Mbamba foé Luc a nga tili
19 Yésus a nga nyiine Jéricho, a mbe a kele’e a wulu e tison été. 2 A nga bo na, môt a too éyôlé na Zachée a mbe valé, a mbe masa benyoñe toya a too fe nkukume môt. 3 A mbe a jeñe’e na a yene za a mbe Yésus, ve a nji kui na a yene nye amu nsamba bôt, a mbe fe étune môt. 4 Nde a nga ke mbil ôsu a ke bet élé sycomore* na a yene nye, amu a mbe na a lôte vôm ate. 5 Éyoñe Yésus a nga kui vôm a mbe, a nga fombô yôp a jô nye na: “A Zachée jika’a sise si, amu môse ya den, ma yiane bo nneñe wôé.” 6 Ane a nga ji’a sise si a nyoñe nye a mevak. 7 Éyoñe be nga yene de, bese be nga taté na ba kobô menyiñe na: “A te ke bo nneñe nda be môt a ne mbo minsem.” 8 Ve Zachée a nga tebe tetele a jô Tate na: “Tame yen! A Tate, ma kap akume dame zañe ngap ébaé, a ve de minzôzoé, a jôm ése me nga nyoñe môt a medu’ane* ma ye bulane nye je biyoñe binyin.” 9 Ane Yésus a nga jô nye na: “Môse wu, Zambe a te nyii môte nyi a nda bôte jé, amu nye fe a ne mon Abraham. 10 Amu Mona môt a nga so na a jeñ a nyii ba be nga jañ.”
11 Nté be mbe be vô’ôlô’ô mame mete, a nga ve be éve’an éfe, amu a mbe bebé Jérusalem, a be mbe be simesa’ane na Éjôé Zambe ja zu tebe été été. 12 Nde a nga jô na: “Mone njô bôt a nga ke si é mbe ôyabe na a ke nyoñ éjôé, mvuse ya valé a nga bulan. 13 A nga loone bebo bisaé bé a ve be bemine awôm* a jô be na, ‘Bo’ané makit a moné nyi akekui ma ye bulan.’ 14 Ve bôte ya si jé be nga vini nye a lôme nsamba befole ayoñ na ô ke kate nye na, ‘Bi nji kômbô na môte nyu a jôé bia.’
15 “Éyoñ a nga bulane mfa’a a nga ke nyoñ éjôé* a nga loon alo dé, a nga ve moné na a yemelan abime nsenge é nga li’i é biik, moné* a nga ve be na be li’i ba bo makit. 16 Wu ôsu ô nga so a jô na: ‘A Tate, mine wôé ô nga ve ma a biaéya bemine awôm.’ 17 A nga jô wô na: ‘Abeñ, a mbamba ôlo! Amu ô boya nyu be ne tabe nye ndi mfa’a ya bone be biôm, nyoñe’e éjôé ya bitison awôm.’ 18 Wu baa ô nga zu jô nye na: ‘A Tate, mine wôé ô nga ve ma a biaéya bemine betan.’ 19 A nga jô fe wuli na: ‘Wo fe, nyoñe’e éjôé ya bitisone bitan.’ 20 Ve wu ôvok ô nga so a jô na: ‘A Tate, mine wôé nyi, me nga ke tiñeti nye éyé été. 21 Tame yen, me mbe me ko’o wo woñ, amu ô ne mbia môt; wo nyoñe vôm ô nji naane, a wo yô vôm ô nji bé.’ 22 A nga jô wô na: ‘A mbia ôlo, ma tyi’i wo ajô a mejô ma kui womien anyu. Nga ô mbe ô yeme’e na me ne mbia môt, me nyoñe’e vôme me nji naan a yô vôme me nji bé? 23 Nde amu jé ô nji ke futi moné wome* nda moné?* Ndemben éyoñe me soya, me nga ye nyoñe nye a nsenge.’
24 “Nde a nga jô bôte be mbe be tele valé na: ‘Nyoñané mine a bili mi ve nye môt a nga bi bemine awôm.’ 25 Ve be nga jô nye na, ‘A Tate, ke a mbili abui moné!” 26 ‘Ma jô mia na, môt ase a bili abui ba ye beta kô’ôlane nye, ve nyu a nji bi, ba ye vaa nye to’o abim a bili. 27 Nde fe, za’ané ma besiñe bame va, mbe bete be nji yi na me bo njôô wop, a wôé be mamiene me lôô.’”
28 Éyoñ a nga mane jô mame mete, a nga ke ôsu a bet mfa’a ya Jérusalem. 29 A éyoñ a nga kui bebé Bethphagé a Béthanie, nkôle ba loone na Nkôle Beolivier, a nga lôme beyé’é bebaé 30 a jô’ô na: “Kelané nlame mia yen ôsu valé, a éyoñe mia ye kui wôé, mia ye koone mon éjakas a tii, môt éziñ a ngenane te tame bete nye yôp. Tii’ané nye mi zuu nye va. 31 Ve nge môt éziñ a sili mia na: ‘Amu jé mia tiine nye?’ mia yiane nye kate na: ‘Tate a yi nye.’” 32 Nde beyé’é a nga lôme be nga ke a koone mon éjakas fo’o ve aval a nga jô be. 33 Ve nté be mbe be tiine mon éjakas, bôte be mbee nye be nga sili be na: “Amu jé mia tiine mon éjakas?” 34 Be nga yalane na: “Tate a yi nye.” 35 Be nga kee nye be Yésus, a beté biyé biap ya yôbe mon éjakas yôp, ane Yésus a nga tabe nye yôp.
36 Nté a mbe a kelek, be nga bôé biyé biap ya yôbe njoñe yôp. 37 Nné ane a nga kui bebé njoñe wo siliki Nkôle Beolivier, beta nsamba beyé’é ase a nga taté na a vak, a ve Zambe duma tyiñe yôp, amu mesimba mese be nga yen, 38 be jô’ô na: “Ébotan é bo’o be nyu a so ane Njô bôt e jôé Yéhôva!* Mvo’é é bo’o yôp été a duma é bo’o vôm a ne ôyabe yôp été!” 39 Ve bepharisien béziñe be mbe nsamba bôt été, be nga jô nye na: “A Ñye’ele, komeka’ane beyé’é bôé.” 40 Ve a nga yalane be na: “Ma kate mia na nge ba ba ku bivôl, meko’o ma ye bete metyiñe yôp.”
41 Éyoñ a nga kui bebé Jérusalem, a nga fombô tison a yôn, 42 a jô’ô na: “Nge wo fe ô nga ye yemelane môse wu mame ma soo mvo’é, ve éyoñe ji me ntoo nsolane mise môé. 43 Melu ma zu, éyoñe besiñe bôé ba ye lôñe nka’ale ô yeme ne zeñ, ba ye bômane wo a ba ye ya’ale* wo mimfa’a mise. 44 Ba ye tyame wo a bone bôé, a ba ye ke lik akok é bete akok avo’o yôp, amu ô nji yem éyoñe be nga zu fase wo.”
45 Ane a nga nyiine Temple a taté na a kuli bôte be mbe be ku’ane biôm atan, 46 a jô’ô be na: “É ne ntilane na, ‘Nda jame ja ye bo nda meye’elan,’ ve mia mi boya je asoé miñwuwup.”
47 A nga ke ôsu a ye’ele môs ôse Temple été. Ve bejôô beprêtre a bescribe a betebe ôsu bejuif be mbe be jeñe’e zene ya wôé nye; 48 ve be nji yene fane ya bo de, amu bôte bese be mbe be baa melo na be kôme vô’ôlô nye.