛ ˈku ˈwë gäla.
6. Glusɛsʋ a wɛlɩɩ bhɛnɩ yɩ ˗kamö swɩ ɲɛmʋ ˈmö ˈpä ˈn yɩ ˗kamöˈɛ dlɩtɛɛnɩdɛ ˈɲɛ
Zayiluu ˈa ŋlʋyu a wɛlɩɩ ˈpä nɩkpa a ˗bɛ dlɩ ˗wʋ a˗a ˈmlɩ ylinɩ dɔˈwʋ swɩ ɲɛmʋ ˈmö. Wɛlɩ ˈlɛ, yɩ ˗lɛ wɛlɩ a ˗mi ˈplɩɛ ˗tiamö ˈwʋ. Zeli ˈmö, ˗mä Lwiikö 8:40-42, 49-56 ˈmö.
Zezwii ˈkää Zayiluu ˈa ŋlʋyu gäla yii, sɛˈɛ ɔ ˈɲɛɛ Zayiluu ˈdɩ: “Zayiluu, bhlɩ dlɩ sɛ, ˈtɛɛnɩ Lagɔ dlɩ cuu.” (Yɩlɩ ˗mä 50 ˈmö.) Sɛɛ glusɛsʋ a wɛlɩɩ bhɛnɩ ɔ yɩ ˗kamö kwänɩ...
˗na dlɩsɛkänɩkpɛ ˗kä ˈku?
nɩkpɛ ˗kä ɔ ˗kamö ˗lizoku ˈwlu nʋ?
ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Sɛɛ glusɛsʋ a wɛlɩɩ ˈtɛmanɩ ɔ Felisite a ˗lowluwa dlɩ ˈwʋ ˈnɩ? ˈN sɛ yɩ ˈpʋa ɔ swɩ ɲɛmʋ ˈmö ˈnɩ?
NƖKPA ˗MUMUË LƐ NƖƖ: “N ˈniɛ dlɩ ˈwʋ ˗kä nɩɩ nɩkpaa ˗wa yɛɛ ˈku ˈwë bhɛnɩ wa ˈkä ˈylɩ ˗bhlʋ ˈmö glu ˈwlʋ nzɩ wa ˈkä ˈwʋ ˈsɔ ˗bhölɩnɩ.”
Sɛɛ ˗n yɩlii ɔ ˗naa ˈwʋ ˈnɩ?
Biblë a gbɛlʋ ˗mu ˗n bhɛnɩ ɔ ˗n ˈkä ˈmö zɛlɩ nzɩ ˗n ˈkä tula nɩɩ glusɛsʋ yi ˗tiamö ˗bhölɩ?
DƐSƐKÄKÏBHÏ
Biblë lɛ nɩɩ nɩkpa a miliyalie ˗wa yɛɛ ˈku ˈwë, wa yi glu ˈwlʋ. Zoova yɩbhä wa nɩ ˗bhölɩnɩ ˈwʋ ˈsɔ nza ɔ ˈɲɛɛ Zezwii ˈmötɛɛnɔ ɔ ˈkʋa glu ˗sɛ.
ˈWʋligbanɩkïbhï
Zoova ˗ɲɛ Zezwii ˈsɔ, wa ˈkä ˗wa yɛɛ ˈku ˈwë glu ˗sɛ nzɩ wa ˈkä ˈwʋ ˈsɔ ˗bhölɩnɩ a dɔˈwʋ, ˈsaa yɩ nʋa ɔ ˈwlu ˈnɩ?
Nɩkpa a miliyalie ˗wa ˈkää glu ˈwlʋʋ, ˗mä zlɩ ˈmö ˗mä wa ˈkä ɔ ˗bhölɩnɩ ˈnɩɩ, maa mäˈä dʋdʋ ˈwʋ bhä ˗a? ˗Yɩ kä ɔ ˈŋlɩ ˈn ˗n pä ɔ ˗sɩbhä dlɩ ˈnɩ?
˗Yɩ kä ɔ ˈŋlɩ ˈn ˗n kɩ ɔ dlɩ ˈwʋ nɩɩ ˗naˈa dlɩsɛkänɩkpaa ˗wa yɛɛ ˈku ˈwë yi ˈwʋ ˈsɔ ˗bhölɩnɩ ˈnɩ?
YILII YƆWƲ
ˈSaa ˈkää ˗muë dlɩ ˗wʋä ˈmlɩ ylinɩ dɔˈwʋ kwänɩ.
« Quand on perd quelquˈun qu’on aime » (Réveillez˗vous ! no 3 2018)
Nɩkpɛ a ˗mɔ ɔɲɩ dlɩsɛkänɩkpɛ yɛɛ ˈkuu, Biblë a ˈpäpägböö bhɛnɩ ɔ yi ˈkɔ ˗tiamö kwänɩ ˗a?
ˈYu a dlɩsɛkänɩkpɛ ˗kä ˈkuu, sɛ ɔ bhɛnɩ bhä ɔ ˈkä yɩ dlɩpänɔɔ ˈwlu ˈplɩ ˈnɩ?
Nɩkpa ˗mumuë yi ɔ ˗mä zlɩ ˈmö mö ˗a? ˗Wa ˈnaa ˈkä ɔ glu ˈwlʋ ˈnɩ?