˗Mä ˗lii ˈwuë ˈmö a dɔˈwʋ ˗a nɩ zlɔnɩ ˈmö

Nɩkpa ˈwuë yɩbhä nɩɩ, wa bhɛya nɩ glɩnɩ nɩkpa a ˗muë zlɔnɩɛ ˈmö. ˗Sɩbhä Zoova yɩbhäˈɛ nɩɩ ɔ bhɛya nɩ zlɔnɩ ˈmö. Mäˈä pɩwʋ nɩ ˈlɛ ˈwʋ, sɛɛ nɩkpa a ˗bɛ ˈnɩɛ ˈmö zlɔnɩ a za, ˗lii ˈmö yɩ ˈtɛɛ teɲii. ˗Mä ˗lii ˈwuë ˈmöö, ˗a ˗kä ˈmö zlɔnɩɩ, ˗li a ˗lii a ˗mi ˗a ˈkɩ ɔ ˈmö ghlɩnɩ ˈnɩ?

1. ˗A ˗kä ˈmö zlɔnɩɩ, ˗yɩ kä ɔ ˈŋlɩ ˈn yɩ kä ɔ teɲii dɛsɛ ˈnɩ?

˗A ˗kä ˈmö zlɔnɩɩ, Zoova mö ˗a tulanɩɛ ˈylimö nɩɩ ˗a ˗wɔɔ ˈn ˗a kä ɔ ˈklʋkpa. ˈPänɩɛ ˗ka ˈkïbhë ˈlɛ dlɩ kɛ: Zoova ˗yi ˗aˈa dlɩpäsaa ˈn ˗lii ˈwuë ˗a nʋä. ˗A ˗kä ˈmö zlɔnɩɩ, ɔ yɩlii ˈwʋ ˈn yɩ zo ˈmäna dlɩ zɛmö. ˈƆ wɛlɩɩ lɛ nɩɩ: “Zoova ˈnɩɛ nɩkpɛ a ˗mɔ kää yio ˗wa. ˗Maa, nɩkpɛ a ˗mɔ zlɔnɩɛ ˈmö mɔɔ zʋä ɔ bheyi.”—Proverbes 3:32.

2. Sɛɛ ˗a ˈkä ɔ ˈkwädlɩ ˈmö zlɔnɩ ˗mä ˗aˈa zɩkpa ˈmö ˈnɩ?

Zoova yɩbhä nɩɩ “˗a nɩ ˈɲɛɲɛnɩ gbëaa.” (Zacharie 8:16, 17) Sɛ yɩ sɛ ɔ zɛmö ˈnɩ? ˗A ˗ɲɛ ˗aˈa ˈligbë ˈmö a ˗nʋa ˈsɔ ˗kä ˈdɩ ˗sɛ dɔˈwʋ ˗wʋʋ, ˗aˈa libho ˈmö a ˗nʋa ˈn ˗aa lagɔdaayuë, ˗a nɩ tɩ yio plɛ. ˗A nɩ tɩˈɛ bhlɩɩ ˈmö a ˈkämanɩwaa yiotɩtɩɩ ˈɲɛ. Nɩkpɛ a ˗mɔ zlɔnɩɛ ˈmöö, ɔˈɔ ghli ˈwi, ɔˈɔ nʋˈɛ nɩkpɛ ylʋ. (Zɛlɩ Proverbes 24:28 ˈn Ɛfɛɛzɩ a ˗nʋa 4:28 ˈmö.) Nɩkpɛ a ˗mɔ zlɔnɩɛ ˈmöö, ɔ käˈɛ ɔ ˈkä lapoo ˈpɛnɩ. (Ghlɔɔmö a ˗nʋa 13:5-7) ˗Lii ˈwuë ˈmö a dɔˈwʋ, sɛɛ nɛnɩɛ Lagɔ dlɩ yɔwʋʋ, mö ‘˗a nɩ tɛlɩ ˈkwädlɩ sɛ nzɩ ˗a ˈkä ˗sɩbhä nɛmö.’—Ebleewaa 13:18.

3. ˗A ˗kä ˈmö zlɔnɩɩ, ˗li a ˗lii a ˗mi ˗a ˈkɩ ɔ ˈmö ghlɩnɩ ˈnɩ?

˗A ˗kä nɩkpa a ˗muë zlɔnɩɛ ˈmö glɩnɩɩ, wa ˗yiɲɩ dlɩ ˈtɛɛnɩ. Yɩ yiˈɛ gbä ˗a ˗ɲɛ lagɔzɩkpa ˈmö a ˗nʋa ˈsɔ, ˗a yi dlɩ ˈtɛɛnɩtɛɛnɩ ˈn ˗a yi teɲii ˗wawanɩ ˈligbë ˗bhlʋ ˈmö a ˗nʋa a sɛ. ˗A ˗kä ˗sɩbhä ˈzʋ, ˗aˈa ˈmlɩwʋnuëyii ˈnaa ˗kaɲɩ gbʋ köbha. ˗A ˗kä ˈmö zlɔnɩɩ, yɩ bhɛnɩˈɛ yɩ ˈkä ˈŋlɩ ˗kä ‘˗aa Puëɲɔ Lagɔ a wɛlɩɩ ˈkä ˈklʋkpamö ˗kä,’ ˈn yɩ yiˈɛ ˗mumuë ˗mä ˈsunɩ wa ˈkä ɔ ˗nʋa ˈzʋ.—Tiitɩ 2:10.

ˈCƖƐ ˗LII ˗MIMII

4. ˈMözlɔnɩzlɔnɛ ˗lɛ ˗lu a ˗mu nɛnɩɛ Zoova dlɩ yɔwʋ

Zɛlɩ Psaume 44:21 ˈn Malachie 3:16 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:

• ˗Yɩ kä ɔ ˈŋlɩ ˈn ˗a ˈnɩ ɔ ˗kä ˗a ˈkä dlɩ ˈpä nɩɩ ˗a bhɛnɩ ˗a ˈkä wɛlɩɩ a ˗mi kää gbëaa ˈmö ˈwʋ ziza ˈnɩ?

• ˗Na dɔˈwʋ, ˗lu ˗yiɲɩ kɛˈmö ˈtɛɛnɩ ˗kë, ˗a ˗kä gbëaa bhïla, ˈsaa yɩ nʋ ɔ Zoova ˈwlu ˈnɩ?

5. ˗A nɩ nʋ ˈkwädlɩ ˈmözlɔnɩlii ˈtɛɲɩ ˈwuë ˈmö

VIDEO: ˈSaa ˗kamö ɔ ˈmäna dlɩ zɛmö ˈzʋ ˈnɩ?: ˗Naˈa ˈmlɩwʋnuëyi nɩ ˗tɩmö gbʋ köbha (2:32)

Zɛlɩ Ebleewaa 13:18 ˈmö, ˈn a nɩ yɩlɩ kïbhë ˈlɛ yɔwʋ. Sɛɛ ˗a ˈkää ˈmö zlɔnɩ...

• ˗mä ˗aˈa ˈligbë ˈmö.

• ˗mä libho ˈmö, ɛ ˗käˈɛ ˗mä ˗suku ˈmö.

• ˈn ˗mä ˗lii ˗mimii ˈmö.

6. ˗A ˗kä ˈmö zlɔnɩ yɩ kä ˗aa ˗li a ˗lii ˈmö

˗A bhɛnɩ ˗a ˈkä dlɩ ˈpä nɩɩ ˗a ˗kä ˈmö zlɔnɩɩ, yɩ bhɛnɩ yɩ ˗kaɲɩ wɛlɩɩ ˈwʋ jlinɩ. Maa ˈlɩlɩlɩ a dɔˈwʋ, ɛˈɛ ˗bhö mii. ˗A ˗kä ˈmö zlɔnɩ mii glɩnɩɛ ˗li a ˗lii. Zɛlɩ Psaume 34:12-16 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:

• ˗N ˗kä ˈmö zlɔnɩɩ, sɛɛ yɩ bhɛnɩ ɔ yɩ ˈkä ˗naˈa zɩkpa nɛnɩmanɩ ˈnɩ?

1. ˗Wa yɛɛ kwäkwänɩ ˈwë ˗kä ˈmö zlɔnɩ, wa yi teɲii ˗wanɩ ˈyize.

2. Libhonʋwa a ˗muë zlɔnɩɛ ˈmöö, ˈmö wa ˈbidɩbawa ˈtɛɛnɩɛ dlɩ.

3. Nɩkpa ˗wa zlɔnɩɛ ˈmöö, ˈmö bhlɩɩ ˈmö a ˈkämanɩwaa yɩbhää.

DƐSƐKÄKÏBHÏ

Zoova yɩbhä nɩɩ ɔ bhɛya nɩ zlɔnɩ ˈmöö, ˗mä ˈwa bhïlawɛlɩɩ ˈwuë ˈmöö, ˈn ˗mä ˈwa nʋnʋlii ˈwuë ˈmö.

ˈWʋligbanɩkïbhï

• Kii ˗mi ˈmö ˗a ˈkä ɔ ˈmö zlɔnɩ ˈnɩ?

• ˗Yɩ kä ɔ ˈŋlɩ ˈn ˗a ˈnɩ ɔ ˗kä ˗a ˈkä dlɩ ˈpä nɩɩ ˗a bhɛnɩ ˗a ˈkä wɛlɩɩ a ˗mi kää gbëaa ˈmö ˈwʋ ziza ˈnɩ?

• ˗Yɩ kä ɔ ˈŋlɩ ˈn ˗a yɩbhä ɔ ˗a ˈkä ˈmö zlɔnɩ ˈtɛɲɩ ˈwuë ˈmö ˈnɩ?

YILII YƆWƲ

Sɛɛ ˈyuëlowluwaa bhɛnɩ ɔ wa ˈkä ˈwa yuëa ˈcɩa wa ˈkä ˈmö zlɔnɩ ˈnɩ?

Bhïla gbëaa (1:44)

˗Lii ˗a gbää ˗a ˈkä nʋʋ, ˗a ˗kɩɩ ˗tiamö nʋʋ, ˗yɩ kä ɔ ˈŋlɩ ˈn yɩ nɛnɩ ɔ ˈnɩ?

˗A ˗kä ˈsaa ˗a gbää ˗a ˈkä nʋʋ ˈklʋkpamö ˈzʋʋ, ˗yɩ kä ˗aa ˗li a ˗lii ˈmö (9:09)

ˈN ˈkämanɩwaa ˈnɩ lapoomoni ˗lu a ˗lu ˈwʋ nʋ aˈbhë ˗kë, ˗yɩ kää ˈŋlɩ ˈn ˗a kää ˗a ˈkä lapoo ˈpɛnɩ, ˈyi ˈylɩmö.

« Faut˗il payer ses impôts ? » (La Tour de Garde, 1er septembre 2011)

Nɩkpɛ ˗bhlʋ ˗ɔɔɔ a ˈmö zlɔnɩɩ, ˈsaa ˈsunɔ bhä ˗mä ˈn ɔ yi ɔ ˈmö zigbonɩ ˈn ɔ yi ɔ nɩkpɛ a ˗mö zlɔnɩɛ ˈmö ˈzʋ ˈnɩ?

« J’ai découvert la miséricorde et le pardon de Jéhovah » (La Tour de Garde, 1er mai 2015)