ˈCƖƐCƖƐKÏBHË 41
Ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ a dɔˈwʋ sɛɛ Biblë gbä ɔ ˈnɩ?
Nɩkpa ˗mumuë a ˗bɛ, ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ a wɛlɩɩ, wa ˈkɩ bhïla a dɔˈwʋ, zʋ ˈwʋ yɩ ˗bhʋaa. ˗Maa, Biblë ˗kä ˗sɩbhä a wɛlɩɩ bhïla dɔˈwʋ ˗wʋʋ, ɛ ˈniɛ ɛbhlɩ ˈwʋ ziza ˈn ˗sɩbhä ˈklʋkpamö a kää. ˈN sɛ ɛ gbää, yɩ kä ˗aa ˗li a ˗lii ˈmö. ˗Yɩ kää ˈŋlɩ miɛ nɩɩ, ˗aˈa ˈwälaɲɔ Zoova ˈmö Biblë ˈbhöönɩɛ ˈmö. Zaa, mɔɔ ˗yiɛ ˈsaa nɛnɩɛ ˗aa dɔˈwʋ. Sɛɛ ˗a ˈkää ˈzʋ ˗a ˈkɔ dlɩ yɔwʋ nɛnɩ ˈn ˈsaa ˗kaɲɩɛ kwänɩ ˗a ˈkä ˈkwädlɩkwädlɩnɩ a ˗bhölɩbhölɛ ghlɩɩ, ˈmö ɔ slʋnɩɲɩɛ.
1. Ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ a wɛlɩɩ sɛɛ Zoova yɩli ɔ ˈwʋ ˈnɩ?
Ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ, ˈɲɛɲɛlu a ˗mu Zoova ˈɲɛɛ ˗wa yɛɛ kwäkwänɩ ˈwë, ˈmö wʋ glɩnɩɛ. Zoova yɩbhä nɩɩ ˈɲɛɲɛlu ˈla nɩ ˈzʋa ˈmäna dlɩ zɛmö. ˈƝɛɲɛlu ˈla glɩnɩ ˗lu a ˗mu ˈkää ˈŋlɩ ˗kä wa ˈkä ˈyuë ghlɩ. ˗Maa ɛˈɛ ˗bhö yɩ ˈyize, wʋ glɩnɩˈɛ ˗lu a ˗mu ˈkää gbä wa ˈkä tula nɩɩ wa ˈyɩbhäyɩbhänɩ ˗tiamö. Nza Lagɔ ˈa wɛlɩɩ nʋä nɩɩ: “˗Naˈa ŋlɔɔ ˗n kwä a˗a dɛɛ ˗n glɩnɩ a˗a ɲɛgbayuu, mö ˗n nɩ ˗wa ˈyize.” (Proverbes 5:18, 19) Klɩtɩɛwaa ˗wa yɛɛ kwäkwänɩ ˈwë, Zoova ˈnɩɛ ˈyɩbhä wa ˈkä käböbɛyɩ yɩlɩ. Mɩɛ nɩɩ, ɔˈɔɔ ˈyɩbhä ɲɩbhɛlʋ ˈkä ˗lɛ ˈɔ ŋlɔɔ tɩ nzɩ ɔ ˈkä ŋwlɩ ˗mumuë a ˈbɛyɩ mö, ˈn ˈŋlɔ ˈkäˈɛ ˗lɛ ɔ ˈluwli tɩ nzɩ ɔ ˈkä ɲɩbhɛlɩ ˗mumuë a ˈbɛyɩ mö. ˗Lɛ a dɔˈwʋ, wa yi ˈkwädlɩ ˈmö ˈnʋnʋnɩ ˈyize.—Zɛlɩ Ebleewaa 13:4 ˈmö.
2. Ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ a dɔˈwʋ sɛɛ ˈnɩ ɔ Zoova dlɩ yɔwʋ nɛnɩ ˈnɩ?
Biblë lɛ nɩɩ ˗wa nʋä ‘˗ɔɔzʋkälii a kii ˈwuë, ˈpɩwʋ mää Lagɔ ˈkämanɩɛ, waˈaa ˗mä ˈbhle ˗kä.’ (1 Kolɛɛtɩ a ˗nʋa 6:9, 10) Glɛkögbʋ ˈmö, wa ˗kä pornéïa nʋʋ, ˗ɔɔzʋkälii a kii ˈwuë ˈmö wa laa ˗sɩbhä. Mii ˗lɛ, (1) ɲɩbhɛlʋ ˗ɲɛ ˈŋlɔ ˈsɔ ˗waaa ˗bhlɛ kwäkwänɩ ˈn wa pöä sɛa, (2) ɲɩbhɛlɩ ˗wa ˗ɲɛ wa ˈbhɩaɲɩbhɛlɩɩ pöä sɛ, ɛ ˗käˈɛ ŋwlɩ ˗wa ˗ɲɛ wa ˈbhɩaŋwlɩɩ pöä sɛ, ˈn (3) nɩkpa ˗wa ˗ɲɛ nɩma pöä sɛ. ˗A ˗kä ˗sɩbhä a ‘nʋnʋlizoku ˈla ˈwuë kɛˈmö ˗sɛɛ,’ ˗a yi Zoova dlɩ yɔwʋ nɛnɩ.—1 Tesaloniikö a ˗nʋa 4:3.
ˈCƖƐ ˗LII ˗MIMII
Sɛɛ ˗a ˈkää ˗ɔɔzʋkälii a kii ˈwuë gwë ˈdionɩ, ˈn ˗a ˗kä ˗sɩbhä ˈzʋ a sɛ yɩ kää ˗aa ˗li a ˗lii ˈmö, ˈyi ˈylɩmö.
3. ˗A nɩ panɩ ˗ɔɔzʋkälii a kii ˈwuë ˗gömö
Zoova a bʋbɔbʋbɔɲɔ ˗bhlʋ ˗ɔ paa Zɩzɛɛfʋ, ɔ yɩbhä a˗a ɔ ˈkä ˈkwädlɩ ˈwlɩlɩ ˗wʋ Lagɔ a ˈyila ˈklʋ. Zɛlɩ Genèse 39:1-12 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
ˈSaa ˈsunɩ ɔ ˗mä Zɩzɛɛfʋ ˈn ɔ yi ɔ futo ˈnɩ? —Yɩlɩ ˗mä gbɛlʋ 9 ˈmö.
˗Na dɔˈwʋ, sɛɛ Zɩzɛɛfʋ ˈzʋä nɛnɩ bhä ˗a? ˗Yɩ kä ɔ ˈŋlɩ ˈnɩ?
Zɩˈɛ, sɛɛ ˗dɩgbö bhɛnɩ ɔ wa ˈkä Zɩzɛɛfʋ a gbäpöö ˗gänɩ wa ˈkä ˗ɔɔzʋkälii a kii ˈwuë ˗gömö panɩ ˈnɩ? ˈZʋ ˗lɛ VIDEO.
Zoova yɩbhä nɩɩ ˗a ˈwuë, ˗a nɩ ˈdionɩ ˗ɔɔzʋkälii gwë. Zɛlɩ 1 Kolɛɛtɩ a ˗nʋa 6:18 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Lii a ˗mi bhɛnɩ ɔ yɩ ˈkä nɩkpɛ ˗ɔɔzʋkälii a nʋnwɛ ˈmö ˈpä ˈnɩ?
Sɛɛ ˗a bhɛnɩ ɔ ˗a ˈkä ˗ɔɔzʋkälii ˗gömö panɩ ˈnɩ?
4. ˗A bhɛnɩ ˗a ˈkä ˗mäpäpʋ ˈwlu ˈplɩ
˗A ˈkä ˗ɔɔzʋkälii a ˗mäpäpʋ ˈwlu ˈplɩ a dɔˈwʋ, ˈsaa ˈkä ɔ ˈŋlɩ ˗kä yɩ ˗kaɲɩ kɛˈmö ˈtɛɛnɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, lagɔdaayuu ˈyɩɛ ˈylɩmö nɩɩ ˈɔ dlɩpäsaa ˗ɲɛ ˈɔ nʋnʋlii ˈsɔ bhɛnɩ yɩ ˈkɔ ˗mä ˈsunɩ ɔ ˈkä ŋwlɩ ˗mumuë a ˈbɛyɩ yɩlɩɩ, sɛ ɔ ˈzʋ ɔ ˈnɩ?
ˈTɛɲɩ ˗mɛmɛɛ ˈmö aˈbhë, nɩkpɛ a ˗mɔ ˗glɛ teɲii Lagɔ ˈwʋ, ɔ dlɩpäsaa ˈkä ˈwlɩlɩ ˗wʋ a dɔˈwʋ, yɩ bhɛnɩ yɩ ˈkɔ kɛˈmö ˈtɛɛnɩ. Zaa, sɛɛ ˗a ˈkä ɔ ˈzʋ ˗a ˈkä ˗sɩbhä a dlɩpäsazokwëa ˈla ˈwlu ˈplɩ ˈnɩ? Zɛlɩ Filiipö a ˗nʋa 4:8 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Lii a ˗mi ˗a kä ɔ ˗a ˈkä dlɩ ˈwʋ ˈpä ˈnɩ?
˗A ˗kä ˈkwädlɩ Biblë ˈmö zɛlɩɩ, ˗a ˗kä Zoova ˈa libhoo nʋ ˈyize, sɛ yɩ ˗kaɲɩ ɔ kwänɩ ˗a ˈkä ˗mäpäpʋ ˈwlu ˈplɩ ˈnɩ?
5. Zoova ˈa ˈpäpägböö kä ˗aa ˗li a ˗lii ˈmö
Zoova ˗yi ˈsaa nɛnɩɛ ˗aa dɔˈwʋ. Ɔ slʋnɩɲɩ sɛɛ ˗a ˈkää ˈzʋ ˗aˈa dlɩpäsaa ˈkä ˈwlɩlɩ ˗wʋ, ˈn ˗a ˗kä ˗sɩbhä ˈzʋ a sɛ yɩ kää ˗aa ˗li a ˗lii ˈmö, ɔ slʋnɩɲɩˈɛ ˗sɩbhä. Zɛlɩ Proverbes 7:7-27 ˈmö. ˗N ˗käˈɛ ˗waa, ˈzʋ ˗lɛ VIDEO ˈn a nɩ yɩlɩ nimïyɩbhäkïbhï ˈlɛ yɔwʋ.
Sɛɛ ɲɛgbayuu ˈzʋ ɔ ˈn ɔ yi ɔ ˗mäpäpʋ ˈmö bhlinɩ ˈnɩ?—Yɩlɩ ˗mä Proverbes 7:8, 9 ˈmö.
Sɛɛ Proverbes 7:23, 26 gbää a dɔˈwʋ, sɛɛ ˗ɔɔzʋkälii a kii ˈwuë bhɛnɩ ɔ yɩ ˈkä ˗lizoku a ˗bɛ ˈyli ˈwälanɩ ˈnɩ? ˗Aˈa dlɩpäsaa ˗kä ˈkwädlɩ ˈwlɩlɩ ˗wʋ, ˗lizoku a ˗mii ˈnaa ˗kaɲɩ ɔ ghlɩ ˈnɩ?
˗Aˈa dlɩpäsaa ˗kä ˈwlɩlɩ ˗wʋʋ, sɛɛ yɩ ˗kaɲɩ ɔ kwänɩ ˗a ˈkä ˈkwädlɩkwädlɩnɩ a ˗bhölɩbhölɛ ghlɩ ˈnɩ?
Nɩkpa ˗mumuë pä dlɩ nɩɩ, sɛɛ Biblë gbää ɲɩbhɛlʋ ˗ɲɛ ˈŋlɔ ˈsɔ ˈkä sɛ pö a dɔˈwʋ ˈnɩɛ nɛnɩ, wa dɔˈwʋ Lagɔ ˗nɩɲɩɛ ˗waa. ˗Maa, Zoova ˗wawʋ ˈbhöönɩɛ ˈmö, ɔ yɩbhä nɩɩ nɩkpa ˈwuë nɩ ghlɩ ˈkwädlɩkwädlɩnɩ a ˗bhölɩbhölɛ. ˗A ˈkɔ dlɩ yɔwʋ nɛnɩ a dɔˈwʋ, ˗a kä ˗a ˈkä ˈɔ ˈpäpägböö ˗gänɩ. Zɛlɩ 1 Kolɛɛtɩ a ˗nʋa 6:9-11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Ɲɩbhɛlɩɩ ˗wa ˗ɲɛ wa ˈbhɩaɲɩbhɛlɩɩ pöä sɛ, ˈn ŋwlɩɩ ˗wa ˗ɲɛ wa ˈbhɩaŋwlɩɩ pöä sɛ, ˗sɩbhä a ˗lii a ˈyize mii ˈnɩ ɔ Lagɔ dlɩ yɔwʋ nɛnɩ ˗a?
˗A ˈkä Lagɔ dlɩ yɔwʋ nɛnɩ a dɔˈwʋ, ˗a nɩ ˗sɛ ˗lii a ˗bɛ kɛˈmö nzɩ ˗a ˈkä ˈmö zigbonɩ. ˗A ˗kä ˗sɩbhä ˈzʋ, yɩ nɛnɩ bhä ˗a? Zɛlɩ Psaume 19:8, 11 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Na dɔˈwʋ, Zoova ˈa ˈpäpägböö kä ɔ ˗aa ˗li a ˗lii ˈmö ˗a? ˗Yɩ kä ɔ ˈŋlɩ ˈnɩ?
Zoova kwänɩ nɩkpa a ˗bɛ wa ˈkä ˈɔ ˈpäpägböö ˗gänɩ. Zaa, ɔ bhɛnɩ ɔ ˗kamö kwänɩ.
NƖKPA ˗MUMUË LƐ NƖƖ: “Nɩkpa ˈsɔ ˗kä ˈyɩbhäyɩbhänɩ ˈn wa ˗kä sɛ pöö, yɩˈɩɛ ˗lu nʋ.”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
Ɲɩbhɛlʋ ˗ɲɛ ˈŋlɔ ˈsɔ ˈkä ˗lɛ ˗wʋ, yɩ ˗lɛ ˈɲɛɲɛlu a ˗mu Zoova ˈɲɛɛ ˗wa kwäkwänɩɛ.
ˈWʋligbanɩkïbhï
Wa ˗kä ˗ɔɔzʋkälii a kii ˈwuë nʋʋ, ˈsaa wa ga ɔ ˈnɩ?
ˈSaa ˗kaɲɩ ɔ kwänɩ ˗a ˈkä ˗ɔɔzʋkälii ˗gömö panɩ ˈnɩ?
˗A ˗kä Zoova ˈa ˈpäpägböö ˈklʋkpamö ˈzʋ, sɛɛ ˗a ˈkɩ ɔ ˗li a ˗lii ˈmö ghlɩnɩ ˈnɩ?
YILII YƆWƲ
˗Yɩ kää ˈŋlɩ ˈn Lagɔ yɩbhää nɩɩ ɲɩbhɛlʋ ˗ɲɛ ˈŋlɔ ˈsɔ ˗wa yɩbhää wa ˈkä yɔwʋ glɩglɩnɩ kää wa ˈkä ˗mä ˈkämanɩwaa ˈyila ˈklʋ kwäkwänɩ, ˈyi ˈylɩmö.
« Vivre en couple sans être mariés : Qu’en dit la Bible ? » (Ɛtɛnɛtɩ ˈklʋ a ˈcɩɛcɩɛkïbhë)
Biblë ˈcɩaɲɩ nɩɩ ɲɩbhɛlɩ ˈsɔ ˈkä kwäkwänɩ, ˈn ˈŋwlɩ ˈsɔ ˈkäˈɛ kwäkwänɩ, yɩ ˗ɲɛ Lagɔ ˈa ˈpäpägböö ˈsɔ ˈnɩɛ yɔwʋ mönɩ abhlɩ. ˗Maa, ˗aaa ˗kä ˗a ˈkʋa ˗gblɩ.
« L’homosexualité : est˗ce mal ? » (Ɛtɛnɛtɩ ˈklʋ a ˈcɩɛcɩɛkïbhë)
˗Ɔɔzʋkälii a wɛlɩɩ a dɔˈwʋ, sɛɛ Lagɔ ˈa ˈpäpägböö ˗kʋɲɩɛ ˈwʋ, ˈyi ˈylɩmö.
Nɩkpɛ ˗bhlʋ ˗ɔ ˗ɲɛ ˈɔ ˈbhɩaɲɩbhɛlɩɩ pö a˗a sɛɛ, ˈsaa ˈsunɔɔ ˗mä ˈn ɔ yiɛ ˈmö zigbonɩɩ, ˈyi ˈylɩmö.
« La Bible transforme des vies » (La Tour de Garde, 1er avril 2011)
a Ɲɩbhɛlɩ ˗wa ˗ɲɛ ŋwlɩ pöä sɛ ˈn wa zʋä ˈwa nuëa ˗mä wa zɛmö, ˈn ŋwlɩ ˗wa zʋmöˈɛ ˗sɩbhä, ˈn ˗wa ˗ɲɛ wa ˈbhɩa pöä sɛ ˗mä zoyio ˈwʋ, ˗wa ˈbhlinɩɛ wa ˈbhɩa zɛmö, ˗ɔɔzʋkälii a kii ˗mimii ˗yɩɩɛ Lagɔ dlɩ yɔwʋ nɛnɩ miɛ daˈa.