ˈCƖƐCƖƐKÏBHË 46
˗Yɩ kä ɔ ˈŋlɩ ˈn ˗a kä ɔ ˗a ˈkä ˗aɲɩ Lagɔ yowʋ ˈɲɛ ˈn ˗a ˈkä badizee ˈnɩ?
Nɩkpɛ ˗kä ˈɔ zɩkpa Lagɔ yowʋ ˈɲɛɛ, Lagɔ ˈmö ɔ bhibhee ˈn ɔ ɲɔɔ ˈdɩ nɩɩ ɔ ˈyize ˈmö ɔ ˈkää bʋbɔ ˈn ˈsaa ɔ yɩbhää ˈmö ɔ ˈkää ˈyuku ˈpïlanɩ ˗mä ɔ zɩkpaa ˈmö. (Psaume 40:8) Ɔ ˗kä ˗sɩbhä ˈzʋ ˈwë, bhla ˈn ɔ tɛlɩɛ sɛ wa ˈkɔ badizee ˗lɛ nɩkpabhë a ˈyila ˈklʋ, nzɩ ɔ ˈkä tula nɩɩ ɔ yɛ ˗tiamö ɔɲɩ Lagɔ yowʋ ˈɲɛ ˈwë. ˗A ˈkä ˗aɲɩ Zoova yowʋ ˈɲɛ glɩnɩ ˗lu a ˗mu kää teɲii dɛsɛ ˗mä ˗aˈa zɩkpa ˈmö. Zaa, ˈsaa ˗kaɲɩ ɔ ˗mä ˈsunɩ ˗a ˈkä ˗aɲɩ Zoova yowʋ ˈɲɛ ˗mä ˗aˈa zɩkpaa ˈmö ˈnɩ?
1. ˈSaa ˈsunɩ ɔ ˗mä nɩkpɛ ˈn ɔ ɲɛ bhä ɔɲɩ Lagɔ yowʋ ˈnɩ?
Zoova ˈa ˗wawʋ mu ˈsunɩɛ ˗mä nɩkpɛ ˈn ɔ ɲɔɔ ˗ɔɲɩ yowʋ. (1 Zaa 4:10, 19). Biblë lɛ nɩɩ: “Nza a kää a ˈkɔ ˗wa ˗mä ˈa dilaa ˈwuë zɛmö, ˗mä ˈa ˗bhölɩbhölɛɛ ˈwuë ˈmö, ˗mä ˈa dlɩpäsaa ˈwuë ˈmö, ˈn ˗mä ˈa ˈmötɛɛnɔɔ ˈwuë ˈmö.” (Maakö 12:30) ˗A nɩ tɩ ˈfʋ gbä nɩɩ ˗a ˗waa Lagɔ nʋʋ, ˗maa ˗a kä ˗a ˈkɩ tula ˗mä ˗aˈa bhïlawɛlɩɩ ˈmö ˈn ˗mä ˗aˈa nʋnʋlii ˈwuë ˈmö. Sɛɛ ɲɩbhɛlʋ ˗ɲɛ ˈŋlɔ ˈsɔ ˗käˈɛ ˈyɩbhäyɩbhänɩ ˈn wa kwäkwänɩˈɛ, saa ˗bhʋlʋ ˗kpɔ ˈla, ˗sɩbhä Zoova a ˗wawʋ ˈsunɩɲɩɛ ˗mä ˈn ˗a ɲɔɔ ˗aɲɩ yowʋ ˈn wa badizeaɲɩɛ.
2. Zoova a ˗nʋa ˗wa yɛɛ badizee ˈwë, sɛ ɔ pʋa ɔ ˈɲu ˈnɩ?
Nɩkpɛ ˗kä badizee ˈwë, Zoova ˈa ŋëyi ˈmö a ˗nɔ ɔ zʋä. Sɛɛ ɔ ˗kamöä ˈɔ ˗wawʋ ˈylimö tulanɩ ˈki a ˗bɛ ˈmö ˈn sɛ ˗n ˈkɔɔ teɲii yɔwʋ ˈdionɩɩ, ˗n yi ˈylɩmö. (Zɛlɩ Malachie 3:16-18 ˈmö.) ˈN ˈgämöˈɛ, Zoova mɔɔ ˈkää ˗na dɩba glɩnɩ ˈn ˗n yiˈɛ lagɔdaayuë a ˗bɛ ghlɩ, ˗wa ˗wʋä ˗mä bhlɩɩ ˈwuë ˗gömö ˈn ˗wa ˗wamöä. (Zɛlɩ Maakö 10:29, 30 ˈmö.) ˈLɩlɩlɩ a dɔˈwʋ, ˗n ˗kä ˗n ˈkä badizee, ˗lii a ˗bɛ mö ˗n kää ˗n ˈkä nʋ. ˗N kä ˗n ˈkä sɛ tɛlɩ ˗n ˈkä Zoova yɩbhlɩnɩ, ˗n ˈkɔ ˗waa, ˈn ˗n ˈkäˈɛ ɔ Yowli dlɩ ˈtɛɛnɩ. ˈN bhla, ˗n kä ˗n ˈkä Zoova ˗naˈa zɩkpaa ˈwuë yowʋ ˈɲɛ. ˗N ˗kä ˗li ˈla ˈwuë nʋ ˈn ˗n ˗kä badizee ˈwë, yɩbhlɩnɩ sɛ nɩɩ ˈkwädlɩkwädlɩnɩ a ˗bhölɩbhölɛ a ˈyioo mö ˗n ˗wʋä daˈa bhli dɔˈwʋ. Lagɔ ˈa wɛlɩɩ lɛ nɩɩ: ‘Batɛɛmo mɛɛ puëaɲɩɛ.’—1 Piɛlɩ 3:21
ˈCƖƐ ˗LII ˗MIMII
˗A ˈkä ˗aɲɩ Lagɔ yowʋ ˈɲɛ ˈn ˗a ˈkä badizee, ˗yɩ kää ˈŋlɩ ˈn yɩ kää dɛsɛ, ˗a nɩ ˈyi ˈylɩmö.
3. ˗A kä ˗a ˈkä bhʋlʋbhlʋ ˗mɔ ˗a ˈkää bʋbɔ ˗lɛ ˗sɛ
Bhlaˈmö a dɔˈwʋ, Yizlaɛlɩ a ˗nʋa ˗tɔnɩ a˗a nɩɩ wa bhɛnɩ wa ˈkä Zoova bʋbɔ ˈn wa ˈkäˈɛ ˈgämö ˈfʋ a ˗lagɔ Baalɩ bʋbɔ. Yɩ za, Zoova yiɛ Elii tiee, ˈɔ nɩkpɛ ɔ bhïlanɩɛ ˈmöö, nzɩ ɔ ˈkä ˈwa dlɩpäsazokwëa ˈmö zlɔmanɩ. Zɛlɩ 1 Rois 18:21 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa Yizlaɛlɩ a ˗nʋa kä ɔ wa ˈkä ˗lɛ ˗sɛ ˈnɩ?
Yizlaɛlɩ a ˗nʋa a saa, ˗a kä ˗a ˈkä ˗mɔ ˗a ˈkää bʋbɔ ˗lɛ ˗sɛ. Zɛlɩ Lwiikö 16:13 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Yɩ kä ɔ ˈŋlɩ ˈn ˗a ˈnɩ ɔ ˗kä ˗a ˈkä Zoova bʋbɔ ˈn ˗a ˈkäˈɛ ˈgämö ˗lu ˗mumuu bʋbɔ ˈnɩ?
Sɛ ˗a ˈkä ɔ Zoova ˈylimö tulanɩ nɩɩ ɔ ˈyize mö ˗a ˗sɛ ˗lɛ nzɩ ˗a ˈkɔ bʋbɔ ˈnɩ?
4. ˗A nɩ ˈpänɩ Zoova ˈa ˗wawʋ dlɩ kɛ
Zoova ɲɩaɲɩ ˗li a ˗lii a ˗bɛ ˗yɩ kää dɛsɛ. Zaa, ˈsaa ˗a bhɛnɩ ɔ ˗a ˈkɔˈɛ ˗abhlɩ ˈɲɛmö ˈnɩ? ˈZʋ ˗lɛ VIDEO.
Sɛɛ Zoova tulanɩɲɩ ɔ ˈylimö nɩɩ ɔ ˗waɲɩ ˈnɩ? Zɛlɩ Psaume 104:14, 15 ˈn 1 Zaa 4:9, 10 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Mä Zoova ˈa ˈɲɛɲɛlii ˈwuë glaˈmö, ˈɲɛɲɛlu a ˗mu zɩ ɔ ˗naˈa dlɩ kɛ ˈnɩ?
ˈƝɛɲɛli ˈla ˈwuë ˗n ˗kɩɩ dlɩ kɛ ˈpänɩɩ, ˈsaa yɩ nʋmö ɔ ˈwlu ˈnɩ?
Nɩkpɛ ˗kaɲɩ ˗lu ˈɲɛɛ, ˈn ˗lu ˈla ˗kaɲɩ teɲii dlɩ yɔwʋ nɛnɩɩ, ˗a yɩbhä ˗a ˈkɔ ˈylimö tulanɩ nɩɩ ˈsaa ɔ ɲɩaɲɩɛ ˗bhöɲɩ teɲii ˈmäna ˈwʋ. Zɛlɩ Deutéronome 16:17 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Lii ˈwuë Zoova nʋä ˗na zaa, ˗n ˗kɩɩ dlɩ kɛ ˈpänɩɩ, ˈsaa ˗n yɩbhä ɔ ˗n ˈkä nʋ ˈnɩ?
5. ˗A ˗kä ˗aɲɩ Lagɔ yowʋ ˈɲɛɛ, ˈɲupälɩ a ˗bɛ yɩ kää ˈmö
Nɩkpa ˗mumuë a ˗bɛ pä dlɩ nɩɩ wa ˗kä ˈŋlɩ möö, wa ˗kä libhoo ˈkɔdʋ nʋ ˈn wa ˗kä moni ˗kää, mii ˈkää gbä wa ˈkä ˈmäna ˈmö ˗wʋ. Mi ɔ ˗tiamö ˗a? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö a nɩkpɛɛ yɩbhä a˗a teɲii balɔɔ a ˈpäpʋ, ˗maa ˗yɩ kä ɔ ˈŋlɩ ˈn yi ɔ kɛˈmö ˗sɛ ˈnɩ?
Ɔˈɔɔ a ˈyɩbhä ɔ ˈkä balɔɔ ˈpä, ˈɔ zɩkpa ˈwuë ˈmö ɔ yɩbhää ɔ ˈkä Zoova yɔwʋ ˈɲɛ. ˗Na dɔˈwʋ, ˈsaa ɔ ˗sɛ ˗lɛ nɛnɩ bhä ˗a? ˗Yɩ kä ɔ ˈŋlɩ ˈnɩ?
Dɛɛ Zezwii a tietieɲɔ Pɔɔlʋ ˈnɩɛ a˗a ˗bhlɛ Klɩtɩɛyi ˈzʋ, ˗suku ˈkɔdʋ ɔ plɛ a˗a. Wʋ bhɛnɩ a˗a wʋ ˈkɔ nɩkpɛ ˈkɔdɔ ˈwʋ ˈzʋa. Maa, yɩ ˈwuë ˈmö ɔ panɩɛ ˗gömö ˈn ɔ yiɛ Klɩtɩɛyi ˈzʋ. ˈSaa Pɔɔlʋ ˗sɛ ˗lɛ a za, ɔ ligba ɔ bhla ˗a? Zɛlɩ Filiipö a ˗nʋa 3:8 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
ˈSaa Pɔɔlʋ nʋ a˗a ˈwë ˈn ɔ yiɛ bhla Klɩtɩɛyi ˈzʋ, ɔ lɛ nɩɩ “ɲɩasɛlii yɩ glɩnɩɛ,” ˈn “yɩ ˈkä ˗bhɩɛ ˈɲli.” ˗Yɩ kä ɔ ˈŋlɩ ˈn ɔ yi ɔ ˗sɩbhä gbä ˈnɩ?
˗Lɛ yɩ ˈbhle ˈmö, ˈsaa ɔ ghlɩ ɔ ˈnɩ?
˗Na dɔˈwʋ, ˈsaa ˈkä ɔ ˈŋlɩ ˗kä nɩkpɛ ˈkä ˈmäna ˈmö ˗wʋ ˗mä ˈɔ zɩkpa ˈmö: Zoova a ˗gänɩgänɛ ˈnɩɩ, maa ˗lu ˗mumuu bhä ˗a?
Pɔɔlʋ ˈzʋä Klɩtɩɛyii, ˈsaa ɔ ghlɩɛ ˗zu teɲii yɩ ˈkä ˗lii ɔ ˗sɛɛ kɛˈmö ˈwʋ zi.
NƖKPA ˗MUMUË LƐ NƖƖ: “Nɩkpɛ ˈkä ˈɔ zɩkpaa Lagɔ yowʋ ˈɲɛ ˈnɩɛ dɛsɛ ˗kä.”
˗Na dɔˈwʋ, nɩkpɛ ˗kä ɔɲɩ Lagɔ yowʋ ˈɲɛɛ, yɩ nɛnɩ bhä ˗a?
DƐSƐKÄKÏBHÏ
˗Wawʋ mʋʋ ˈsunɩɲɩɛ ˗mä ˈn ˗a ɲɛɛ ˗aɲɩ Zoova yowʋ, ˈn ˗a ŋluä ˈwʋ wa ˗kaɲɩ badizee.
ˈWʋligbanɩkïbhï
˗Yɩ kä ɔ ˈŋlɩ ˈn ˗a kä ɔ ˗a ˈkä teɲii Zoova ˗wa ˈn ˗a ˈkɔ ˗aˈa dlɩ ˈwuë ˈmö bʋbɔ ˈnɩ?
Zoova a ˗nʋa ˗wa ŋluä ˈwʋ ˈn wa yiɛ badizee, sɛ ɔ pʋa ɔ ˈɲu ˈnɩ?
˗N yɩbhä ɔ ˗n ˈkä ˗naɲɩ Zoova yowʋ ˈɲɛ ˗a?
YILII YƆWƲ
˗Yɩ kä ɔ ˈŋlɩ ˈn bhlɩbhlɩŋlɔ ˗bhlʋ ˗ɲɛ balɔpäɲɔ ˗bhlʋ ˈsɔ yi ɔ ˈwa zɩkpa Lagɔ yowʋ ˈɲɛ ˈnɩ?
Sɛɛ ˗dɩgbö yɩbhää waɲɩ nimï: Sɛ n ˈkä ɔ ˈna zɩkpaa ˗su ˈnɩ? ˈSaa ˈplɩɛ ˈwʋ (6:54)
˗Lii ˗mimii ˗yɩ kää ˈŋlɩ ˈn nɩkpɛ ɲɛɛ ɔɲɩ Lagɔ yowʋʋ, ˈyi ˈylɩmö.
« Pourquoi se vouer à Jéhovah ? » (La Tour de Garde, 15 janvier 2010)
˗Mä video ˈlɛ ˈmö, ˗wa ˈɲɛɛ waɲɩ Zoova yowʋ a sɛ wa kää ˈmäna dlɩ zɛmö, köbhɩɩ sasɛ ˈyli.
ˈSaa ˈsunɩɛ ˗mä ˈŋlɔ ˗bhlʋ ˈn ɔ yiɛ ˈsaa kää teɲii dɛsɛ ˗mä ˈɔ zɩkpaa ˈmö dlɩ kɛ ˈpänɩɩ, ˈyi ˈylɩmö. (biographie « Pendant des années, je me suis demandé pourquoi on existe »).
« La Bible transforme des vies » (La Tour de Garde, 1er novembre 2012)