ˈCƖƐCƖƐKÏBHË 47
˗N ˗bhɩɔ ɔ ˈmö ˗n ˈkä badizee ˗a?
˗Mä ˗naˈa Biblë a ˈcɩɛcɩʋ ˈmö, ˗n ˈcɩɛ ˗lii a ˗bɛ Zoova dɛ. ˗N ˗sɛ ˗kamä ˗mimii a ˗bɛ kɛˈmö ˗n ˈkä ˈsaa ˗n ˈcɩɛɛ ˗gänɩ. ˗Maa ˗lii ˗mimii a za ˗n ˈkä ˗naɲɩ Zoova yowʋ ˈɲɛ ˈn ˗n ˈkä ˈwʋ ŋlu wa ˗kamö badizee, yɩ ˈtɛɛnɩmö kamä kɛˈmö. ˗Lii ˗yɩ ˈtɛɛnɩɛ ˗mumuë kɛˈmö batɛɛmö a dɔˈwʋ, ˈn sɛ wa ˈkää ˈzʋ wa ˈkɩ ˈwlu ˈplɩ mö ˗a ˈkää ˈylɩmö ˗mä ˈcɩɛcɩɛkïbhï ˈlɛ ˈmö.
1. Nɩkpɛ kä bhä ɔ ˈkä Biblë ˈwuë ˗yi ˈwë nzɩ wa ˈkɔ badizee ˗a?
Nɩkpɛ a ˗mɔ yɩbhää ɔ ˈkä badizee, ‘Lagɔ ˈa ˗tiamö a wɛlɩɩ ˗yɩ glɩnɩɛ gbëaa a ˈyizee,’ ɔ kä ɔ ˈkɩ yɩbhlɩnɩ. (1 Timotee 2:4) Mii ˈnɩɛ zɛmö ˗sɛ nɩɩ nimïyɩbhäkïbhï ˈwuë a zɛmösɛna ˗yɩ ˗wʋä ˗mä Biblë ˈmöö, ˗n kä ˗n ˈkɩ ˗yi ˈwë, nzɩ wa ˗kamö bhla badizee. Klɩtɩɛwaa aˈbhï ˗wa yɛɛ badizee ˈwë ˗lɛ yɛ ˈmö gwälɛɛ, wa cɩɛ ˗bhlɛ Biblë ˈyize. (Kolɔɔsɩ a ˗nʋa 1:9, 10) ˗Maa Biblë ˈmö a tɛkäkïbhï ˗yɩ kää dɛsɛɛ, ˗n kä ˗n ˈkɩ sasɛ ˈmö ˈnʋ. Lagɔzɩkpa ˈmö a ˈyukugänɩwaa bhɛnɩ wa ˗kamö kwänɩ, wa ˈkɩ ˈylɩmö ˗n ˗kä sasɛ Biblë ˈmö a kïbhï ˈla ˈmö ˈnʋ a za.
2. ˗Ɔ yɩbhää wa ˈkɔ badizee, ˗lii a ˗mi ɔ ˈkä ɔ nʋ ˈnɩ?
Wa ˗kamö badizee a dɔˈwʋ, ‘ligba ˗n ˈkä ˗naˈa ˗lizokuu kɛˈmö ˗sɛ.’ (Zɛlɩ Nʋnʋlii 3:19 ˈmö.) Mii sɛɛ zɛmö nɩɩ, ˗n kä ˗n ˈkä ˗naˈa ˗lizokuu ˗n nʋä yɩbhlɩnɩ, ˈn ˈkä Zoova yɔwʋ bhibhe ɔ ˈkä yɩ gbʋ ˈyi ˈtatinɩ. ˗N käˈɛ ˗n ˈkä lagɔzɩkpa ˈmö a ˈwluyɩbhäyɩbhɩ ˈwʋ mö, ˈn ˗n ˈkä lagɔwɛlɩɩ biamö, wa ˗nɩmö ˗bhlɛ badizee aˈbhë ˗kë.
3. ˗Yɩ kä ɔ ˈŋlɩ ˈn ˗n ˈnɩ ɔ ˗kä ˗n ˈkä ŋänɩ ˈnɩ?
˗Mumuë ŋänɩ wa ŋänɩɛ, wa tɩa bhla sɛ wa gbä a˗a wa ˈkä Zoova ˗gänɩ ˈklʋkpamö ˗sɛ a za. Miɛ ˗tiamö, ˈtɛɲɩ ˗mɛmɛɛ ˈmö, ˗n bhɛnɩ ˗n ˈkä lizoku a nʋnwɛ ˈmö bhlinɩ. Bhlaˈmö a lagɔnɩkpaa, ˈŋwlɩ ˗ɲɛ ɲɩbhɛlɩ ˈsɔ, ˗sɩbhä a ˗lii ghlɩmuëë. ˗Maa, Zoova ˈnɩɛ gbä nɩɩ ˈɔ bʋbɔbʋbɔwaa nɩ ˗wʋ klɩpaa ɔ saa ˗kpö ˈwʋ. (Zɛlɩ Psaume 103:13, 14 ˈmö.) Zoova a dɔˈwʋ, ˗a ˗kä ˈyli yɔwʋ ˈtɛmanɩ ˈn ˗a ˗kä ˗li a ˗lii nʋ sɛ ˗a bhɛnɩɛ, ˈmäna ˈwʋ yɩ ˗bhoo. Ɔ ˗yimö kwänɩ. Ɔ ˈtɛmanɩɲɩ dlɩ ˈwʋ nɩɩ, ‘ˈɔ ˗wawʋ ˈkɔdʋ a za, ˗lu ˈnɩɛ bhɛnɩ wʋ ˗kaɲɩ ˗mä ɔ käˈmö ˗sɛ.’—Zɛlɩ Ghlɔɔmö a ˗nʋa 8:38, 39 ˈmö.
ˈCƖƐ ˗LII ˗MIMII
˗N ˗kä Zoova yɩbhlɩnɩ ˈn ˗n ˗kä ˈwʋ ŋlu ɔ ˗kamö kwänɩ, sɛɛ ˗n ˈkää ˗lii ˗yɩ ˈtɛɛnɩmöä kɛˈmö ˈwlu ˈplɩ batɛɛmö a dɔˈwʋ, ˗a nɩ ˈyi ˈylɩmö.
4. Tɛlɩ sɛ ˗n ˈkä sasɛ Zoova yɩbhlɩnɩ
Sɛɛ ˗n ˈkä ɔ Zoova yɩbhlɩnɩ ˈwë nzɩ wa ˗kamö bhla badizee ˈnɩ? ˗N kä ˗n ˈkɔ sasɛ yɩbhlɩnɩ nzɩ ˗n ˈkɔ ˗waa, ˈn ˗n ˈkä sɛ tɛlɩ ˗n ˈkɔ dlɩ yɔwʋ nɛnɩ ˈyize. ˈZʋ ˗lɛ VIDEO nzɩ bhlɩɩ ˈwuë ˗gömö a ˗nʋa ˗wa cɩɛɛ Biblë a sɛ wa ˈzʋä, ˗n ˈkɩ ˈylɩmö. ˈN a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö a ˗nʋa, ˈsaa kwänuë bhä ˈn wa yi ɔ waɲɩ ˈwlu gïganɩ ˈn wa yua bhä badizee ˈnɩ?
Zɛlɩ Ghlɔɔmö a ˗nʋa 12:2 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
ˈSaa Biblë ˈcɩaa a dɔˈwʋ, ˗n gʋgɔ ɔ ˈtikïyie ˈwʋ ˗a? Sɛˈɛ ˗n yɩbhä ɔ ˗kamä ˗naɲɩ nimï nɩɩ, ˈsaa Zoova a Bhlɩnɩwaa ˈcɩaa kä ɔ gbëaa ˈmö ˗a?
Nɩkpɛ ˗kä ˗sɩbhä dlɩ ˈpää, sɛɛ ˗n ˈkä ɔ ˈzʋ ˈnɩ?
5. ˗N bhɛnɩ ˗n ˈkä ˗yɩ ˈtɛɛnɩmöä kɛˈmö ˈwlu ˈplɩ
˗A ˗kä ˗aɲɩ Zoova yowʋ ˈɲɛ ˈn wa ˗kaɲɩ badizee ˈwëë, ˗lii a ˗bɛ ˗yɩ ˈtɛɛnɩɲɩɛ kɛˈmö mii ghlɩɲɩɛ. A ˈkä ˗mɔ ˗sɩbhä a ˗lii ghlɩɛ a wɛlɩɩ ˈylɩmö a dɔˈwʋ, ˈzʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö, ˗lii a ˗mi Nalajɛlɩ käa bhä ɔ ˈkä ˈwlu ˈplɩ nzɩ ɔ ˈkä Zoova a ˗nɔ ˈzʋ ˈnɩ?
Zoova a ˗wawʋ ɔ kää dlɩ zɛmö, sɛ wʋ kwänɔ bhä ˈn ɔ yi ɔ ˈsaa ˈtɛɛnɔɔ kɛˈmö ˈwlu ˈplɩ ˈnɩ?
Zɛlɩ Proverbes 29:25 ˈn 2 Timotee 1:7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa ɲɩaɲɩ ɔ ˈmötɛɛnɔ ˗a ˈkä ˗lii ˗yɩ ˈtɛɛnɩɲɩɛ kɛˈmö ˈwlu ˈplɩ ˈnɩ?
6. Kɩ dlɩ ˈwʋ nɩɩ Zoova ˗yimö kwänɩ
Zoova ˗yimö kwänɩ ˗n ˈkä ˈsaa nɛnɔɔ dlɩ yɔwʋ nʋ. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö, ˗ɔ cɩɛɛ Biblë ˈkä ˈwʋ ŋlu nzɩ wa ˈkɔ badizee a dɔˈwʋ, ˗yɩ kä ɔ ˈŋlɩ ˈn ɔ gʋgɔ ɔ ˈnɩ?
ˈSaa kwänɔɔ bhä ˈn sɛɛ ɔ ˈtɛɛnɩɛ Zoova dlɩ yi ɔ teɲii ˈmö ˈtumanɩ ˈnɩ?
Zɛlɩ Isaïe 41:10, 13 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Yɩ kä ɔ ˈŋlɩ ˈn ˗n bhɛnɩ ɔ ˗n ˈkɩ dlɩ ˈwʋ ˗kä nɩɩ, ˗n ˈɲɛɛ ˗naɲɩ Lagɔ yowʋ a sɛɛ ˗n gbää ˗n ˈkɔ ˗gänɩɩ, ˗n bhɛnɩ ˗n ˈkɩ ˗tiamö ˈklʋkpamö ˈzʋ?
7. Sɛɛ Zoova ˗waɲɩɛ teɲii a za, ˗a nɩ tula nɩɩ ˗a yɩbhlɩni
Sɛɛ Zoova tulanɩɲɩɛ ˈɔ ˗wawʋ ˈylimöö, ˗n ˗kɩɩ dlɩ kɛ ˈpänɩɩ, ˗n yo ˈkwädlɩ bhälɩ ˈyize, ˈn ˗n ˈkɔ ˈkwädlɩ bʋbɔ a ˈtʋ ˗yimö dlɩ zɛmö ˗wʋ ˈyize. Zɛlɩ Psaume 40:5 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈƝupälɩ Zoova ɲɩamöä, yɩ glaˈmö a ˗nɩ ˗mi zɩ ɔ teɲii ˗naˈa dlɩ kɛ ˈnɩ?
Lagɔnɩkpɛ Zelemii ˗wa a˗a teɲii Zoova ˗ɲɛ ˈɔ wɛlɩɩ ˈsɔ. ˈN sɛ ɔ kää Zoova ˈa ŋlɩɩ ˗gömöö, yɩ nɛnɔɔ a˗a teɲii dlɩ yɔwʋ. Ɔ lɛ nɩɩ: “˗Naˈa wɛlɩɩ, yɩ zʋʋ teɲii ˈmäna dlɩ zɛmö. Ɛˈɛ ˗bhö ɲɩasɛ, ˗maa ˗naˈa ŋlɩɩ ˈmö n ˗kää ˗gömö. ˈNa Lagɔ Zoova.” (Jérémie 15:16) A nɩ yɩlɩ nimïyɩbhäkïbhï ˈlɛ yɔwʋ:
Sɛɛ ˗a glɩnɩɛ Zoova a Bhlɩnɩwaa a glaˈmö a ˗nʋa, sɛ yɩ ˗lɛ ɔ ˗jɔlʋ ˈkɔdʋ ˈnɩ?
˗N yɩbhä ɔ wa ˗kamö badizee ˗n ˈkä Zoova a Bhlɩnɩɲɔ ˈzʋ ˗a?
ˈSaa ˈtɛɛnɩmö ɔ kɛˈmö ˈnɩ?
˗Na dɔˈwʋ, ˈsaa ˗n ˈkä ɔ nʋ nzɩ wa ˗kamö badizee ˈnɩ?
NƖKPA ˗MUMUË LƐ NƖƖ: “N ˈniɛ dlɩ ˈwʋ ˗kä nɩɩ n ˗kä badizee ˈwë, sɛ n gbä a˗a n ˈkä Lagɔ ˈa ˈpäpägböö ˗gänɩ ˈyize, n bhɛnɩ n ˈkɩ nʋ.”
˗Sɩbhä ˗n ˈpämö ɔ dlɩ ˗a?
DƐSƐKÄKÏBHÏ
Zoova bhɛnɩ ɔ ˗kamö kwänɩ ˗n ˈkä ˈsaa ˈtɛɛnɩmöä kɛˈmö ˈwlu ˈplɩ nzɩ wa ˗kamö badizee.
ˈWʋligbanɩkïbhï
˗Mä Biblë ˈmö a dɔˈwʋ, ˈsaa ˗n ˈkä ɔ ˗yi ˈwë nzɩ wa ˗kamö bhla badizee ˈnɩ?
˗Lii a ˗mi ˗n ˈkä ɔ kɛˈmö ˗sɛ ˈwë nzɩ wa ˗kamö bhla badizee ˈnɩ?
˗Yɩ kä ɔ ˈŋlɩ, ˈn ˗n ˈnɩ ɔ ˗kä ˗n ˈkä ŋänɩ ˈnɩ?
YILII YƆWƲ
ˈSaa ˗kamöä ˗mä ˈsunɩ nzɩ ˗n ˈkä ˈwʋ ŋlu wa ˗kamö badizee, ˈyi ˈylɩmö.
« Es˗tu prêt pour le baptême ? » (La Tour de Garde, mars 2020)
˗N ˈkä badizee a dɔˈwʋ ˗lii ˗yɩ ˈtɛɛnɩmöä kɛˈmö, sɛɛ ˗n ˈkɩɛ ˈwlu ˈplɩ, ˈyi ˈylɩmö.
« Qu’est˗ce qui m’empêche de me faire baptiser ? » (La Tour de Garde, mars 2019)
˗Lii ˗yɩ ˈtɛɛnɩ a˗a nɩkpɛ ˗bhlʋ kɛˈmö, sɛ ɔ ˈzʋä ˈn ɔ yiɛ ˈwlu ˈplɩ ˈn wa yoo badizee, ˈyi ˈylimö.
˗Yɩ kää ˈŋlɩ ˈn Ataa yiɛ gbä nɩɩ batɛɛmö a dɔˈwʋ, ɔˈɔɔ ˗kä ɔ ˈkä bʋanɩ, ˈyi ˈylɩmö.