ˈCƖƐCƖƐKÏBHË 48
˗A nɩ ˗sɛ ˗lɛ ˗aa bhɛya ˈnɛɛnɩsɛ
˗A nɩ ˈlibhï ˈtɛɲɩ ˈwʋ ˗a ˗ɲɛ ˗aa bhɛya ˈsɔ ˈkä ˈbhli. ˈN ˗a ˗kä ˈki ˈmö ˗wʋ wa ˗yiɲɩ swɩ ɲɛmʋ ˈmö ˈpä. ˗Maa Biblë lɛ nɩɩ nɩkpa ˗mumuë ˈnɩɛ bhɛya a ˗nʋa a ˗nʋa glɩnɩ. Zaa sɛ ˗a ˈkä ɔ bhɛya a ˗nʋa a ˗nʋa ˗lɛ ˗sɛ ˈnɩ? Yɩ wɛlɩɩ mö ˗a ˈkää ˈylɩmö, ˗mä ˈcɩɛcɩɛkïbhëa ˈlɛ ˈmö.
1. ˗Aa bhɛya ˗a sɛɛ ˗lɛ ˈsaa wa nʋɲɩ ɔ ˈwlu ˈnɩ?
˗Muë ˗a ˗ɲɛ ˗bhlinɩɛ ˈwʋ ˈtɛɲɩ ˈwuë ˈmö, ˈwa ˈzʋzʋsaa bhɛnɩ a ˗kaɲɩ ˈplɩnɩ. Yɩ bhɛnɩ yɩ ˗kaɲɩ ˗li a ˗lii ˈwlu nʋ, ˈn yɩ bhɛnɩˈɛ yɩ ˗kaɲɩ ˗lizoku ˈwlu nʋ. Saa ˗bhlʋ ˗kpɔ ˈla, ˗sɩbhä yɩ ˗wʋˈɛ ˗muë ˗a ˗ɲɛ sɛɛ ˈdɩ ˗mä ɛtɛnɛtɩ ˈklʋ a dɔˈwʋ. Biblë lɛ nɩɩ: “˗Ɔ ˗ɲɛ ˈnɛɛnɩɲɔ ˗kä ˈwʋ ˗bhlinɩɩ, ˈnɛɛnɩɲɔ ɔ ˈkää ˈzʋ. ˗Maa ˗ɔ ˗ɲɛ ˗ɔɔˈnɛɛnɩɲɔ ˗kä ˈwʋ ˗bhlinɩɩ, ˗lizokuu ˈkɔɔ ghlɩ.” (Proverbes 13:20) ˗Aa bhɛya ˗kä nɩkpa a ˗muë ˗waa Zoova glɩnɩ, wa bhɛnɩ wa ˗kaɲɩ kwänɩ ˗a ˗ɲɔɔ ˈkä ˈwʋ ˗wʋnɩ, ˈn ˗a ˈkäˈɛ ˈnɛɛnɩsɛ ˗li a ˗lii ˗lɛ ˗sɛ. ˗Maa ˗aa bhɛya ˈnɩ Zoova ˗waa, wa bhɛnɩ wa ˗kaɲɩ ˗mä ˈsunɩ ˗a ˈkä Zoova gwë ˈdionɩ. Nza Biblë zʋʋɲɩɛ ˈdɩ ˈmö nɩɩ, ˗a nɩ ˗sɛ ˗lɛ ˗aa bhɛya ˈnɛɛnɩsɛ! ˗Aa bhɛya ˗kä nɩkpa a ˗muë ˗wa Lagɔ glɩnɩɩ, yɩ yi ˗aa ˗li a ˗lii ˈmö ˗kä ˈn yɩ yiˈɛ wa ˗li a ˗lii ˈmö ˗kä. ˗A bhɛnɩ ˗a ˈkä ‘swɩ ɲɛmʋ ˈmö ˈpäpänɩ ˗aˈa dlɩˈwʋkänɔɔ ˈkäa ɲɔnʋ.’—1 Tesaloniikö a ˗nʋa 5:11.
2. ˗Aa bhɛya ˗a sɛɛ ˗lɛ a dɔˈwʋ, ˈsaa yɩ nʋ ɔ Zoova ˈwlu ˈnɩ?
Zoova, sasɛ ɔ sɛɛ ˗lɛ ˈɔ bhɛya. “Nɩkpa a ˗muë zlɔnɩɛ ˈmö mʋa zʋä ɔ bhɛya.” (Proverbes 3:32) ˗A ˗kä bhɛya a ˗muë ˈnɩɛ Zoova ˗waa ˗lɛ ˗sɛ, ˈsaa yɩ ˈkɔ ɔ ˈwlu nʋ ˈnɩ? Yɩ bhɛnɩ yɩ ˈkɔ teɲii swɩ yɔwʋ ˈkuanɩ. (Zɛlɩ Zaakö 4:4 ˈmö.) Nɩkpa ˗wa ˈnɩɛ Zoova a bʋbɔbʋbɔwaa glɩnɩ, ˗a ˗ɲʋa ˈnɩ ˈwʋ ˗bhlɩɩ, ˗a ˗kä Zoova yɔwʋ ˈdionɩɩ ˈn ˗a ˗käˈɛ ˗muë ˗waa Zoova yɔwʋ ˈdionɩɩ, yɩ yo ˈmäna dlɩ zɛmö ˈzʋ. ˈN ˗a yiˈɛ ɔ bhɛya ˈzʋ.—Psaume 15:1-4.
ˈCƖƐ ˗LII ˗MIMII
˗Yɩ kää ˈŋlɩ ˈn ˗a ˈkä bhɛya a ˗nʋa a ˗nʋa ˗lɛ ˗sɛ kää teɲii dɛsɛ, ˈn sɛɛ ˗a ˈkää ˈzʋ ˗a ˈkä ˗sɩbhä a bhɛya glɩnɩ, ˗a nɩ ˈyi ˈylɩmö.
3. ˗A nɩ ˈnɛmanɩ nɩkpazoku a ˈwʋ˗bhlinɩbhlinɛ ˈwʋ
Wa ˗kä nɩkpazoku nʋʋ, nɩkpa a ˗muë ˈnɩɛ Lagɔ ˗ɲɛ ˈɔ gböö ˈsɔ ˗waa, ˈmö wa gaa. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗A ˈnɩ ˗aɲɩ ˈwʋ ˈnɛɛnɩ, ˗a bhɛnɩ ˗a ˈkä nɩkpazoku a ˈwʋ˗bhlinɩbhlinɛ tɛɛ. ˈN ˈsaa yɩ ˈkä ɔ ˈyli ˈwälanɩ ˈnɩ?
Zɛlɩ 1 Kolɛɛtɩ a ˗nʋa 15:33 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
˗Na dɔˈwʋ, sɛɛ ˗a bhɛnɩ ɔ ˗a ˈkä ˈpäpägba ˈlɛ ˗gänɩ ˗mä ˗aˈa zɩkpa ˈmö ˈnɩ?
Zɛlɩ Psaume 119:63 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Nɩkpa a ˗muë kä ɔ wa ˈkä ˗aa bhɛya glɩnɩ ˈnɩ?
Pɔmöbhë a ˗ma zɛɛ, ˗a bhɛnɩ ˗a ˈkä ˗miˈla ˈwuë ɲima. ˈSaa bheyizokwë bhɛnɩ bhä ɔ ˗kamö ˈwlu nʋ ˈnɩ?
4. Nɩkpa ˗a ˗ɲɛ ˈnɩɛ ˈmö mlɩnɩ bhɛnɩ wa ˈkä ˗aa bhɛya a ˗nʋa a ˗nʋa ˈzʋ
Yizlaɛlɩ a nɩkpa ˈsɔ ˗wa glɩnɩ a˗a bhɛya ˈkädɩ, Biblë bhïla wa wɛlɩɩ. Zonata ˗ɲɛ Daviidɩ ˈsɔ mʋa. Zonata ˈa ˈylʋbö ˗zu a˗a teɲii yɩ ˈkä Daviidɩ a ˗nɩɩ ˈwʋ zi, ˈn ɔ ˗lɛ a˗a ˈbhlɩlowli a ˈyu. ˗Maa, ɔ ˗ɲɛ Daviidɩ ˈsɔ, bhɛya a ˗muë ˗wawanɩ a˗a teɲii ˈmö wa glɩnɩ a˗a. Zɛlɩ 1 Samuel 18:1 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Muë ˗a ˗ɲɛ ˗gbɔ ˈylʋbö ˈwʋ, mʋa ˈkä ɔ klɩpaa ˗aa bhɛya glɩnɩ ˗a? Wa kä ɔ wa ˈkä klɩpaa lɩkäwa, ɛ ˗kaˈɛ ˈpʋäwa glɩnɩ ˗a?
Zɛlɩ Ghlɔɔmö a ˗nʋa 1:11, 12 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ bhɛya a ˗muë ˗waa Zoova bhɛnɩ ɔ wa ˈkä swɩ ɲɛmʋ ˈmö ˈpäpänɩ ˈnɩ?
˗Mä video ˈlɛ ˈmö, sɛɛ ɲɩbhɛlʋdaayu ˗bhlʋ ghlɩɛ bhɛya a ˗muë ɔˈɔɔ a ˈwʋ dlɩ ˈpä, a nɩ ˈyi ˈylɩmö. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
Akilɩ a ˈtuawa ɔ ˗ɲɛ ˗bhlinɩɛ ˈwʋ ˗mä ˗suku ˈmö a za, ˗yɩ kä ɔ ˈŋlɩ ˈn ɔ ˗lowluwa ŋänɩ ɔ ˈnɩ?
˗Lu a ˗mu ˈsunɩ ɔ ˗mä Akilɩ ˈn ɔ yi ɔ wa ˈwʋ˗bhlinɩbhlinɛ tɛɛ ˈnɩ?
Sɛɛ ɔˈɔɔ ˈwʋ˗bhlinɩɲɔ ˗kä a dlɩpänɔɔ, sɛɛ ɔ zʋ ɔ ˈn ɔ yu ɔ ˈwlu ˈplɩ ˈnɩ?
5. Sɛɛ ˗a ˈkää bhɛya a ˗nʋa a ˗nʋa glɩnɩ
Sɛɛ ˗a ˈkää ˈzʋ ˗a ˈkä bhɛya a ˗nʋa a ˗nʋa ghlɩ, ˈn ˗a ˈkäˈɛ aˈbhï bhɛya a ˗nʋa a ˗nʋa glɩnɩɩ, ˗a nɩ ˈyi ˈylɩmö. ˈZʋ ˗lɛ VIDEO.
Zɛlɩ Proverbes 18:24 ˈn 27:17 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ ˗tiamö a bhɛya kwänɩkwänɩ ɔ ˈnɩ?
Bheyii ˗ɔɲɩ wɛlɩɩ wa bhïla ˗mä gbɛlɩ ˈlɛ ˈmö, ˗n kä ɔ ˗sɩbhä a ˗nɔ ˗a? ˗N ˈnɩ ˗sɩbhä a ˗nɔ ˗kää, sɛɛ ˗n ˈkä ɔ ˈzʋ nzɩ ˗n ˈkɔ ghlɩ ˈnɩ?
Zɛlɩ Filiipö a ˗nʋa 2:4 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗A ˈkä bhɛya a ˗nʋa a ˗nʋa ghlɩ a dɔˈwʋ, ˗aˈbhï ˗a nɩ glɩnɩ bhɛya a ˗nʋa a ˗nʋa. Sɛɛ ˗a ˈkä ɔ ˈzʋ ˈnɩ?
˗A ˈkä bhɛya a ˗nʋa a ˗nʋa ˗kä a dɔˈwʋ, ˗aɲɩgäsɛ ˗a kä ˗a ˈkä bhɛya a ˗nʋa a ˗nʋa glɩnɩ.
NƖKPA ˗MUMUË LƐ NƖƖ: “˗N ˗kä bheyi ˗kää, sɛ ɔ yi ˗wʋ aˈbhë ˗kë, yɩ nɛnɩ yɩ ˈkä ˗n ˈnɩ bheyi ˗kä ˈwʋ zi.”
Sɛɛ ˗n ˈkä ɔ gbä ˈnɩ?
DƐSƐKÄKÏBHÏ
˗A ˗kä ˗aa bhɛya ˈnɛɛnɩsɛ ˗lɛ ˗sɛ, yɩ yi Zoova dlɩ yɔwʋ nɛnɩ ˈn ˗a yi ˗li a ˗lii ˈmö ghlɩnɩ.
ˈWʋligbanɩkïbhï
˗Yɩ kä ɔ ˈŋlɩ ˈn sɛ ˗a sɛɛ ˗lɛ ˗aˈa bhɛya kä ɔ dɛsɛ Zoova a ˈyila ˈklʋ ˈnɩ?
Nɩkpa a ˗muë ˗a ˈnɩ ɔ ˗kä ˗a ˈkä ˗lɛ ˗sɛ wa ˈkä ˗aa bhɛya ˈzʋ ˈnɩ?
Sɛɛ ˗a ˈkä ɔ ˈzʋ nzɩ nɩkpa a ˗muë zlɔnɩɛ ˈmö ˈkä ɔ ˗aa bhɛya ˈzʋ ˈnɩ?
YILII YƆWƲ
˗A ˗kä ˈki ˈmö ˗wʋʋ, sɛɛ bhɛya a ˗nʋa a ˗nʋa bhɛnɩɛ wa ˗kaɲɩ kwänɩɩ, ˈyi ˈylɩmö.
« Noue des amitiés solides avant que la fin arrive » (La Tour de Garde, novembre 2019)
Sɛɛ ˗n ˈkää ˈzʋ ˗n ˈkä bhɛya a ˗nʋa a ˗nʋa ghlɩɩ, ˈyi ˈylɩmö.
« Comment choisir mes amis ? » (Les jeunes s’interrogent. Réponses pratiques [volume 1], chapitre 8)
Ɛtɛnɛtɩ ˈklʋ a bhɛya a dɔˈwʋ, ˈsaa ˗a kä ɔ ˗a ˈkä ˗yi ˈnɩ?
Nɩkpɛ ˗bhlʋ ˗ɔ ˈtɛmanɩɛ ˈyli yɔwʋ ˈn ɔ yiɛ ɔ bhɛya ˗ɲɛ ˗bhlinɩ a˗a ˈwʋ ˈbɩwʋ ˈbhöö a wɛlɩɩ, (biographie « J’avais tant besoin d’un père ! »)
« La Bible transforme des vies » (La Tour de Garde, 1er avril 2012)