Sahap na pamalaskon uhur usih songon semen na boi patoguhkon parhajabuannima
BANI SUAMI ISTRI
3 Mangkargai
AHA DO ARTINI
Anggo suami atap istri mangkargai pasanganni, totap do sidea marsihaholongan age pe dong na mambahen lang sapandapot. Buku Ten Lessons to Transform Your Marriage mangkatahon, “Lang boi ijugulhon suami atap istri pandapot ni sandiri. Tapi maningon dear do sidea manriah sanggah lang sapandapot. Maningon ibogei janah ihargai ma pandapot ni pasanganni anjaha maningon marusaha ma sidea mambahen haputusan na pamalaskon uhur ni sidea na dua.”
BIBEL MANGKATAHON: “Hormat do haholongon in, seng ipindahi na bani sandiri.”—1 Korint 13:4, 5.
“Huhargai do istriku janah ponting do ia bangku. Lang huhorjahon aha pe na boi mambahen borit uhurni atap mambahen sursar parhajabuannami.”—Si Micah.
MASE PONTING ON
Anggo lang ihargai suami atap istri pasanganni, ra do gabe kasar sidea marsahap. Gabe iejek janah ipaila ma pasanganni. Sada penelitian mangkatahon, ai ma tanda anggo parhajabuan ni sidea ai lang boi martahan.
“Anggo kasar hita marsahap hubani istri janah iejek hita ia, ra do iahap ia lang maharga dirini, janah lang be porsaya ia banta. On ma na mambahen hancur parhajabuanta.”—Si Brian.
NA BOI IBAHEN NASIAM
PINGKIRHON MA ON
Sadokah saminggu on paruhurhon ma parsahap pakon pambahenanmu hubani pasanganmu. Dob ai rimangi ma:
‘Sadia gati do ahu mangejek pasanganku, janah sadia gati do ahu mamuji ia?’
‘Aha do na porlu hubahen laho patuduhkon anggo ahu mangkargai pasanganku?’
RIAHKON MA PAKON PASANGANMU
Parsahap pakon parlahou na sonaha do na patuduhkon anggo ia mangkargai ham?
Parsahap pakon parlahou na sonaha do na patuduhkon anggo ia lang mangkargai ham?
COBA NASIAM MA ON
Suratkon ma tolu cara sonaha ham sihol ihargai. Pangindo ma ase ibahen ia na sarupa. Tukar ma daftar na dob ibahen nasiam ai. Anjaha marusaha ma mangkorjahon na dong ibagas daftar ai.
Suratkon ma sifat-sifat aha do na iharosuhkon ham humbani pasanganmu. Anjaha patugah ma anggo ham mangkargai sifat-sifatni ai.
“Ase ibotoh suamiku na arga do ia bangku, maningon hupatuduh do ai marhitei pambahenanku na arga tumang do ia bangku janah marosuh do ahu ase ia martuah. Lang maningon mambere hadiah na banggal. Boi do homa marhitei parsahap atap mambere hadiah na etek na patuduhkon anggo ahu mangkargai ia.”—Si Megan.
Jadi na sipontingan ai ma sonaha pangahap ni pasanganmu. Ibotoh ia do anggo ham mangkargai ia atap lang.
BIBEL MANGKATAHON: “Pakei nasiam ma biak paridopniuhuran, habasaron, toruh ni uhur, halamlamon, ampa [hasabaron].”—Kolosse 3:12.