Lukas

8 Lang piga dokah dobkonsi ai, laho ma Jesus hun kota hu kota ampa hun huta hu huta, laho mambaritahon pasal Harajaon ni Naibata. Dihut do homa apostelni na 12 ai. 40 Dob mulak use Jesus hu Galilea, basar ma halak na mabuei ai mangalo-alo ia. Ai domma ipaima-ima sidea ia. 41 Dob ai, roh ma sada dalahi na margoran si Jairus, ketua sinagoga do ia. Idabuhkon ia ma dirini i nahei ni Jesus, anjaha mangelek-elek ma ia ase roh Jesus hu rumahni, 42 ai na laho matei do boru sasadani na marumur hira-hira 12 tahun. Sanggah mardalan Jesus, iasak-asak halak na mabuei in do ia. 49 Sanggah marsahapi ope Jesus, roh ma sada dalahi hun rumah ni si Jairus, nini ma, “Domma matei borumu, ulang pala be lojai ham Guru in.” 50 Mambogei ai ihatahon Jesus ma hu bani, “Ulang ham mabiar. Porsaya malah, manggoluh do borumu ai.” 51 Dob das ia hu rumah ai, lang ibere ia barang ise pe masuk sobali si Petrus, si Johannes, ampa si Jakobus, pakon bapa ampa inang ni dakdanak ai. 52 Doruh-doruh do haganup manangisi dakdanak ai. Tapi nini Jesus ma, “Ulang nasiam tangis, ai seng matei ia, na modom do.” 53 Halani ai itartawai sidea ma ia, halani ibotoh sidea do na dob matei dakdanak ai. 54 Tapi ijolom Jesus ma tangan ni dakdanak ai janah ihatahon ma hu bani, “Puho ma ho boru!” 55 Mulak manggoluh ma dakdanak ai janah mintor puho ma ia. Isuruh Jesus ma ase ibere ia mangan. 56 Malas tumang ma uhur ni namatorasni. Tapi ihatahon Jesus ma bani sidea ase ulang ipatugah-tugah na masa ai atap bani ise pe.