ˈCƖƐCƖƐKÏBHË 60
Mö ˈyukusɛ ˈyize ˗mä lagɔwɛlɩɩ ˈmö
˗N ghlɛnɩɛ ˈbɔgʋ ˈlɛ ˈmö ˈn ˗n yiɛ ˗naˈa Biblë a ˈcɩɛcɩʋ ˗bhɛɛ, ˗n ˈcɩɛ ˗lii a ˗bɛ Zoova dɛ. Yɩ kä ˈŋlɩ ˈn ɔ ˗wawʋ ˗yimöä dlɩ zɛmö zumanɩ, ˈn ˗n yoo ˗naɲɩ yowʋ ˈɲɛ, ˈn ˗n yiɛ ˈwʋ ŋlu ˈn wa ˗yimöä badizee. ˗N ˈnɩ ˗kamä ˗bhlɛ ˗li ˈla ˈwuë nʋ, ˗n bhɛnɩ ˗n ˈkä ˈyli yɔwʋ ˈtɛmanɩ nzɩ ˗n ˈkɩ nʋ. ˗Maa wa ˗kamö badizee ˈwë, ˗lɛ a ˈyize, ˗lɛ yɩˈɩɛ ˈbhlenɩ. Miɛ nɩɩ, ˗n kä ˗n ˈkä ˈkwädlɩ ˈyukusɛ mö ˗mä lagɔwɛlɩɩ ˈmö, nzɩ ˗n ˈkä ˈkwädlɩ Zoova yɔwʋ ˈdionɩ ˈyize. Sɛɛ ˗n ˈkä ɔ ˈzʋ ˈnɩ?
1. ˗Yɩ kä ɔ ˈŋlɩ ˈn ˗a ˈkä ɔ ˗a ˗ɲɛ Zoova ˈsɔ a ˈwʋwʋnɛ ˈmö ˈtumanɩ ˈyize ˈnɩ?
˗A kä ˗a ˈkä ˈkwädlɩ ˈyli yɔwʋ ˈtɛmanɩ nzɩ ˗a ˗ɲɛ Zoova ˈsɔ a ˈwʋwʋnɛ ˈkä ˈmö ˈtumanɩ ˈyize. ˗Yɩ kä ɔ ˈŋlɩ ˈnɩ? “˗A tɩa ˈkwlɛ bhli,” ˗a tɔa gwë ˈdionɩ a za˗a. (Ebleewaa 2:1) ˈSaa ˗kaɲɩ ɔ kwänɩ ˗a ˈkä ˈkwädlɩ Zoova ˗gänɩ ˈyize ˈnɩ? ˈN kii ˗mimii ˗a bhɛnɩɛ ˗a ˈkä ˈmö ghlɛnɩ nzɩ ˗a ˈkä Lagɔ ˈa libhoo sasɛ nʋʋ, ˗a bhɛnɩˈɛ ˗a ˈkɩ sɛ tɛlɩ. (Zɛlɩ Filiipö a ˗nʋa 3:16 ˈmö.) ˗Mä ˗aˈa zɩkpaa ˈmö, Zoova a bʋbɔbʋbʋ glɩnɩ ˗lu a ˗mu nɛnɩɛ teɲii!—Psaume 84:10.
2. ˗N käˈɛ ˗n ˈkä ˗lu ˗mumu nʋ nzɩ ˗n ˈkä ˈyukusɛ mö ˈyize
˗Naˈa Biblë a ˈcɩɛcɩʋ yɛ abhlɩ bhɩɛ, ˗maa sɛɛ ˗n ˈkää ˗tiamö a Klɩtɩɛyi a sɛ nɛmö ˗mä ˗naˈa zɩkpa ˈmö, dɛˈɛ ˗lɛ yɩ ˈkää tɛɛnɩ. Biblë lɛ nɩɩ: “˗Wʋsɛlele sɛɛ zlɔnɩɛ ˈmö, [...] a nɩ ŋlu ˈwʋ a ˈkäaˈa ˗sɩkaa ˗sɩbhä a ˈyize ˗wʋ.” (Ɛfɛɛzɩ a ˗nʋa 4:23, 24) ˗N ˗kä ˈkwädlɩ Lagɔ ˈa wɛlɩɩ ˈmö zɛlɩ ˈyize ˈn ˗n ˗kä ˈwluyɩbhäyɩbhɩ ˈwʋ möö, yɩ yi ˈŋlɩ ˗kä, ˗n yi ˗lii a ˗bɛ ˈcɩɛ Zoova a dɛ, ˈn ˗n yiˈɛ ˈɔ ˗wʋwʋsaa a kii yɩbhlɩnɩ. Sɛɛ ˗n ˈkää ˈzʋ nzɩ ˗n ˈkä Zoova a gbäpöö ˗gänɩ ˗mä ˗naˈa zɩkpa ˈmö, mö ˗n nɩ tɛlɩ sɛ. ˗N kä ˗n ˈkä ˗lii a ˗bɛ kɛˈmö ˗sɛ ˗n ˈkɔa ˈkwädlɩ ˈmäna dlɩ zɛmö ˈzʋ.
3. Sɛɛ Zoova ˗kamö ɔ kwänɩ ˗n ˈkä ˈyukusɛ mö ˈnɩ?
Biblë lɛ nɩɩ: “Lagɔ, [...] ɔ yi ˈŋlɩ ˗kä a yi ˈyli yɔwʋ ˈtɛmanɩ teɲii, ɔ yi gbä, dɛ a kää sɛ a yi ˗lɛ kɛ ɲɔnʋ ˗këë, a yi ˗mä ˈgbë ˈwʋ ghlɛ.” (1 Piɛlɩ 5:10) ˗A ˈwuë, ˗a bhɛnɩ ˗a ˈkä ˗lizoku a nʋnwɛ ˈmö bhlinɩ. ˗Maa, Zoova ɲɩaɲɩ ˈmötɛɛnɔ ˈn ˗a plɩɛ ˈwlu. (Psaume 139:23, 24) Ɔ yi gbä, ˗n ˈkɔ ˗gänɩ a ˈtʋ ˗kamö teɲii dlɩ zɛmö yi, ˈn ɔ ˗yimöˈɛ ˈmötɛɛnɔ ˈɲɛ ˗n ˈkä ˈɔ libhoo nʋ.—Zɛlɩ Filiipö a ˗nʋa 2:13 ˈmö.
ˈCƖƐ ˗LII ˗MIMII
Sɛɛ ˗n ˈkää ˈkwädlɩ ˈyukusɛ mö ˗mä lagɔwɛlɩɩ ˈmö ˈn sɛɛ Zoova ˗kamöä ˈɲu ˈpä, ˈyi ˈylɩmö.
4. ˗N ˗ɲɛ Lagɔ ˈsɔ a nɩ ˗sɛ ˈdɩ ˈyize ˈn ˗pʋnɔ ˈyukwli
Bhibhebhibhiuu ˗ɲɛ Biblë a ˈcɩɛcɩʋ ˈsɔ kä ˈŋlɩ ˈn ˗n yiɛ Zoova a bheyi ˈzʋ. Sɛɛ ˗li ˈlɛ ˈwuë bhɛnɩ ɔ yɩ ˗kamö kwänɩ ˗n ˈkɔ yɔwʋ ˈdionɩ ˈnɩ?
Zɛlɩɩ Psaume 62:8 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗n ˈkä ɔ ˗naˈa bhibhebhibhiuu ˈwlu gïganɩ nzɩ ˗n ˗ɲɛ Zoova ˈsɔ a bheyi ˈkä ˈmö ˈtumanɩ ˈnɩ?
Zɛlɩɩ Psaume 1:2 ˈn note ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗n ˈkä ɔ ˈzʋ, ˗n ˈkä ˗naˈa Biblë a ˈmözɛlɩzɛlɛ ˗li a ˗lii ˈmö ghlɩnɩ, nzɩ ˗n ˗ɲɛ Zoova ˈsɔ a ˈwʋwʋnɛ ˈkä ˈmö ˈtumanɩ ˈnɩ?
Sɛɛ ˗n ˈkä ɔ ˈzʋ ˗na ˈyize a Biblë a ˈcɩɛcɩʋ ˈkä ˈmäna ˈwʋ ˗bhö ˈnɩ? A ˈkɩ ˈylɩmö a dɔˈwʋ, ˈzʋ ˗lɛ VIDEO, ˈn a nɩ yɩlɩ nimïyɩbhäkïbhï ˈlɛ yɔwʋ.
˗Mä video ˈlɛ ˈmö, ˈdɩmözʋwɛlɩɩ ˗mi ˗n bhɛnɩ ɔ ˗n ˈkä ˗gänɩ ˈnɩ?
ˈKïbhï a ˗mi ˗n yɩbhä ɔ ˗n ˈkä yɔwʋ yɩlɩ ˗mä Biblë ˈmö ˈnɩ?
5. Tɛlɩ sɛ ˗n ˈkä sasɛ Zoova ˈa libhoo nʋ
˗N ˗kä lagɔlibhoo ˗n yɩbhää ˗lɛ ˗sɛɛ, yɩ ˗yimö kwänɩ ˗n yi ˈyukusɛ mö, ˗mä lagɔwɛlɩɩ ˈmö. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, Kamelo ˗sɛ ˗lɛ lagɔlibhoo ɔ yɩbhää ˈn ɔ yuä nʋʋ, ˗li a ˗lii a ˗mi yɩ nɔ bhä ˈwlu ˈnɩ?
ˈLɩlɩlɩ a dɔˈwʋ ˗a ˈwuë, ˗aaa bhɛnɩ ˗a ˈkä ˗mä ˈbhlɩ ˗mɛmɛɛ ˈmö mö, nzɩ ˗a ˈkä lagɔwɛlɩɩ bia. ˗Maa, ˗a bhɛnɩ ˗a ˈkä lagɔlibhi a ˗mi ˗a bhɛnɩɛ ˗lɛ ˗sɛ nzɩ ˗a ˈkɩ nʋ. Zɛlɩ Proverbes 21:5 ˈmö, ˈn a nɩ yɩlɩ ˗li ˈlɛ yɔwʋ, ˗n bhɛnɩɛ ˗n ˈkä nʋ...
˗mä lagɔzɩkpaa ˈmö.
˗mä lagɔwɛlɩbiabɛyɩ.
Sɛɛ gbɛlʋ ˈlɛ ˈmö a wɛlɩɩ bhɛnɩ ɔ yɩ ˗kamö kwänɩ nzɩ ˗n ˈkä lagɔlibhoo ˗n ˗sɛ ˗lɛ nʋ ˈnɩ?
˗Lii ˗n bhɛnɩɛ ˗n ˈkä nʋ
Tɛlɩ sɛ ˗n ˈkä sasɛ ˗naˈa bhibhebhibhiuu ˈwlu gïganɩ
Tɛlɩ sɛ ˗n ˈkä Biblë ˈwuë ˈmö zɛlɩ.
Tɛlɩ sɛ ˗n ˈkä lagɔzɩkpa ˈmö a ˗nʋa ˈwuë sasɛ yɩbhlɩnɩ.
Tɛlɩ sɛ ˗n ˈkä nɩkpɛ Biblë ˈcɩa.
Tɛlɩ sɛ ˗n ˈkä ˈcʋ ˈmö a ˈyiosɛɲɔ ˈzʋ, ɛ ˗käˈɛ ˈkwädlɩ a ˈyiosɛɲɔ.
Tɛlɩ sɛ ˗n ˈkä ˈyukugänɩwa a ˈyliwʋɲɔ ˈzʋ, ˗n ˗kä ɲɩbhɛlʋdaayu glɩnɩ.
6. A nɩ ˗bhölɩ ˈkwädlɩnɩ!
Zɛlɩ Psaume 22:26 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ.
Sɛɛ ˗a ˈkä ɔ ˈzʋ ˗aˈa zɩkpa ˈkä zɩˈɛ ˈmäna ˈwʋ ˗bhö, ˈn ˈkwädlɩkwädlɩnɩ ˈnɩ?
DƐSƐKÄKÏBHÏ
Tɛlɩ sɛ ˗n ˗ɲɛ Zoova ˈsɔ a ˈwʋwʋnɛ ˈkä teɲii ˈmö ˈtumanɩ, ˈn ˗sɛ ˗lɛ lagɔlibhoo ˗n yɩbhää nzɩ ˗n ˈkʋ nʋ. ˗N ˗kä ˗sɩbhä ˈzʋ, ˗n yi ˈkwädlɩnɩ ˗bhölɩ!
ˈWʋligbanɩkïbhï
Sɛɛ ˗a ˈkɩ ɔ dlɩ ˈwʋ ˗kä nɩɩ, Zoova bhɛnɩ ɔ ˗kaɲɩ kwänɩ ˗a ˈkä sasɛ ˈɔ libhoo nʋ ˈnɩ?
Sɛɛ ˗n ˈkä ɔ ˈzʋ ˗n ˗ɲɛ Zoova ˈsɔ a ˈwʋwʋnɛ ˈkä ˈmö ˈtumanɩ ˈnɩ?
˗N ˗kä lagɔlibho ˗lɛ ˗sɛɛ, sɛ wʋ bhɛnɩ ɔ wʋ ˗kamö ˈyukusɛ kwä ˗mä lagɔwɛlɩɩ ˈmö ˈnɩ?
YILII YƆWƲ
ˈSaa kä ɔ teɲii dɛsɛ Zoova a ˈyila ˈklʋ ˈnɩ? ˗A ˈkä ˗lii nʋ nzɩ nɩkpa ˗kaɲɩ ylɛɛ yi mii kä ɔ teɲii dɛsɛ ˈnɩɩ, ˗maa ˗a ˈkä ˈkwädlɩ Zoova ˗gänɩ ˗mä ˗aˈa zɩkpa ˈmö mii kä ɔ teɲii dɛsɛ ˗a?
Zoova a bʋbɔbʋbɔɲɔ bhɛnɩ ɔ ˈnaa ˈkäa ˈmäna ˈmö ˗wʋ, ˗maa sɛ ɔ ˈkää ˈzʋ ˈmäna ˈkɔ ˈwʋ ˈsɔ dlɩ zɛmö yi, ˈyi ˈylɩmö.
ˈCɩɛ Biblë ˈn ˈpänɛ dlɩ kɛ ˈmäna ˗kamö ˈwʋ dlɩ zɛmö yi. (5:25)
Sɛɛ ˗n ˈkä ɔ lagɔlibhi ˗n yɩbhää ˗lɛ ˗sɛ, nzɩ ˗n ˈkɩ nʋ ˈnɩ?
Klɩtɩɛyi ˗kä ˗mä lagɔwɛlɩɩ ˈmö ˗jɩbhɛnɩ, sɛ yɩ kää dɛsɛ ˈn sɛ ˗n ˈkää ˈzʋ nzɩ ˗n ˈkä sasɛ ˗jɩbhɛ, ˈyi ˈylɩmö.