Sɛɛ lagɔzɩkpaa ˗gïganɩ ɔ ˈwlu ˈnɩ?

Zoova, Lagɔ a ˗mɔ ˈnɩɛ ˗lii ˗yɩ ˗wʋä bidibidi ˈyɩbhä ˈmö ɔ glɩnɩɛ. (1 Kolɛɛtɩ a ˗nʋa 14:33) Nza ˈɔ bʋbɔbʋbɔwaa ˗gïganɩɛ sasɛ ˈwlu. Sɛɛ ˗aˈa lagɔzɩkpö ˗gïganɩ ɔ ˈwlu ˈnɩ? ˗Lii ˈkä ˈyukusɛ mö a dɔˈwʋ, ˈsaa ˗a ˈkä ɔ bhʋlʋbhlʋ nʋ ˈnɩ?

1. ˗Mɔ ˗lɛ bhä Klɩtɩɛzɩkpa a ˈwukpëlea ˈnɩ?

’Zezwii Kliisɩ mɔɔ glɩnɩɛ Klɩtɩɛzɩkpa a ˈwukpëlea.’ (Ɛfɛɛzɩ a ˗nʋa 5:23) Ɔ ˗wʋ ˗mä zlɩ ˈmö ˈn ɔ ˗gänɩɛ Zoova a bʋbɔbʋbɔwaa ˗wa ˗wʋä ˗mä bhlɩɩ ˈwuë ˗gömö a libhoo ˈyli. Zezwii ˈgïla ˈyukugänɩwa a ˗zɩkpa ˈtikëyike sɛ, wa laa Sasɛ libhonʋɲɔ ˗ɔ ˈnɛɛ. ˈMö wa laˈɛ ˗Muë ˗gänɩɛ ˗aˈa ˈwlugïganɩzɩkpaa ˈyuku. (Zɛlɩ Matie 24:45-47 ˈmö.) Tɛkäklɩtɩɛwaa a ˈtɛɲɩ ˈmö, Zezwii ˈa tietiewaa ˗ɲɛ Zeluzalɛɛmö a ˈyukugänɩwaa ˈsɔ, mʋa ˗su a˗a Lagɔzɩkpö ˈwuë. ˗Muë ˗gänɩɛ zɩˈɛ ˗aˈa ˈwlugïganɩzɩkpaa ˈyuku, ˗sɩbha wa ˗suˈɛ wabhlɩ ˈbhlɩ ˗gömö a lagɔzɩkpö ˈwuë. (Nʋnʋlii 15:2) Maa, mii ˈnɩɛ zɛmö ˗sɛ nɩɩ lagɔdaayuë ˈla mʋa glɩnɩɛ ˗aˈa ˈwlugïganɩzɩkpaa a ˈkifiea. Waˈbhï, Zoova ˈa wɛlɩɩ ˈmö wa ˈtatinɩɛ ˈyi yɩ ˈkʋa ˗su nzɩ wa ˈkä ˈsaa ɔ yɩbhää nʋ, ˈn Zezwii ˈa ˈdɩmözʋwɛlɩɩ ˈmö wa ˗gänɩˈɛ.

2. Libhoo ˗mu ˈyukugänɩwaa nʋ ɔ ˈnɩ?

Klɩtɩɛwa a ˗muë yɛɛ ˗mä lagɔwɛlɩɩ ˈmö ˗jɩbhɛnɩ ˈmö wa glɩnɩɛ. Biblë ˈmö wa ghlɛnɩɛ ˈmö ˈn wa ˈcɩaa, ˈn wa pää lagɔzɩkpa ˈmö a ˗nʋa swɩ ɲɛmʋ ˈmö. Wa ˈnuëë libho ˈla a za ˈpɛnɩ. Sasɛ wa ˈzʋnɩɛ lagɔzɩkpa ˈmö a ˗nʋa ˈyli, ‘dlɩ a dlɩ ˈmö wa nʋnɩɛ ˈwa libhoo, sɛɛ Lagɔ yɩbhää.’ (1 Piɛlɩ 5:1, 2) ˈYukugänɩwa a ˈyliwʋwa ˗wʋˈɛ ˗lɛ, mʋa kwänuëë ˗mä ˈwa libhoo ˈmö. Bhäla, wa bhɛnɩˈɛ wabhlɩ wa ˈkä ˈyukugänɩwa ˈzʋ.

˗Muë ˗gänɩɛ ˗aˈa ˈwlugïganɩzɩkpaa ˈyuku mʋa ˈzʋa ˈyukugänɩwaa ˈpɩɔ a ˈwʋdɩdɩwa ˈwʋ. ˈPɩɔ a ˈwʋdɩdɩwa ˈla, mʋa dɩdɩɛ lagɔzɩkpö ˈwʋ, wa ˈpä yɩ ˈmö a ˗nʋa swɩ ɲɛmʋ ˈmö ˈn wa ɲʋa ˈdɩmözʋwɛlɩɩ wa ˈkää ˗gänɩ. Biblë ˈmö a wɛlɩɩ ˈmö wa ˗gänɩɛ ˈn wa ˈzʋa lagɔdaayuëa ˈyukugänɩwa ˈwʋ ˈn wa ˈzʋaˈɛ ˗mumuë ˈyukugänɩwa a ˈyliwʋwa ˈwʋ.—1 Timotee 3:1-10, 12; Tiitɩ 1:5-9.

3. Libho a ˗mu Zoova ˈa Bhlɩnɩwaa nʋ ɔ bhʋlʋbhlʋ ˈnɩ?

Lagɔzɩkpö ˈmö a ˗nʋa ˈwuë, “Zoova ˈa ŋlɩɩ ˈmö wa ˈghlimanɩɛ.” ˗Mä ˈwluyɩbhäyɩbhɩ ˈwʋ, wa bhïlamö ˗mä ˈn wa biaˈɛ lagɔwɛlɩɩ ˈtɛɲɩ ˈwuë ˈmö sɛ wa bhɛnɩɛ.—Psaume 148:12, 13.

ˈCƖƐ ˗LII ˗MIMII

4. ˈKifii a ˗mɔ ˈzʋnɩɛ ɔ ˗nʋa ˈyli ˈmö Zezwii glɩnɩɛ

Zezwii lɛ nɩɩ ˗a ˈwuë ˗a nɩ yinɔɔ. Zɛlɩ Matie 11:28-30 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗A ˗kä Zezwii ˗aa ˈkifii ˈmö ˈwʋ ˈlibhï, ˈsaa yɩ nʋʋɲɩ ɔ ˈwlu ˈnɩ?

VIDEO: ˗Mä Nepalɩ a dʋdʋ ˗wʋ tɩtlɛnɩɛ a za ˈyukugänɩwaa ˗wʋ ˗mä a ˗nʋa kwänɩ dɔˈwʋ (4:56)

Biblë sʋlʋnɩɲɩ sɛɛ ˈyukugänɩwaa ˈkää sasɛ libhoo Lagɔ ˈɲʋa nʋ.

Zɛlɩ Isaïe 32:2 ˈn 1 Piɛlɩ 5:1-3 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• ˗N ˗yia ˗sɩkaa sɛ nɩɩ Zezwii a saa, ˈyukugänɩwaa ˗bhɩɔ ˈkwädlɩ ˈmö wa ˗kaɲɩ swɩ ɲɛmʋ ˈmö ˈpää. Zaa, ˈsaa yɩ nʋmö ɔ ˈwlu ˈnɩ?

• ˈYukugänɩwaa ˗gänɩˈɛ kii ˗mimii ˈmö Zezwii a gbäpöö. Yɩ ˗mi ɔ ˈnɩ?

5. ˈYukugänɩwaa ˈa nʋnʋlii tula sɛɛ ˗a bhɛnɩɛ ˗a ˈkä ˈwa gbäpöö ˗gänɩ

VIDEO: ˈYukugänɩwaa tula sɛ wa ˈkää ˈwa gbäpöö ˗gänɩ! (7:39)

˗Wa ˗gänɩɛ lagɔzɩkpö ˈyukuu, sɛɛ ˈwa nʋnʋlii kää yɩ ˈkä ˗wʋ, Zezwii ˗sɛsɛnɩ yɩ wɛlɩɩ ˈmö. Zɛlɩ Matie 23:8-12 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Sɛɛ ˈyukugänɩwaa kää wa ˈkä ˗wʋ, Biblë bhïla yɩ wɛlɩɩ. Zaa ˗n ˗kii lagɔgligbï ˈmö a ˈkifiea a nʋnʋlii yɛkanɩ, ˈsaa ˗n köbha ɔ ˈyli ˈnɩ?

1. 1. ˈYukugänɩwaa ˗ɲɛ Zoova ˗wʋnɩ ˈkwädlɩ ˈwʋ, ˈn wa kwänɩˈɛ ˈwa ˈligbï ˈmö a ˗nʋa wa ˗ɲɛ Zoova ˈkä ˈwʋ ˗wʋnɩ.

2. 2. ˈYukugänɩwaa ˈzʋnɩ ˈwa lagɔzɩkpö ˈmö a -nʋa ˈwuë ˈyli.

3. 3. ˈYukugänɩwaa bia ˈkwädlɩ lagɔwɛlɩɩ ˈyize.

4. 4. ˈYukugänɩwaa, ˈcɩacɩawaa wa glɩnɩɛ. Wa kwänɩˈɛ lagɔdaayuëa wa ˈkä Lagɔ ˈa ˈKamanɔɔ a ˗budu ˈmö ˈwlɩlɩ pla ˈn wa nʋmöˈɛ libhi ˗mimii.

6. ˗A bhɛnɩ ˗a ˗ɲɛ ˈyukugänɩwaa ˈsɔ ˈkä libhoo ˈwʋ nʋnɩ

˗A ˗ɲɛ ˈyukugänɩwaa ˗kä libho ˈwʋ nʋnɩ, ˗yɩ kää ˈŋlɩ ˈn yɩ kää dɛsɛ, Biblë sɛsɛnɩ yɩ wɛlɩɩ ˈmö. Zɛlɩ Ebleewaa 13:17 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Biblë zʋɲɩ ˈdɩ ˈmö nɩɩ, ˗a kä ˗a ˈkä ˗wa ˗gänɩɲɩɛ ˈyuku teɲii ˈklʋkpamö ˈzʋ. Sɛɛ ˗n yili ɔ ˗naa ˈwʋ ˈnɩ?

Zɛlɩ Lwiikö 16:10 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• Sɛɛ ˗lii yi ˈmö ˗wʋ aˈbhë ˗kë, ˗a ˗ɲɛ ˈyukugänɩwaa ˗kä ˈkwädlɩ libho ˈwʋ nʋnɩ, ˗yɩ kä ɔ ˈŋlɩ ˈn yɩ kä ɔ dɛsɛ ˈnɩ?

DƐSƐKÄKÏBHÏ

Zezwii mɔɔ glɩnɩɛ lagɔzɩkpa a ˈwukpëlea. ˈƆ ˈKämanɔɔ ˈmö ˈyukugänɩwaa zʋä ˈklʋkpamö. ˗A ˗ɲʋa ˈsɔ ˈn ˗a nʋnɩɛ ˈgämö libho. Ɛˈɛ ˗bhö ɲɩasɛ, maa wa paaɲɩ swɩ ɲɛmʋ ˈmö ˈn wa slʋnɩɲɩˈɛ sɛɛ ˗a bhɛnɩɛ ˗a ˈkä ˈwa gbäpöö ˗gänɩ.

ˈWʋligbanɩkïbhï

• ˗Ɔ glɩnɩ ɔ lagɔzɩkpa a ˈwukpëlea ˈnɩ?

• Sɛɛ ˈyukugänɩwaa kwänɩ ɔ ˗mä lagɔzɩkpa ˈmö a ˗nʋa ˈnɩ?

• Libho ˗mu Zoova a bʋbɔbʋbɔwaa kä ɔ bhʋlʋbhlʋ ˈnɩ?

YILII YƆWƲ

˗Muë ˗gänɩɛ ˗aˈa ˈwlugïganɩzɩkpaa ˈyuku ˗ɲɛ ˈyukugänɩwaa ˈsɔ, sɛ wa tulaa nɩɩ wa lagɔdaayuë a gbʋ plɛnʋa teɲii, ˗a nɩ ˈyiɛ ˗ka ˈylɩmö.

Wa pä lagɔdaayuëa ˗wa ˗wʋä ˈki ˈmö swɩ ɲɛmʋ ˈmö (4:22)

Libhoo ˈpɩɔ a ˈwʋdɩdɩwaa nʋä, ˈcɩɛ wʋ dɛ.

ˈPɩɔ a ˈwʋdɩdɩɲɔ a zɩkpa ˗mä ˈkwlɛ ˗gwlɩ ˈmö (4:51)

Libhoo ŋwlɩɩ kää ˗mä lagɔzɩkpa ˈmö, zɛlɩ yɩ wɛlɩɩ ˈmö.

« Y a˗t˗il des femmes ministres chez les Témoins de Jéhovah ? » (La Tour de Garde, 1er septembre 2012)

Sɛɛ ˈyukugänɩwaa ˈtɛmanɩɛ ˈyli yɔwʋ ˈn wa pää ˈwa lagɔdaayuëa swɩ ɲɛmʋ ˈmö, ˈyi ˈylɩmö.

« Les anciens, “compagnons de travail pour notre joie” » (La Tour de Garde, 15 janvier 2013)