Mangurupi Niombah ni “Halak Panginsolat”

1, 2. (a) Hasunsahan aha do na iahapkon dakdanak na pindah hun nagori na legan? (b) Sungkun-sungkun aha do na laho iulas bani artikel on?

“NA PINDAH do namatorasku hun nagori na legan hu nagori on,” nini si Joshua. “Humbani na etek, bahasa namatorasku do na hupakei i rumah ampa i kuria. Tapi dob marsikolah, lang huarusi aha na iulas i partumpuan halani rosuhan do ahu mamakei bahasa na igunahon i sikolahku. Anjaha lang be huarusi budaya ni namatorasku.” Sedo pitah si Joshua na mangahapkon sisonai.

² Sonari, dong lobih humbani 240 juta halak na lang tading i tanoh hatubuhan ni sidea. Anggo nasiam namatoras na pindah hun nagori na legan, sonaha nasiam mangurupi niombah ase mangkaholongi Jahowa janah ‘marparlahou ibagas hasintongan’? (3 Joh. 4) Janah sonaha na legan boi mangurupi sidea?

NAMATORAS, BAHEN MA SIUSIHAN NA MADEAR

3, 4. (a) Siusihan aha do na patut ibere namatoras hubani niombahni? (b) Aha do na lang boi iarapkon humbani niombah?

³ Namatoras porlu mambere siusihan na madear ase niombah boi marhasoman pakon Jahowa janah tongtong manggoluh. Parlobei ma ‘pindahi hanima Harajaon’ sedo arta. Anggo ididah niombahmu ai, sidea pe tongtong marpangunsandeian bani Jahowa. (Mat. 6:33, 34) Anggo boi, ulang ma marutang janah sederhana ma goluhmu. Pindahi ma ‘arta i nagori atas’, ai ma mambahen malas uhur ni Jahowa. Janah ulang ma parayak habayakon atap “hasangapon na humbani jolma”.​—Basa Markus 10:21, 22; Joh. 12:43.

⁴ Pasirsir ma panorangmu rap pakon niombah. Patugah ma bani sidea megah do pangahapmu anggo sidea palobeihon Jahowa, sedo mangindahi arta. Ulang ma iagan nasiam maningon do niombah mansari duit laho pasonangkon namatorasni. Dingat ma, “seng patut anak patumpu-tumpu arta bani namatorasni, tapi namatorasni do bani anakni”.​—2 Kor. 12:14.

NAMATORAS, URUPI MA NIOMBAHNIMA

5. Mase namatoras maningon gati mangajarhon pasal Jahowa bani niombahni?

⁵ Songon na ipatugah bani Bibel, laho ipatumpu do halak “humbani bangsa na marbagei-bagei sahap” hu organisasi ni Jahowa. (Sak. 8:23) Tapi, anggo lang iarusi niombahmu bahasa na ipakei nasiam, payah do mangajarhon hasintongan bani sidea. Niombahmu do parlajar Bibelmu na sipontingan. Anggo “itanda” sidea Jahowa boi ma sidea tongtong manggoluh. (Joh. 17:3) Maningon do gati “sahapkononmu” ai bani sidea.​—Basa 5 Musa 6:6, 7.

6. Aha do guna na idapot anggo niombah marlajar bahasamu? (Idah gambar bani alaman 9.)

⁶ Ra do rosuhan niombahmu mamakei bahasa na ipakei i sikolahni. Tapi, anggo gati do ham marsahapi pakonsi, baru ma ia ra marlajar bahasamu janah lambin urah ma sidea patugahkon na ibagas uhurni. Dong do gunani anggo niombahmu mangarusi lang pitah sada bahasa. Umpamani, lambin pentar ma sidea janah urah ma mangarusi pangahap ni halak na legan. Dob ai, lambin buei ma na boi ibahen sidea ibagas pangidangion. Si Carolina, na pindah hun nagori na legan mangkatahon, “Megah do pangahap boi mangidangi bani kuria na marbahasa na legan. Janah malas uhur boi mangurupi i ianan na mamorluhon.”

7. Sonaha bahenonmu anggo lang iarusi ham bahasa na ipakei niombahmu?

⁷ Tapi, dong do piga-piga dakdanak na lang be marosuh mamakei bahasa na ipakei namatorasni halani domma marlajar bahasa atap hasomalan na baru. Anggo ai do na tarjadi bani niombahmu, ra do nasiam marlajar bahasa na baru ai homa? Lambin urah ma nasiam mangurupi sidea gabe halak Kristen anggo iarusi nasiam parsahapan ni sidea, hiburan na ipilih, pakon tugasni i sikolah. Janah urah ma nasiam marsahapi pakon guru ni sidea. Tongon, porlu do hasabaron ampa martoruh ni uhur laho mangarusi bahasa na baru. Tapi lang soya-soya on. Umpamani, porini longah niombahmu, ai lang marlajar bahasa isyarat nasiam ase boi marsahapi pakonsi? Sonai homa, anggo bahasa na legan do na iarusi niombahmu, ai lang iparlajari nasiam homa bahasani?a—Idah surat partoruh.

8. Sonaha nasiam boi mangurupi niombah hassi pe lang sai iarusi nasiam bahasani?

⁸ Ra do namatoras na pindah hun nagori na legan payah mangarusi bahasa na ipakei niombahni. Jadi, seng urah sidea mangajarhon “Surat Na Pansing” bani niombahni. (2 Tim. 3:15) Hassi pe sonai, boi do nasiam mangurupi dakdanak ase mananda janah mangkaholongi Jahowa. Si Shan, sahalak sintua marsarita, “Inangnami na dob mabalu, sunsah mangarusi bahasanami. Janah ahu pakon anggingku pe lang pala mangarusi bahasani. Tapi, halani ididah hanami tongtong do ia marlajar, martonggo, janah mambahen parlajaran Bibel kaluarga tiap minggu, iarusi hanami ma ponting tumang do marlajar pasal Jahowa.”

9. Anggo niombah mamakei dua bahasa, sonaha namatoras mangurupi sidea marlajar?

⁹ Piga-piga niombah, ra do porlu mamakei dua bahasa laho marlajar pasal Jahowa. Mase? Halani legan do bahasa na ipakei sidea i sikolah pakon i rumah. Jadi, namatoras porlu manggunahon buku, rokaman audio ampa video ibagas dua bahasa. Torang ma, maningon bahat do sidea manggunahon panorang laho mangurupi niombahni ase marhasoman pakon Jahowa.

IBAGAS SAHAP AHA DO NASIAM MARTUMPU?

10. (a) Ise do na manontuhon hu kuria na ija kaluarga martumpu? (b) Aha do na porlu ihorjahon kopala kaluarga paima mambahen haputusan?

¹⁰ Anggo “halak panginsolat” atap pangungsi daoh rumahni humbani kuria na mamakei bahasani, porlu do sidea martumpu bani kuria na mamakei bahasa na dong ijai. (Ps. 146:9) Tapi, porini adong kuria na dohor na mamakei bahasa hatubuhanni, kopala kaluarga maningon manontuhon bani kuria na ija do dearni sidea martumpu. Paima mambahen haputusan, martonggo ma lobei. Dob ai, manriah ma ia pakon parinangon ampa niombahni. (1 Kor. 11:3) Aha do na porlu ipingkirhon? Prinsip Bibel na ija do na boi mangurupi sidea?

11, 12. (a) Aha do pangkorhon ni bahasa bani niombah sanggah martumpu? (b) Mase adong niombah na lang ra marlajar bahasa na ipakei namatorasni?

¹¹ Maningon ipingkirhon namatoras do haporluan ni niombah. Ase boi mangarusi hasintongan ni Bibel, lang sungkup manangar piga-piga jam na iulas bani partumpuan ganup minggu. Pingkirhon ma: Anggo niombah martumpu i kuria na mamakei bahasa na iarusi sidea, marguna do ai bani sidea. Bahat do na boi iparlajari sidea, lobih humbani na boi ipingkirhon namatoras. Tapi, lang sonai anggo sidea martumpu i kuria na lang iarusi sidea bahasani. (Basa 1 Korint 14:9, 11.) Janah bahasa na parlobei sahali ibotoh niombah, lape tontu tongtong marpangkorhon bani uhur ampa pingkiran ni sidea. Buei do dakdanak mamakei bahasa ni namatorasni sanggah markomentar, mambahen partunjukan, ampa padaskon ambilan, tapi sasintongni lang humbani uhurni ai.

¹² Janah, sedo bahasa tumang na marpangkorhon ibagas uhur ni niombah. Ai ma na masa bani si Joshua, na ipatugah nongkan ai. Si Esther, botouni, mangkatahon, “Bani dakdanak, saromban do bahasa, hasomalan, pakon ugama ni namatoras.” Lang marosuh niombah marlajar bahasa ampa ugama ni namatorasni anggo iahap sidea lang sosok ai bani sidea. Jadi aha do na boi ibahen namatoras?

13, 14. (a) Mase sada kaluarga pindah hu kuria na mamakei bahasa na iarusi niombahni? (b) Sonaha namatoras boi patoguhkon partonduyonni?

¹³ Maningon do haporluan ni niombah na ipalobeihon namatoras. (1 Kor. 10:24) Si Samuel, bapa ni si Joshua pakon si Esther mangkatahon, “Ipardiateihon hanami do bahasa na boi iarusi niombahnami sanggah marlajar Bibel. Martonggo ma hanami ase boi mambahen haputusan na madear. Hape, lang pala urah on halani maningon pindah do hanami hu kuria na mamakei bahasa na iarusi niombahnami. Bani kuria on, tongtong do hanami martumpu janah marbarita. Iontang hanami homa sanina-botou rap mangan ampa mardalani. Ganupan on mambahen niombahnami lambin mananda sanina-botou pakon Jahowa, na songon Bapa ampa Hasoman. On ma na siporlunan, marimbangkon sidea marlajar bahasanami.”

¹⁴ Nini si Samuel use, “Ase lambin toguh partonduyonnami, martumpu do homa hanami i kuria na mamakei bahasanami. Tongon, sibuk tumang do hanami halani on janah loja. Tapi martarima kasih do hanami hubani Jahowa halani pasu-pasu na binere-Ni. Hatolusi niombahnami mangidangi Jahowa ibagas gok panorang.”

NA BOI IBAHEN NA MAPOSO

15. Mase iahap si Kristina dearan do anggo ia martumpu i kuria na mamakei bahasa na iarusi?

¹⁵ Dob magodang, ra do iahap dakdanak lambin dear sidea mangidangi Jahowa anggo martumpu bani kuria na iarusi sidea bahasani. Anggo sonai, ulang iagan namatoras na lang marosuh do sidea bani nasiam. Si Kristina mangkatahon, “Huarusi do bahasa ni namatorasku. Tapi, payah tumang huarusi na iulas i partumpuan. Sanggah marumur 12 tahun, dihut ma ahu hu kebaktian na mamakei bahasa i sikolahku. Ijai ma huarusi on do hasintongan! Janah, anggo martonggo ahu mamakei bahasa i sikolahku, boi ma huuseihon na ibagas uhurhu hubani Jahowa!” (Lah. 2:11, 41) Sanggah marumur 18 tahun, iriahkon si Kristina ma pasal ai bani namatorasni janah mamutushon pindah hu kuria na mamakei bahasa na iarusi. Ia mangkatahon, “Dob marlajar pasal Jahowa mamakei bahasa na huarusi, mambahen hamajuon ma ahu.” Lang piga dokah, marintis ma si Kristina janah malas uhurni.

16. Mase malas uhur ni si Nadia halani lang saud pindah hu kuria na legan?

¹⁶ Nasiam na maposo, rosuh do nasiam pindah hu kuria na mamakei bahasa na legan? Anggo sonai, pingkirhon ma alasanni. Lambin dohor do hanima bani Jahowa anggo pindah hu kuria ai? (Jak. 4:8) Atap, ase bebas do hanima hun namatorasmu? Atap halani marayoh do hanima marlajar bahasa ni namatorasmu? Si Nadia, na sonari mangidangi i Betel mangkatahon, “Sanggah poso ahu pakon saninangku, sihol do hanami pindah hu kuria na mamakei bahasa na iarusi hanami. Tapi, ibotoh namatorasku do, anggo pindah hanami gabe seda ma parhasomanannami dompak Jahowa. Martarima kasih do hanami halani seng ipaturut namatorasnami hanami pindah janah pongkut do sidea mangajarhon bahasa ni sidea bannami. Megah do hanami halani sirsir mangurupi halak na legan laho mananda Jahowa.”

SONAHA NA LEGAN BOI MANGURUPI

17. (a) Bani ise do Jahowa mambere tanggung jawab laho pagodangkon niombah? (b) Sonaha namatoras mangurupi niombah mananda hasintongan?

¹⁷ Laho mangajarhon hasintongan bani niombah, ibere Jahowa do tanggung jawab ai bani namatoras, sedo bani ompung atap na legan. (Basa Podah 1:8; 31:10, 27, 28.) Tapi, porlu do halak na legan mangurupi namatoras na lang mangarusi bahasa ni niombahni. Sedo na lang martanggung jawab sidea anggo mangindo pangurupion. Anggo iurupi, urah ma sidea mangajari niombahni “ibagas ajar ampa podah ni [Jahowa]”. (Ep. 6:4) Umpamani, ra do namatoras mangindo pangurupion humbani sintua pasal mambahen parlajaran Bibel kaluarga janah mangurupi sidea mangindahi hasoman na bujur bani niombahni.

18, 19. (a) Sonaha do halak Kristen na legan boi mangurupi na maposo? (b) Aha do na maningon totap ihorjahon namatoras?

¹⁸ Laho mangurupi niombah, ontang ma kaluarga na legan ase dihut bani parlajaran Bibel kaluargamu. Ambah ni ai, bahat do na maposo boi marlajar humbani halak Kristen na legan sanggah sidea marbarita atap rap mangkorjahon na legan. (Pod. 27:17) Si Shan na ipatugah nongkan ai, mangkatahon, “Hudingat do pangurupion ni sanina-sanina hubangku. Bahat do na huparlajari sanggah iurupi sidea ahu mangkorjahon tugas i partumpuan. Janah malas do homa uhurhu mardalani pakon sidea.”

¹⁹ Tontu, sidea na mangurupi, porlu do mangojur dakdanak ai ase hormat bani namatorasni. Hatahon ma na dear pasal namatorasni janah ulang ma gabe nasiam na martanggung jawab laho pagodangkon dakdanak ai. Anjaha jaga ma ase ulang ipahata-hata sanina i kuria atap pe halak na legan halani parlahou na salah. (1 Ptr. 2:12) Hassi pe namatoras boi mangindo pangurupion humbani na legan, tapi totap do sidea na martanggung jawab mangajarhon hasintongan bani niombahni. Maningon ipardiateihon sidea do pangurupion na sonaha na ibere bani niombahni.

20. Sonaha namatoras mangurupi niombah ase tongtong mangidangi Jahowa?

²⁰ Namatoras, pindo ma pangurupion humbani Jahowa, janah horjahon ma na sidearan. (Basa 2 Kronika 15:7.) Parhasomanan ni niombahmu pakon Jahowa do na sipontingan humbani harosuhmu sandiri. Tongtong ma urupi niombahmu ase mangkarosuhkon Hata ni Naibata. Pos ma uhurmu anggo niombahmu boi mangidangi Jahowa. Anggo sidea ra mangihutkon Hata ni Naibata janah mangusihi nasiam, songon si Johannes ma pangahap ni nasiam na mangkatahon, “On do malas ni uhurhu sibanggalan, ai ma, anggo hubogei marparlahou anakku ibagas hasintongan.”​—3 Joh. 4.