ˈCƖƐCƖƐKÏBHË 57
Nɩkpɛ ˗kä ˈɲiɲlolii ˈkädɩ nʋʋ, ˈsaa ˈkä ɔ ˈwʋ ˈplɩ ˈnɩ?
Sɛɛ ˗n ˗wa Zoova a za, ˗nn˗ä ˈyɩbhä ˗n ˈkä ˗lu a ˗mu bhɛnɩɛ wʋ ˈkɔ swɩ yɔwʋ ˈkuanɩ nʋ abhlɩ. ˗Maa zlɩ ˗mɛmɛɛ ˈmö, ˗n bhɛnɩ ˗n ˈkä ˗lizoku nʋ ɔ ˈyila ˈklʋ. ˈLɩlɩlɩ a dɔˈwʋ, ˈɲiɲlolii ˗mimii ˗wʋ ˗lɛ, yɩ ˈtɛɛ ˈmö yɩ ˈkä ˗mimii ˈwʋ zi. (1 Kolɛɛtɩ a ˗nʋa 6:9, 10) ˗N ˗kä ˈɲiɲlolii ˈkädɩ nʋʋ, tɩ dlɩ ˈpä nɩɩ Zoova ˗nɩmöaˈa ˗wa. Yɩbhlɩnɩ sɛ nɩɩ, Zoova ˗bhɩɔ ˈmö ɔ ˈkä ˗naˈa ˈɲiɲlolii a gbʋ ˈyi ˈtatinɩ, ˈn ɔ ˗kamö kwänɩ.
1. Sɛɛ ˗a ˈkä ɔ ˈzʋ nzɩ Zoova ˈkä ˗aˈa ˈɲiɲlolii a gbʋ ˈyi ˈtatinɩ ˈnɩ?
Nɩkpa a ˗muë ˗wa Zoova, wa ˗kä sɛ yɩbhlɩnɩ nɩɩ, wa yɛ ˈɲiɲlolii ˈkädɩ nʋʋ, teɲii yɩ ˈkuanuë swɩ yɔwʋ. ˗Maa sɛɛ Zoova gbää ˗mä Biblë a gbɛlʋ ˈlɛ ˈmö, mii pʋa swɩ ɲɛmʋ ˈmö. Ɔ lɛ nɩɩ: “ˈA ˈɲiɲlolii yɩ yi teɲii ˗zɛ aˈbhë ˗kë, yɩ yi bumanɩ ˗yɩsɩ a ˈlagblɛ a sɛ.” (Isaïe 1:18) ˗A ˗kä ˗aˈa dlɩ ˈwuë ˈmö ˗aˈa ˈɲiɲlolii yɩbhlɩnɩ, Zoova yi yɩ gbʋ ˈyi ˈtatinɩ ˈlɩlɩlɩ. ˗Maa, sɛɛ ˗a ˈkɩ ɔ yɩbhlɩnɩ ˈnɩ? Miɛ nɩɩ, ˗a nɩ ligba nɩɩ ˗a yɛ ˗tiamö ˗lizoku nʋ ˈn ˗a nɩ ˗sɩɩ kɛˈmö ˈlɩlɩlɩ. Nzɩ ˗a ˈkä Zoova bhibhe ɔ ˈkä yɩ gbʋ ˈyi ˈtatinɩ. ˈN dlɩpäsazokwëa ˗ɲɛ nʋnʋlizoku ˈsɔ ˗yɩ ˈsunɩɲɩɛ ˗mä ˈn ˗a yiɛ ˈɲiɲloli ˈla ˈmö bhlinɩɩ, ˗a nɩ ˈdioni gwë ˈn ˗a nɩ ˈtɛmanɩɛ ˈyli yɔwʋ ˗a ˈkä Zoova ˈa ˈpäpägböö ˗gänɩ.—Zɛlɩ Isaïe 55:6, 7 ˈmö.
2. ˗A ˗kä ˈɲiɲloli nʋʋ, sɛɛ Zoova ghlɛnɩ ɔ ˈyukugänɩwaa ˈmö wa ˗kaɲɩ kwänɩ ˈnɩ?
Zoova lɛ nɩɩ, nɩkpɛ a ˗mɔ ˗kä ˈɲiɲlolii ˈkädɩ nʋʋ, “Zezwii a ˗nʋa a ˗zɩkpa a ˈyukugänɩwaa, ɔ nɩ wëzuë.” (Zɛlɩ Zaakö 5:14, 15 ˈmö.) ˈYukugänɩwa ˈla, wa ˗waa Zoova ˗ɲɛ ɔ ˗nʋa ˈsɔ. ˈN sɛ wa ˗kaɲɩɛ kwänɩ ˗a ˗ɲɛ Zoova ˈsɔ ˈkä ˗wamanɩ ˈmö wa ˈcɩɛ.—Galatii a ˗nʋa 6:1.
˗A ˗kä ˈɲiɲlolii ˈkädɩ nʋʋ, sɛɛ ˈyukugänɩwaa bhɛnɩ ɔ wa ˗kaɲɩ kwänɩ ˈnɩ? ˗Yɩ kää ˈŋlɩ ˈn ˈsaa ˗a nʋä ˗lɛ ˗lizokuu, ˈyukugänɩwa ˈsɔ, ɛ ˗käˈɛ ˈyukugänɩwa ta, mʋa ˈkää Biblë ˈmö ghlɛnɩ nzɩ wa ˗kaɲɩ dlɩ ˗gömö ˗sɛsɛnɩ. Wa ɲɩaɲɩ ˈdɩmözʋwɛlɩɩ ˈn wa paaɲɩ swɩ ɲɛmʋ ˈmö, wa ˗kaɲɩ kwänɩ ˗a tɩa ˈwʋ ˈsɔ ˈɲiɲloli ˈla nʋ. Nɩkpɛ -kä ˈɲiɲlolii nʋʋ, ˈyukugänɩwaa ˈkä lagɔzɩkpa ˈwʋ -kʋ a za, wa kä wa ˈkɔ ˗mä lagɔzɩkpa ˈmö ˗sɛ, ɔ tɩa ˈɔ ˗lizoku lagɔzɩkpa ˈpïlanɩ.
ˈCƖƐ ˗LII ˗MIMII
˗A ˗kä ˈɲiɲloli ˈkädɩ nʋ a sɛɛ Zoova kwänɩɲɩɛ, sɛɛ ˗a ˈkää tula nɩɩ ˗a yɩbhlɩni, ˈyi ˈylɩmö.
3. ˗A ˗kä ˗aˈa ˈɲiɲlolii a ˈbï ˗sɛɛ, yɩ kwänɩɲɩ ˈn ˗a nɛnɩɛ ˈmö lagɔsɛ
˗A ˗kä ˈɲiɲlolii nʋʋ, teɲii yɩ kälɩɛ Zoova yɔwʋ. Zaa, ˗a kä ˗a ˈkä yɩ ˈbï ˗sɛ ˗lɛ ɔ ˈyila ˈklʋ. Zɛlɩ Psaume 32:1-5 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗A ˈnɩ ˗aˈa ˈɲiɲlolii ˈwʋ zizaa, ˈn ˗a ˗kä yɩ ˈbï ˗sɛɛ, ˗yɩ kä ɔ ˈŋlɩ ˈn yɩ nɛnɩ ɔ ˈnɩ?
˗A ˈkä lagɔsɛ ˈmö nɛnɩ a dɔˈwʋ, ˗a nɩ ˗sɛ ˗aˈa ˈɲiɲlolii a ˈbï Zoova a ˈyila ˈklʋ ˈn ˗a nɩ mö ˈyukugänɩwaa ˈylɩmöä wa ˗kaɲɩ kwänɩ. ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, sɛɛ ˈyukugänɩwaa kwänɩ ɔ Kanɔ ˈn ɔ yi ɔ ˈwʋ ˈsɔ Zoova yinɩ ˈnɩ?
˗A ˗ɲɛ ˈyukugänɩwaa ˈsɔ ˗kä bhïla dɔˈwʋ ˗wʋʋ, ˗a nɩ tʋa wɛlɩ ˈylimö zizanɩ, ˗a nɩ ˈɲʋa gbëaa ˈdɩ. ˗Maa ˗aa za wa ˗wʋä ˗lɛ. Zɛlɩ Zaakö 5:16 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗A ˗ka gbëaa bhilaa, ˈyukugänɩwaa ˗kaɲɩ kwänɩ a dɔˈwʋ, yɩ ˈnaa ˈkʋa kɛˈmö ˈtɛɛnɩ. ˗Yɩ kä ɔ ˈŋlɩ ˈnɩ?
˗A nɩ ˗sɛ ˗aˈa ˈɲiɲlolii a ˈbï, ˗a nɩ ˈɲɛ ˈyukugänɩwaa gbëaa ˈdɩ, ˈn ˗a nɩ ŋlu ˈwʋ Zoova ˗kaɲɩ kwänɩ.
4. Zoova pä ˈɲiɲlolinʋwaa a ŋäzɩdlɩ
Nɩkpɛ ˗kä ˈɲiɲlolii ˈkädɩ nʋ ˈn ɔ ˈnɩaˈa ˈyɩbhä ɔ ˈkä Zoova ˈa ˈpäpägböö ˈklʋkpamö ˈzʋʋ, ˗mä lagɔzɩkpa ˈmö ˗mä wa ˈkɔɔ ˗sɛ. Mi sɛɛ zɛmö nɩɩ ˗aaa ˗kä ˗a ˗ɲɔ ˈkä ˈwʋ ˗bhlinɩ ˈn ˗a ˗ɲɔ ˈsɔ ˈkä ˈdɩ ˗sɛ. Zɛlɩ 1 Kolɛɛtɩ a ˗nʋa 5:6, 11 ˈn 2 Zaa 9–11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Mä falinɩ ˈmö wa ˗kä ˗mä levii ˈzʋʋ, ˈsaa ˈkä ɔ ˈwʋ ˈplɩ ˈnɩ? Zaa nɩkpɛ a ˗mɔ nʋä ˈɲiɲloli ˈn ɔ ˈni yɩbhlɩnɩɩ, lagɔzɩkpa ˈmö a ˗nʋa ˗ɲɔ ˗kä ˈwʋ ˗bhlinɩ, ˈsaa ˈkä ɔ ˈwʋ ˈplɩ ˈnɩ?
ˈYukugänɩwaa, Zoova a saa -sɩbhä wa kää ŋäzɩdlɩ. Nza wa kwänɩɛ -muë wa -sɛ ˗mä lagɔzɩkpa ˈmö. Sɛ wa zlɔmanuëë ˈmö kälɩ yɔwʋ abhlɩ, -maa mii kwänuëë ˈn wa yɩbhlɩnɩɛ ˈwa -lizokuu, ˈn wa -sɩbhää -mä lagɔzɩkpa ˈmö ˈwlu.—Psaume 141:5.
Sɛɛ Zoova libhïä ˈɲiɲlolinʋwaa ˈwʋ, yɩ tula nɩɩ ɔ nʋʋɲɩ ˈmö, ɔ kä ŋäzɩdlɩ ˈn ɔ -waɲɩ.
5. ˗A ˗kä ˗aˈa ˈɲiɲlolii yɩbhlɩnɩ Zoova ˈtatinɩ yɩ gbʋ ˈyi
Nɩkpɛ ˗kä ˈɔ ˈɲiɲlolii yɩbhlɩnɩ a ˈsaa yɩ nʋä Zoova ˈwluu, ˗a ˈki sasɛ ˈmö ˈnʋ a dɔˈwʋ, ˈwʋpälɩwɛlɩɩ ˈmö Zezwii ghlɛnɩɛ ˈmö ˈn ɔ yiɛ ˈmö ˗sɛsɛnɩ. Zɛlɩ Lwiikö 15:1-7 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa wɛlɩ ˈlɛ ˈcɩamö ɔ Zoova a dɛ ˈnɩ?
Zɛlɩ Ezechiel 33:11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ ˗a ˗kä ɔ tula nɩɩ ˗a yɛ ˗aˈa ˈɲiɲlolii yɩbhlɩnɩ ˈn ˗a kɩ kɛˈmö ˗sɛ ˈnɩ?
Zoova, wïlagänɩɲɔ a sɛ ɔ ˗wʋä ˈn ɔ ˗nʋa kɔ teɲii dlɩ sɛ.
NƖKPA ˗MUMUË LƐ NƖƖ: “Wa ˗tɩa ˗mä lagɔzɩkpa ˈmö ˗sɛ a za, n ˈnaa ˈkä ˈna ˈɲiɲlolii a wɛlɩɩ ˈyukugänɩwaa ˈɲɛ.”
Nɩkpɛ a ˗mɔ pää ˗sɩbhä dlɩɩ, sɛɛ ˗n ˈkɔ ɔ ˈdɩ ˈɲɛ ˈnɩ?
DƐSƐKÄKÏBHÏ
˗A ˗kä ˈɲiɲloli ˈkädɩ nʋʋ, ˗a ˗kii yɩbhlɩnɩ ˈn ˗a ˗käˈɛ ˈmö ˗bhɩɔ ˗a ˈki kɛˈmö ˗sɛɛ, Zoova yi yɩ gbʋ ˈyi ˈtatinɩ.
ˈWʋligbanɩkïbhï
˗A ˗kä ˗aˈa ˈɲiɲlolii yɩbhlɩnɩ ˈn ˗a ˗kä yɩ ˈbï ˗sɛ Zoova a ˈyila ˈklʋʋ, ˗yɩ kä ɔ ˈŋlɩ ˈn yɩ nɛnɩ ɔ ˈnɩ?
Sɛɛ ˗a ˈkä ɔ ˈzʋ nzɩ Zoova ˈkä ˗aˈa ˈɲiɲlolii a gbʋ ˈyi ˈtatinɩ ˈnɩ?
˗A ˗kä ˈɲiɲlolii ˈkädɩ nʋʋ, ˗yɩ kä ɔ ˈŋlɩ ˈn ˗a kä ɔ ˗a ˈkä ˈyukugänɩwaa ˗mä ghlɩ nzɩ wa ˗kaɲɩ kwänɩ ˈnɩ?
YILII YƆWƲ
Sɛɛ Zoova ˈpää nɩkpɛ ˗bhlʋ a ŋäzɩdlɩ sɛ yɩ cɛlɩɛ ˗mä Isaïe 1:18 ˈmö, ˈyi ˈylɩmö.
Tɩ dlɩ ˈpä nɩɩ Zoova ˈnaa ˈkä ˗zɩ ˗naˈa ˈɲiɲlolii a gbʋ ˈyi ˈtatinɩ (5:02)
Sɛɛ ˈyukugänɩwaa kwänɩ bhä -ɔ nʋä ˈɲiɲlolii ˈkädɩ ˈnɩ?
« Les anciens répondent au péché par l’amour et la miséricorde » (La Tour de Garde, août 2024)
-Muë wa -sɛ -mä lagɔzɩkpaa ˈmö, sɛɛ -a ˈkʋa -wawʋ -ɲɛ ŋäzɩdlɩ ˈsɔ ˈylimö tulanɩɩ, ˈyi ˈylɩmö.
« Comment les anciens aident ceux qui sont renvoyés de l’assemblée » (La Tour de Garde, août 2024)
Nɩkpɛ ˗bhlʋ ˗ɔ panɩ a˗a Zoova ˗gömö ˈn ɔ yiɛ ˈwʋ ˈsɔ yinɩɩ, ˈyɩ ɔ wɛlɩɩ ˈylɩmö.
« La Bible transforme des vies » (La Tour de Garde, 1er avril 2012)