ˈCƖƐCƖƐKÏBHË 59
Wa ˗yimö ˗gblɩ aˈbhë ˗kë, ˗n bhɛnɩ ˗n ˈkä Lagɔ ˗gänɩ ˈyize
˗A ˗yi sɛ nɩɩ Klɩtɩɛwaa ˈwuë, wa yua ˈylɩ ˗bhlʋ ˈmö ˈklɩ ˈyɩa ˈn wa yua teɲii ˗gblɩ. Yɩ za, ˗a kä ɔ ˗a ˈkä ŋänɩ ˗a?
1. ˗Yɩ kä ɔ ˈŋlɩ ˈn ˗a ˗yi ɔ sɛ nɩɩ wa ˗yiɲɩ ˈklɩ ˈyɩa ˈnɩ?
Biblë ɲɩaɲɩ gbëaa ˈdɩ nɩɩ: “Nɩkpa ˈwuë ˗wa ˗glɛɛ Zezwii Kliisɩ ˈwʋ, ˗wa yɩbhää wa ˈkä lagɔsɛ nɛmöö, ˈzwɩ wa ˈkʋää zia ˈyize.” (2 Timotee 3:12) Nɩkpa a ˗bɛ mʋa ˗gblɩ a˗a teɲii Zezwii. Ɛˈɛ ˗bhö ɲɩasɛ, ˗maa ɔˈɔɔ Sataa ˈa pɩwʋ ˈlɛ ˈmö a ˗nɔ glɩnɩ a za˗a. ˗Sɩbhä ˗aaa mäˈä ˈpɩwʋ a ˈyize a ˗nʋa glɩnɩ, nza ˈkämanɩwaa ˗ɲɛ lagɔgligbï a ˈkifiea ˈsɔ ˗kaɲɩ ˈklɩ ˈyɩa, yɩ ˗nɩɲɩɛ ŋli yɩa.—Zaa 15:18, 19.
2. Sɛɛ ˗a ˈkä ɔ ˗bhlɛ ˈzʋ ˈklɩyɩyɛ ˗ɛ ˗kaɲɩɛ bhla ghlɩ a za?
˗A kä ˗a ˈkä ˗bhlɛ zɩˈɛ ˗aˈa Lagɔ a dlɩtɛɛnɩtɛnɛ ˈmö ˈtumanɩ. ˗A nɩ bhibhe zila ˈwuë ˈmö Lagɔ, ˈn ˗a nɩ ˈlibhï ˈtɛɲɩ ˈwʋ nzɩ ˗a ˈkä ˈɔ wɛlɩɩ ˈmö zɛlɩ. ˗A nɩ möˈɛ ˈkwädlɩ ˈwluyɩbhäyɩbhɩ ˈwʋ. ˗A ˗kä ˗sɩbhä ˈzʋ, yɩ ˗yiɲɩ kwänɩ ˈn ˗a yi ˈklɩyɩyɛ a kii ˈwuë ˈwlu ˈplɩ, ɛ yi ˗aˈa ˗kosu yɔwʋ ˗a ˗nʋa ˈmö ˈbhöönɩ aˈbhë ˗kë. Zezwii a tietieɲɔ Pɔɔlʋ wa ˗gblɩ a˗a zila ˈwuë ˈmö, sɛˈɛ ɔ ˈcɛlɩɛ nɩɩ: “˗Alowli Lagɔ, mɔɔ na ˈwʋyiɲɔɔ. [...] Zaa, ˈna dlɩ su ˗mä ˈn n nɛmöä.”—Ebleewaa 13:6.
˗A ˗kä ˈkwädlɩ lagɔwɛlɩɩ biaa, yɩ bhɛnɩˈɛ yɩ ˗kaɲɩ kwänɩ ˗a ˈkä teɲii ˈyli yɔwʋ ˈtɛɛ. Lagɔwɛlɩbiabiu kä ˈŋlɩ ˈn ˗a ˈtɛɛnɩɛ Zoova dlɩ, wʋ käˈɛ ˈŋlɩ ˈn ˗a plɩɛ nɩkpa a ŋanɔ ˈwlu. (Proverbes 29:25) Zaa, ˗a ˗kä ˗bhlɛ zɩˈɛ ˈyli yɔwʋ ˈtɛmanɩ ˈn ˗a ˗kä lagɔwɛlɩɩ biaa, ˗zlɩ ˈkämanɩwaa ˗kä nɩɩ ˗a nɩ ˈnigba ˗aˈa lagɔwɛlɩbialibhoo, swɩ ˈnaa ˗kaɲɩ yɔwʋ ˈkunɩ, ˗a ˈnaa ˈkäˈɛ ŋänɩ. ˈN ˗a yi ˈyliyɔwʋtɛɛnɩsɛ ˗aˈa lagɔwɛlɩbialibhoo nʋ ˈyize.—1 Tesaloniikö a ˗nʋa 2:2.
3. ˗Mä ˈklɩyɩyɛ ˈmö ˗a ˈnɩ Zoova ˈbɩwʋ ˈbhöö, sɛ yɩ kä ɔ ˗aa ˗li a ˗lii ˈmö ˈnɩ?
ˈLɩlɩlɩ a dɔˈwʋ, wa ˗kaɲɩ ˈklɩ ˈyɩa, yɩ ˗nɩɲɩɛ abhlɩ ˈmäna ˈwʋ ˗bhö. ˗Maa, ˗a ˗kä ˈmlɩ ˈkunɩ ˈyize, yɩ kä ˈŋlɩ ˈn ˗aˈa dlɩˈwʋkänɔɔ ˈtumanɩɛ ˈmö. ˗A ˗kä sɛ ˗yi nɩɩ, ˈtɛɲɩ ˗ɛɲɩ ˈmö ˗aaa ˈmötɛɛnɔ ˗kä, ˗lɛ Zoova kwänɩɲɩɛ, yɩ gbä ˈn ˗a ˈdionɔɔ teɲii yɔwʋ. (Zɛlɩ Zaakö 1:2-4 ˈmö.) ˗A ˗kä yɔlɔylʋ ˈmö ˗wʋ, Zoova ˗kɩɩ ˈwʋ yɩlɩ, teɲii yɩ kälɔɔ yɔwʋ. ˗Maa ˗a ˗kä ˈyli yɔwʋ ˈtɛmanɩ ˈn ˗a ˈnɩ ˈɔ wɛlɩɩ kɛˈmö ˗sɛɛ, teɲii yɩ bhoo ˈmäna ˈwʋ. Biblë lɛ nɩɩ: “˗N ˗kä ˗li a ˗lii nʋ, wa ˗kamö yɩ za ˈklɩ ˈyɩa dɔˈwʋ ˗wʋ, n˗n ˗kä ˈmlɩ ˈkunɩ ˈyizee, mɩɩ nɛnɩɛ Lagɔ dlɩ yɔwʋ.” (1 Piɛlɩ 2:20) Sɛɛ yɩ yi ˈmö ˗wʋ aˈbhë ˗kë, ˗a ˗kä ˈkwädlɩ ˈmlɩ ˈkunɩ ˈyize ˈn ˗a ˈnɩ Zoova ˈbɩwʋ ˈbhöö, ɔ ˗yiɲɩ ˈɲu ˈpä ˈn ɔ ˗yiɲɩ ˈkwädlɩkwädlɩnɩ a ˗bhölɩbhölɛ ˈɲɛ, ˗mä ˈɔ ˈpɩwʋlelea ˈwʋ. Nɩkpa ˈwuë ˗wa ˈkää ˗mä ˗bhölɩnɩɩ, Zoova a bʋbɔbʋbɔwaa wa ˈkää glɩnɩ, ˈn wa yo ˈtɩɩglɩnɔɔ ˈmö bʋbɔnɩ, nɩkpɛ ˈnaa ˈkʋaˈa ˗lu nʋ.—Matie 24:13.
ˈCƖƐ ˗LII ˗MIMII
Wa ˗yiɲɩ ˈklɩ ˈyɩa aˈbhë ˗kë, ˈsaa ˗kaɲɩɛ kwänɩ nzɩ ˗a ˈkä ˈkwädlɩ Zoova ˗gänɩ ˈn sɛɛ ɔ ˗kaɲɩɛ ˈɲu ˈpää, ˈyi ˈylɩmö.
4. ˗Aˈa ˈligbë ˈmö a ˗nʋa ˗yiɲɩ ˗gblɩ ˗kë, ˗a bhɛnɩ ˗a ˈkä ˈmlɩ ˈkunɩ
Zezwii nʋ a˗a nɩɩ, ˗a ˗kä Zoova a bʋbɔbʋbʋ ˗lɛ ˗sɛ ˗mä ˗aˈa ˗zɩkpa ˈmö, yɩ bhɛnɩ yɩ ˈnaa ˈkä ˗aˈa ˈligbë ˈmö a ˗nʋa dlɩ yɔwʋ nɛnɩ. Zɛlɩ Matie 10:34-36 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Nɩkpɛ ˗kä ɔ ˈkä Zoova a bʋbɔbʋbɔɲɔ ˈzʋ, sɛɛ ˈɔ ˗kosu yɔwʋ a ˗nʋa bhɛnɩ ɔ wa ˈkɩ ˈwʋ ˈlibhï ˈnɩ?
˗Sɩbhä a ˗lii ˗yɩ ˈplɩɛ ˈwʋ, a ˈkɩ ˈylɩmö a dɔˈwʋ, ˈzʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Naˈa ˗kosu yɔwʋ a ˗nʋa ˗ɲɛ ˗na bhɛya ˈsɔ ˗kamö swɩ yɔwʋ ˈkuanɩ ˗n tɩa Zoova bʋbɔ a za, sɛɛ ˗n ˈkä ɔ ˈzʋ ˈnɩ?
Zɛlɩ Psaume 27:10 ˈn Maakö 10:29, 30 ˈmö. A ˗kä ˈmö zɛlɩ ˈwë, a nɩ yɩlɩ nimïyɩbhäkïbhë ˈlɛ yɔwʋ:
˗Naˈa ˗kosu yɔwʋ a ˗nʋa ˗ɲɛ ˗na bhɛya ˈsɔ ˗kamö ˗gblɩɩ, sɛɛ Biblë ˈmö a wɛlɩ ˈlɛ bhɛnɩ ɔ yɩ ˗kamö kwänɩ ˈnɩ?
5. Wa ˗yiɲɩ ˗gblɩ aˈbhë ˗kë, ˗a nɩ bʋbɔ Zoova ˈyize
˗Mumuë ˗kaɲɩ ˗mä ˈsunɩ ˗a ˈkä Zoova a bʋbɔbʋbʋ kɛˈmö ˗sɛɛ, ˗a nɩ ˈtɛmanɩ ˈyli yɔwʋ nzɩ ˗a ˈkɔ bʋbɔ ˈyize. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
Sɛɛ video ˈlɛ bhɛnɩ ɔ wʋ ˗kamö swɩ ɲɛmʋ ˈmö ˈpä, ˗n ˈkä ˈkwädlɩ ˈyli yɔwʋ ˈtɛɛ ˈnɩ?
Zɛlɩ Nʋnʋlii 5:27-29 ˈn Ebleewaa 10:24, 25 ˈmö. A ˗kä ˈmö zɛlɩ ˈwë, a nɩ yɩlɩ nimïyɩbhäkïbhë ˈlɛ yɔwʋ:
Bhlɩɩ ˈmö a ˈkämanɩwaa ˗kä gbä nɩɩ ˗a nɩ tɩaˈa lagɔwɛlɩɩ bia, ˈn ˗a nɩ tɩˈɛ ˗aˈa ˈwluyɩbhäyɩbhɩ ˗bhɛ, ˗a ˗kä ˗abhlɩ ˈyli yɔwʋ ˈtɛmanɩ ˈn ˗a ˗kä Zoova bʋbɔ ˈyize, sɛ yɩ kä ɔ dɛsɛ ˈnɩ?
6. Zoova ˗yimö kwänɩ ˗n ˈkä ˈmlɩ ˈkunɩ ˈyize
Zoova a Bhlɩnɩwaa a ˗bɛ ˗wa ˗wʋä ˗mä bhlɩɩ ˈwuë ˗gömö, ˗muë yɛɛ gɔ ˈn ˗dɩgbö kökämö, wa ˈyʋa teɲii ˈklɩ abhlɩ, ˗maa wa ˗gänɩ ˈkwädlɩ Zoova ˈyize, waˈaa ˈɔ wɛlɩɩ kɛˈmö ˗sɛ. A ˈkä ˈsaa kwänuë ˈylɩmö a dɔˈwʋ, ˈzʋ ˗lɛ VIDEO. ˈN a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, ˈsaa kwänɩ ɔ Zoova a Bhlɩnɩwaa ˈn wa ˈkunɩ ɔ ˈmlɩ ˈyize ˈnɩ?
Zɛlɩ Ghlɔɔmö a ˗nʋa 8:35, 37-39 ˈn Filiipö a ˗nʋa 4:13 ˈmö. A ˗kä ˈmö zɛlɩ ˈwë, a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Biblë a gbɛlɩ ˈlɛ ˈtɛmanɩɲɩ ɔ dlɩ ˈwʋ nɩɩ ˗a bhɛnɩ ˗a ˈkä ˈklɩyɩyɛ a ki ˈwuë ˈwlu ˈplɩ ˈnɩ?
Zɛlɩ Matie 5:10-12 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Wa ˗yiɲɩ ˗gblɩ aˈbhë ˗kë, ˗yɩ kä ɔ ˈŋlɩ ˈn ˗a bhɛnɩ ɔ ˗a ˈkä ˈmäna ˈmö ˗wʋ ˈnɩ?
Wa ˈyɩa Zoova a bʋbɔbʋbɔwaa a ˗bɛ ˈklɩ, ˗maa waˈaa ˈɔ wɛlɩɩ kɛˈmö ˗sɛ. Zaa, ˗n bhɛnɩˈɛ ˗naa ˗n ˈkä ˗sɩbhä ˈzʋmö!
NƖKPA ˗MUMUË LƐ NƖƖ: “N ˗yi sɛ nɩɩ nˈn˗ä bhɛnɩ n ˈkä ˈklɩyɩyɛ ˈwlu ˈplɩ.”
Ɔ ˗kä saˈa gbää, Biblë a gbɛlɩ ˗mi ˗n ˈkä ɔ ˈmö zɛlɩ ˗n ˈkɔ dlɩ ˈwʋ ˈtɛmanɩ ˈnɩ?
DƐSƐKÄKÏBHÏ
Nɩkpa ˗kaɲɩ ˈklɩ ˈyɩa, ˈn ˗a ˈnɩ Zoova ˈa wɛlɩɩ kɛˈmö ˗sɛ ˈlɩlɩlɩ, dɛsɛ yɩ kää teɲii ɔ ˈyila ˈklʋ. Ɔ bhɛnɩ ɔ ˗kaɲɩ kwänɩ ˗a ˈkä ˈklɩyɩyɛ a ki ˈwuë ˈwlu ˈplɩ!
ˈWʋligbanɩkïbhï
˗Yɩ kä ɔ ˈŋlɩ ˈn Klɩtɩɛwaa kä ɔ wa ˈkä sɛ ˗yi nɩɩ, wa yua ˈylɩ ˗bhlʋ ˈmö ˈklɩ ˈyɩa ˈnɩ?
Sɛɛ ˗a ˈkä ɔ ˗bhlɛ zɩˈɛ ˈzʋ, ˈklɩyɩyɛ ˗kaɲɩ zɩla ghlɩɩ, ˗a ˈkäa ˈmö ˗bhɩɔ ˗a ˈkɛ ˈwlu ˈplɩ ˈnɩ?
ˈSaa ˗kaɲɩ ɔ kwänɩ ˗a ˈkɩ dlɩ ˈwʋ ˗kä nɩɩ, ˈklɩyɩyɛ a ˗mɛ ˗yiɲɩ ghlɩ aˈbhë ˗kë, ˗a bhɛnɩ ˗a ˈkä ˈkwädlɩ Zoova ˗gänɩ ˈyize ˈnɩ?
YILII YƆWƲ
Ɲɛgbayu ˗bhlʋ ˈmö wa ˈpää ˗jie ˈmö, sɛɛ ɔˈɔɔ ˈyɩbhä ɔ ˈkä politiköli ˈmö plɛ a za. ˗Maa sɛɛ Zoova kwänɔɔ, ˈyi ˈylɩmö ˗mä video ˈlɛ ˈmö.
Lagɔdaayu ˗bhlʋ ˗ɲɛ ɔ ˈlɛŋlɛ ˈsɔ, wa ˈyʋa teɲii ˈklɩ, ˗maa ˈsaa kwänuëë ˈn wa yiɛ ˈylʋbö a ˗bɛ ˈmö Zoova bʋbɔɔ, ˈyi ˈylɩmö.
ˈCɩɛ sɛɛ ˗n ˈkää ˈyliyɔwʋtɛɛnɩsɛ ˈklɩyɩyɛ ˈwlu ˈplɩ.
« Prépare˗toi dès maintenant à la persécution » (La Tour de Garde, juillet 2019)
˗Aˈa ˗kosu yɔwʋ a ˗nʋa ˗kaɲɩ ˗gblɩɩ, sɛɛ ˗a ˈkɩ ɔ ˈwʋ ˈlibhï ˈnɩ? ˈN sɛɛ ˗a ˈkä ɔ ˈzʋ swɩ ˗tɩɲɩa yɔwʋ ˈkunɩ ˈnɩ?
« La vérité apporte, “non pas la paix, mais l’épée” » (La Tour de Garde, octobre 2017)