Mahazua baraka daima boka an Ndragnahari nikumba atsika

Ndragnahari nagnamia mutrumi Ibrahim wahadi amba agnati ndri zanaka ndri zafini, areki mbu handei baraka « an holu ni tani djabi » (Jenezi 22:18). Azovi mwa zanaka ni zafini iu ?

Fa misi mwaka marini 2 000, Ndragnahari nagnamia mutrumi Insa, zanaka ndri zafi ni mutrumi Ibrahim, nguvu hagnanu midjuza mampikushanga. Midjuza reu nampizaha amba mutrumi Insa ro mbu handei baraka mikasiki wahadi namen’Ndragnahari mutrumi Ibrahim, an holu djabi (Reu Galati 3:14).

Midjuza natoni mutrumi Insa nampizaha amba izi ro nifidin’Ndragnahari hagnamia holumbelu baraka. Reu iu nampizaha modeli mbu hampiasan’Ndragnahari izi anga hagnamia holumbelu baraka daima. Reu iu nampizaha kua swifa tsara ni mutrumi Insa. Retu sasani swifa reu :

Malemi rohu : Izi nahadzanga holu marari.

Zuva areki, nisi mwanefu nikutafadali mutrumi Insa anga ahadzanga izi. Nitanani mutrumi Insa izi ndreki nivalini : « Zahu shoku ! » Boka eu, uenefunazi nafaka kamwa re (Markusi 1:40-42).

Tsi matiti : Izi nagnamia holu musari haninyi.

Mutrumi Insa tsi nila amba holu musari. Mara shingani aroyi, izi nagnanu midjuza an fagnamezana haninyi holu arivu maru vo izi nagnanu ata dipe ndreki loku shashi navi maru (Mata 14:17-21 ; 15:32-38). Holu djabi vintsinyi, ata nisi haninyi maru tavela.

Tsara rohu : Izi namelugnu holu nati.

Vo mutrumi Insa kusukunia viavi mati vadi, nalahelu mana tsi nisi kua holu hizaha izi, mutrumi Insa namelugnu zanakani lalahi areki tu, nati (Luka 7:12-15).