ˈCƖƐCƖƐKÏBHË 56
Sɛɛ ˗a ˈkää ˈzʋ lagɔzɩkpa ˈmö a ˗nʋa ˈkä ˈwʋ ˗wʋnɩ
˗A ˗kä ˗mä ˗aa lagɔdaayuë jijoˈwʋ ˗wʋʋ, sɛɛ ˈbhlɩlowli Daviidɩ pä a˗a dlɩ ˗sɩbhä ˗a ˈpämöä dlɩ. Ɔ lɛ nɩɩ: “A yɩɛ! ˗Daayuë ˗kä ˈwʋ glɩnɩ, wa ˗kä ˈwʋ ˗wʋnɩ, sɛ yɩ ˗gää kɛ, sɛ yɩ ˗bhöä ˈmäna ˈwʋ!” (Psaume 133:1) ˗A ˗ka ˈwʋ ˗wʋnɩɩ, ˈfʋ ˈyɩɛ ˗sɩbhä ˈwʋ ˈplɩɩ. ˗Maa, ˗aa ˈwuë ˈyli yɔwʋ ˗a ˈtɛmanɩɛ bhʋlʋbhlʋ nza˗a.
1. ˗Mä Lagɔ a ˗nʋa jijoˈwʋ ˈsaa ˗a köbha ɔ ˈyli ˈnɩ?
˗N ˗kä ˗mä bhlɩ ˗mɛmɛɛ ˈmö möö, ˗n ˗kä ˗mä a ˈwluyɩbhäyɩbhʋ ˈwʋ möö, ˗n ˈnɩ ˈwa gbʋʋ ˗ŋö aˈbhë ˗kë, ɛ ˈkä ˗bhɩɛ ˗naˈa lagɔzɩkpaa ˈmö, ˗mä ˗n ˗wʋ ˈyize, ˗nn˗ä ˗kɔnɩ. ˗Yɩ kä ɔ ˈŋlɩ ˈnɩ? ˗Yɩ kää ˈŋlɩ miɛ nɩɩ, lagɔbɔgwɩɩ ˗bhlʋ ˗kpɔ mö ˗a ˈcɩɛnɩɛ ˈmö, dɛɛ ˗a yi ˗wʋ ˗kë. ˈN ˗a ˈtɛmanɩ ˈyli yɔwʋ, ˗a ˗ɲɛ ˗aa lagɔdaayuë ˈsɔ ˗wawanɩɛ. Dɛɛ ˗a yi ˗bhölɩnɩ ˗kë, “Zoova ˈa ŋlɩɩ mö ˗a ˈghlimanɩɛ ˈn ˗a bʋbɔnɔɔ ˈgämö.”—Sophonie 3:9, note.
2. Sɛɛ ˗n ˈkä ɔ ˈzʋ nzɩ a ˈkä ˈkwädlɩ ˈwʋ ˗wʋnɩ ˈnɩ?
“˗Wawʋ a dɔˈwʋ, ˈa dilaa nɩ tɩ ˈkwädlɩ ˈmö ˗dlinɩ.” (1 Piɛlɩ 1:22) Sɛɛ ˗n ˈkä ɔ ˈdɩmözʋwɛlɩ ˈlɛ ˗gänɩ ˈnɩ? ˗Aa ˗daayuë ˈa ˈkizokuu wa kää ˈmö, mö ˗a nɩ tɩ ˈwʋ yɩlɩ. ˗Maa, ˈwa ˗wʋwʋsaa a ki ˗yɩ nɛnɩɛ mö ˗a nɩ tɛlɩ sɛ. ˗Aa lagɔdaayuë ˗a ˗yiɛ a ˈyize cuu, mö ˗a ˗ɲɛɛ nɩ tɩ ˈwʋ ˗bhlinɩ. Lagɔdaayuëa ˗a ˗ɲɛ ˈnɩɛ ˈpɩɔ ˗bhlʋ ˈyli ˈbhöönɩ, ˗a nɩ ˈtɛmanɩ ˈyli yɔwʋ ˗a ˈkʋa yɔwʋ ˈdionɩ. ˗Maa sɛɛ ˗a yɩlɩ a˗a ˗mumuë ˈzokwësɛ ˈwʋʋ, ˗a nɩ tuëaˈa ˗sɩbhä ˈwʋ yɩlɩ.—Zɛlɩ 1 Piɛlɩ 2:17 ˈmö.a
3. ˗A ˗ɲɛ ˗aa lagɔdaayuë ˈsɔ wɛlɩ ˗kaɲɩ jijoˈwʋ yi sɛɛ ˗a ˈkä ɔ ˈzʋ ˈnɩ?
˗A ˗wʋnɩ ˈwʋ abhlɩ, ˗maa nɩkpa a ˗muë ˗gwälɩnɩɛ ˈɲiɲloli ˈmöö, mö ˗a glɩnɩɛ. ˈTɛɲɩ ˗mɛmɛɛ ˈmö, ˗a nʋ ˗aa ˗daayuë ˗lizoku ˈwlu. ˗Maa Lagɔ ˈa wɛlɩɩ lɛ nɩɩ, “sɛɛ ˗Alowlii ˈtatinɩɛ ˈa ˈɲiɲloli a gbʋ ˈyii,” yɩ lɛ nɩɩ, “sɛ ˗bhʋlʋ ˗kpɔ ˈla, ˗sɩbhä a nɩ ˈtatitatinɩmö a ˈbhɩa a ˗lizoku a gbɩɩ ˈyi.” (Zɛlɩ Kolɔɔsɩ a ˗nʋa 3:13 ˈmö.) ˈTɛɲɩ ˗mɛmɛɛ ˈmö, ˗a nʋmöˈɛ ˗lii ˗mimii ˗yɩɩɛ Zoova dlɩ yɔwʋ nɛnɩ. ˗Maa, ɔ ˗bhɩɔ ˈkwädlɩ ˈmö ɔ ˈkä ˗aˈa ˗lizoku a gbʋ ˈyi ˈtatinɩ. Zaa, ɔ yɩbhä nɩɩ ˗a ˈbhɩa ˗kaɲɩ ˗lizoku ˈwlu nʋʋ, ˗a nɩ ˈtatinɩmöˈɛ ˗sɩbhä yɩ gbʋ ˈyi. ˗N ˗kä sɛ ˗yi nɩɩ ˗n yɛ ˗mɔmɔɔ ˗lizoku ˈwlu nʋʋ, sɛɛ ˗n ˈkää ˈzʋ ˗n ˈkɩ ˈwlu gïganɩ, ˈzʋ ˗sɩbhä.—Zɛlɩ Matie 5:23, 24 ˈmö.b
ˈCƖƐ ˗LII ˗MIMII
Sɛɛ ˗a ˈkää ˈzʋ nzɩ ˈwʋwʋnɛ ˗ɲɛ ˈtɩɩglɩglɛ ˈsɔ ˈkä ˗mä lagɔzɩkpa ˈmö ˗wʋʋ, ˈyi ˈylɩmö.
Sɛ ˗a ˈkä ɔ ˈzʋ ˈtɩɩglɩglɛ ˗kaɲɩ jijoˈwʋ ˗wʋ ˈnɩ?
4. ˗A nɩ tɩ ˗a ˈbhɩa a dɛ ˈzokwësɛ dlɩ ˈpä
˗A yɩbhä ˗a ˈkä ˗aa lagɔdaayuë ˈwuë ˗waa. ˗Maa ˗a ˗ɲʋa ˈsɔ, ˗lii ˗mimii ˈmö a dɔˈwʋ ˗aa ˈmö mlɩnɩ zaa, yɩ ˈtɛɛnɩɲɩ kɛˈmö. ˈSaa ˗kaɲɩ ɔ kwänɩ ˈnɩ? Zɛlɩ Nʋnʋlii 10:34, 35 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Nɩkpaa a ki ˈwuë bhɛnɩ wa ˈkä Zoova a ˗nʋa ˈzʋ. Zaa nɩkpa a ˗muë ˗a ˗ɲɛ ˈnɩɛ ˈmö mlɩnɩ ˗mä ˗lii ˗mimii ˈmö a dɔˈwʋ, sɛɛ ˗a kä ɔ ˗a ˈkä ˈzʋ ˈnɩ?
Sɛɛ ˈa pɩɔ ˈyli a ˗nʋa pää ˗mumuë a dɛ ˈzokwësɛ dlɩɩ, ˗sɩbhä ˗n ˈyɩbhä ɔ ˗n ˈkä ˈzʋmö ˗a?
Zɛlɩ 2 Kolɛɛtɩ a ˗nʋa 6:11-13 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Lagɔdaayuëa ˗a ˗ɲɛ ˈnɩɛ ˈpɩɔ ˗bhlʋ ˈyli ˈbhöönɩɩ, sɛɛ ˗a ˈkä ɔ ˈzʋ nzɩ wa ˗wawʋ ˗kaɲɩ dlɩ zɛmö yi ˈnɩ?
5. ˗A nɩ ˈtatinɩ ˗a ˈbhɩa a ˗lizoku a gbʋ ˈyi ˈn ˗a ˗ɲʋa nɩ ˗wamanɩ
Zoova ˗nɩɲɩɛ ˗bhlɛ tɛkäsɛ ˗lizoku ˈwlu nʋʋ, ˗maa ɔ ˗bhɩɔ ɔbhlɩ ˈmö ɔ ˈkä ˈkwädlɩ ˗aˈa ˗lizoku a gbʋ ˈyi ˈtatinɩ. Zɛlɩ Psaume 86:5 ˈmö, ˈn a nɩ yɩlɩ nimïyɩbhäkïbhï ˈlɛ yɔwʋ:
Sɛɛ Zoova ˈtatinɩɛ ˗aˈa ˗lizoku a gbʋ ˈyi a dɔˈwʋ, ˈsaa gbɛlʋ ˈlɛ ˈcɩaɲɩ ɔ ˈnɩ?
Sɛɛ Zoova ˈtatinɩɛ ˗aˈa ˗lizoku a gbʋ ˈyii, ˗yɩ kä ɔ ˈŋlɩ ˈn yɩ zʋʋɲɩ ɔ ˈmäna dlɩ zɛmö ˈnɩ?
˗A ˗ɲɛ ˗mumuë ˈsɔ ˈkä ˈmö ˈnʋnʋnɩ a dɔˈwʋ, ˗yɩ kä ɔ ˈŋlɩ ˈn yɩ ˈtɛɛnɩɲɩ ɔ kɛˈmö ˈnɩ?
Sɛɛ ˗a ˈkä ɔ Zoova ˈa gbäpöö ˗gänɩ nzɩ ˗a ˗ɲɛ ˗aa ˗lagɔdaayuë ˈsɔ ˗a ˈkä ˈkwädlɩ ˈwʋ ˗wʋnɩ ˈnɩ? Zɛlɩ Proverbes 19:11 ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
˗Mɔmɔɔ ˗kamö ˗lizoku ˈwlu nʋʋ, sɛɛ ˗n ˈkä ɔ ˈzʋ nzɩ ˗lii tɩa ˈmö ˈtɛmanɩ ˈnɩ?
ˈTɛɲɩ ˗mɛmɛɛ ˈmö, ˗a nʋ ˗mumuë ˗lizoku ˈwlu. Zaa ˗a ˗kä ˗sɩbhä a ˗lii nʋʋ, sɛɛ ˗a ˈkä ɔ ˈzʋ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ.
˗Mä video ˈlɛ ˈmö, sɛɛ ŋlʋdaayu ˗bhlʋ ˈzʋ ɔ ˈn ɔ ˗ɲɛ ŋlʋdaayu ˗mɔmɔɔ ˈsɔ yi ɔ ˗wamanɩ ˈnɩ?
6. ˗Aa ˗lagɔdaayuë ˈa ˗wʋwʋsaa a kii ˗yɩ nɛnɩɛ mö ˗a nɩ tɛlɩ sɛ
˗A ˗kä sɛ tɛlɩ ˗a ˈkä ˗aa ˗lagɔdaayuë yɔwʋ ˈdionɩɩ, ˗a yi ˈsaa wa ˈtɛɛnɩɛ ˈmö yɩbhlɩnɩɩ, ˈn ˗a yiˈɛ ˈsaa waˈaa ˈmö ˈtɛɛnɩ yɩbhlɩnɩ. Sɛɛ ˗a ˈkä ɔ ˈzʋ nzɩ ˗a ˈkä ˈsaa wa ˈtɛɛnɩɛ ˈmö a ˈyize ˈwʋ yɩlɩ ˈnɩ? ˈZʋ ˗lɛ VIDEO, ˈn a nɩ yɩlɩ nimïyɩbhäkïbhë ˈlɛ yɔwʋ:
ˈSaa ˗kaɲɩ ɔ kwänɩ ˗a ˈkä ˗aa ˗lagɔdaayuë ˈa ˗wʋwʋsaa a kii ˗yɩ nɛnɩɛ ˈyli köbha ˈnɩ?
˗Aˈa ˗wʋwʋsaa a kii ˗yɩ nɛnɩɛ ˈmö Zoova yɩlɩɛ ˈwʋ. Zɛlɩ 2 Chroniques 16:9a ˈmö, ˈn a nɩ yɩlɩ nimïyɩbhäkïbhë ˈlɛ yɔwʋ:
Sɛɛ Zoova yɩlɩɛ ˗aˈa ˗wʋwʋsaa a kii ˗yɩ nɛnɩɛ a ˈyize ˈwʋʋ, ˈsaa yɩ nʋʋmö ɔ ˈwlu ˈnɩ?
˗Sikaa bhɛnɩ a ˈkä ˗maa yɔwʋ ˗kä, ˗maa ˗lu a ˗mu kää ˈkwädlɩ dɛsɛ ˈmö a glɩnɩɛ. ˗Sɩbhä yɩ ˗wʋä ˗aa lagɔdaayuë a dɛ. Wa kä abhlɩ ˗maa yɔwʋ, ˗maa wa kä teɲii dɛsɛ Zoova a ˈyila ˈklʋ.
NƖKPA ˗MUMUË LƐ NƖƖ: “Nɩkpɛ ˗kaa ˗lizoku ˈwlu nʋʋ, n ˗kä ˗pa yɩ gbʋ ˈyi ˈtatinɩɩ, sɛ yɩ kälɩɛ yɔwʋ ɔ ˈnaa ˈkɩ yɩbhlɩnɩ.”
˗Yɩ kä ɔ ˈŋlɩ ˈn ˗a kä ɔ ˗a ˈkä ˗pa ˗mumuë a ˗lizoku a gbʋ ˈyi ˈtatinɩ ˈnɩ?
DƐSƐKÄKÏBHÏ
˗A ˗kä ˈmö ˗bhɩɔ, ˗a ˗kä ˗aa ˗lagɔdaayuë a ˗lizoku a gbʋ ˈyi ˈtatinɩɩ, ˈn ˗a ˗kʋa ˈylimö tulanɩ nɩɩ ˗a kä wa ˗wawʋ dlɩ zɛmöö, yɩ yi ˈŋlɩ ˗kä ˗a yi ˈwʋ ˗wʋnɩ ˗mä lagɔzɩkpa ˈmö.
ˈWʋligbanɩkïbhï
Sɛɛ ˗a ˈkä ɔ ˈzʋ ˗a tɩa ˗a ˈbhɩa a dɛ ˈzokwësɛ dlɩ ˈpä ˈnɩ?
˗A ˗ɲɛ ˗aa lagɔdaayuë ˈsɔ wɛlɩ ˗kaɲɩ jijoˈwʋ ˗wʋʋ, sɛɛ ˗a ˈkä ɔ ˈzʋ ˈnɩ?
˗Yɩ kä ɔ ˈŋlɩ ˈn ˗a yɩbhä ɔ ˗a ˈkä ˗a ˈbhɩa a ˗lizoku a gbʋ ˈyi ˈtatinɩ, Zoova a saa ˈnɩ?
YILII YƆWƲ
Sɛɛ Zezwii ˈa wɛlɩɩ ˈcɩaɲɩɛ nɩɩ ˗a nɩ tɩ ˗mumuë ˗zijli tuu, ˈyi ˈylɩmö.
˗N yi zugo ˗kä aˈbhë ˗kë, ˗n yi ɔ yɔwʋ bhibhe ˈyize ˗a?
« Les excuses contribuent à la paix » (La Tour de Garde, 1er novembre 2002)
Sɛɛ -mumuë ˈnɩ gbäzɩɛ nɩkpa ˈmö, ˈyi ˈylɩmö.
Wɛlɩɩ ˗kaɲɩ jijoˈwʋ yii, sɛɛ ˗a ˈkä ɔ ˈzʋ ˈtɩɩglɩglɛ ˈkaɲɩ jijoˈwʋ ˗wʋ ˈnɩ?
« Règle les désaccords avec amour » (La Tour de Garde, mai 2016)
a Dlɩgömösɛsɛnɩkïbhë 6: Gu a ˗mu ˈplɩnɩɛ ˗kaɲɩ ˈlɩbhää, ˗wawʋ a za sɛɛ ˗a ˈkää ˈzʋ ˗a tua ˗aa lagɔdaayuë ˈpïlanɩ, ˈyi ˈylɩmö.
b Dlɩgömösɛsɛnɩkïbhë 7: Moni a wɛlɩ ˗kaɲɩ jijo ˈwʋ ˗wʋ a sɛ a ˈkää ˈzʋ, ˈyi ˈylɩmö.