Lukas

15 Ganup sijalo pajak pakon sipardousa roh hu lambung ni Jesus laho manangar hatani. 2 Jadi marungut-ungut ma halak Parise ampa sibotoh surat, nini sidea ma, “Ijalo on do sipardousa anjaha rap mangan do ia pakon sidea.” 3 Dob ai ipatugah Jesus ma limbaga on bani sidea, nini ma, 4 “Anggo adong 100 biri-biri nasiam janah magou sada, tontu itadingkon nasiam do na 99 ai i juma janah laho manorihi na magou ai ronsi dapot kan? 5 Dob dapotni ai, itampeihon ma ai bani abarani halani malas ni uhurni. 6 Dobkonsi das ia i rumah, idilo ma ganup hasomanni pakon romban rumahni, janah ihatahon ma bani sidea, ‘Marmalas ni uhur ma nasiam rap pakon ahu, halani domma dapotku biri-biringku na magou ai.’ 7 Huhatahon ma bani nasiam, usih hujai, bueinan do malas ni uhur i surga mangidah sada pardousa na ra paubahkon uhurni, marimbangkon mangidah 99 parpintor na lang pala paubahkon uhur ni sidea.