Mbamba foé Marc a nga tili
15 Tyé kpwaa, bejôô beprêtre, bemvendé ya ayoñ, bescribe a Sanhédrin* ase be nga tôkan. Éyoñe be biya Yésus a mane ka’a nye, be nga kee nye be Pilate. 2 Nde Pilate a nga sili nye na: “Ye ô ne Njôô bejuif?” Ane a nga yalan a jô’ô na: “Womiene wo jô nalé.” 3 Ve bejôô beprêtre be nga bôte nye mejô. 4 Nde Pilate a nga beta sili nye na: “Ye ô nji bi jame ya jô? Aval abui mame bôte ba ba bôte wo di.” 5 Ve Yésus a nji jô ve éfia jia jia, Pilate ve zu kame jam éte.
6 Éyoñ ése abôk é mbe, Pilate a mbe a bili fulu ya suu mbô’ô wua, wu bôte ba sili. 7 Melu mete, môte ba loone na, Barabbas a mbe mimbôk a bebo éngana’a bevok, mbe bete be nga wôé bôt éyoñe be nga bo éjôé éngana’a. 8 Ane nsamba bôt ô nga so a sili Pilate na a bo aval a wô’ô jaé zu a bo. 9 A nga yalane be na: “Ye mia yi na me suu mia Njôô bejuif?” 10 Amu Pilate a mbe a yeme’e na bejôô beprêtre be nga soo Yésus be nye amu éviele. 11 Ve bejôô beprêtre be nga tindi nsamba bôte na ô sili na be viane suu be Barabbas. 12 Pilate a nga beta sili be na: “Me bo Yésus, nyi ba loone na Krist aya?” 13 Be nga ke ôsu a yôtane na: “Ve élé ve nye!”* 14 Ve Pilate a nga beta sili be na: “Amu jé? Mbia jame mbé a nga bo?” Be nga ke ôsu a bete bete tyiñe yôp a jô na: “Ve élé ve nye!”* 15 Amu Pilate a mbe a kômbô’ô bo nkômbane nsamba bôt, nde a nga suu be Barabbas. Éyoñe be maneya bôme* Yésus, a nga jô na be tyelé nye élé.
16 Ane bezimbi be nga nyoñe nye a kee nye nseñe ya nda ngovina, ane be nga loone nkane bezimbi ôse valé. 17 Ane be nga jalé nye édut é too bebé ane évele a lôñ ékate biyo a jalé nye je. 18 Ane be nga taté na ba jô nye na: “Mbôlô* a Njôô bejuif!” 19 Nde fe, be nga bibi nye nlô a nkasa a tui nye menden a kute meboñe si a vitibi ôsu wé. 20 Éyoñe be nga mane kpwe’ele nye, ane be nga vaa nye édut é mbe bebé ane évele a beta jalé nye biyé a mbe a be’e. Ane be nga kee nye na ba ke bômôlô nye élé. 21 Nde fe môt éziñ a mbe a lôte’e valé a too jôé na, Simon môte ya Cyrène, a mbe a so’o afup. A mbe ésa Alexandre a Rufus; ane be nga yemete nye na, a be’e élé mintaé* Yésus.
22 Nde be nga kee nye vôme ba loone na, Golgotha, éyoñe ba kôñelan a tinane na, “Vôme ya ékôkoé nlô.” 23 Vôm ate, be nga jeñe na, ba ve nye woone be nga fulan a myrrhe,* ve a nji nyu nye. 24 Ane be nga bômôlô nye élé mintaé, a wua mimbañe* na be kabane biyé bié ya yôp, na be yeme za a ye nyoñe jé. 25 Be nga bômôlô nye élé bebé mewolo ébule ya mame tyé.* 26 A étome be nga wôé nye je, é mbe ntilane nlô wé yôbe na: “Njôô bejuif.” 27 Nde fe, be nga bômôlô miñwuwube mibaé bilé fefele jé, wua mbo nnôm, wu ôvo’o mbo ngal. 28 *—— 29 A bôte be mbe be lôte’e fefele valé be nga ta nye, be si’isi minlô miap a jô na: “Ééh aah! Ye sa ke wo ô mbe ô jô’ô na, ô ne tyame Temple a beta lôñe nye tañe melu melal? 30 Nyi’i womien, kôlô’ô élé mintaé* ô sise si!” 31 Nde fe bejôô beprêtre a bescribe be nga taté na ba kpwe’ele nye, be jô’ô nye na: “A nga nyii bôte befe, ve a kate nyii émien! 32 Krist Njô bôte ya Israël a kôlô’ô élé mintaé* a sise si bi yen, ndembene bia ye buni nye.” To’o bôte be mbe be tyele élé fefele jé be nga ve nye bijô.
33 Éyoñe bebé zañe môs* é nga kui, dibi é nga mane yiane nlam ôse, akekui bebé mewolo melale ya mame ngô’é.* 34 Bebé mewolo melale ya mame ngô’é, Yésus a nga yôtan a jô na: “Éli, Éli, lama sabaqthani?” Éyoñe ba kôñelan, nalé a tinane na: “A Zambe wom, a Zambe wom, amu jé ô li’iya ma étam?” 35 Éyoñe bôte be mbe be tele bebé valé be nga wô’ô de, be nga taté na ba jô na: “Ye mia wô’ô fo’o? A loon Élie.” 36 Ane môt éziñ a nga ke mbil a dup éponge woon a ne sañ, a futi je mbeñ a ve nye na a nyu a jô’ô na: “Ntame yangané bi yene nge Élie a zu suu nye si.” 37 Ve Yésus a nga tate tyiñe yôp a wu.* 38 A éndelé ya Temple é nga nyabé bifase bibaé, ataté yôp akekui si. 39 Éyoñ évete bezimbi* é mbe é tele Yésus ôsu é nga yene mame mese me nga kui a na a wuya, nde é nga jô na: “Môte nyu a mbe fo’o Mona Zambe.”
40 Binga be mbe fe valé be fombô’ô mame ma boban, be tele ôyap be mbe na, Marie Madeleine a Marie nyia Jacques nyu a mbe mongô,* a too fe nyia Joses a Salomé. 41 Binga bete be mbe be wulu’u nsamba a nye, be mbe fe be saane nye éyoñ a mbe Galilée a abui binga avok, ba be nye be nga bete Jérusalem.
42 Ngô’é é mbe é nga zu ja subu, a mbe fe môse ba kômesane Sabbat, e zu koon a li’iya ve alu da na Sabbat a boban. 43 Joseph, môte ya Arimathée a nga suan, a mbe beta môte ya beta aba mejô bejuif;* nye fe a mbe a yange’e Éjôé Zambe. A nga bele* ke yene Pilate a sili nye mbime Yésus. 44 Ve Pilate a mbe a kômbô’ô yeme nge a wuya, nde a nga loon évete bezimbi a sili nye nge Yésus a wuya fo’o. 45 Éyoñ évete bezimbi é kateya nye na Yésus a wuya fo’o, ane a nga ve Joseph ôva’a ngule na a ke nyoñe mbime Yésus. 46 Éyoñ a kuseya nya ndomboo a suu mbime Yésus si, ane a nga vuluku wô nya ndomboo été a bôé wô soñ é mbe mfa’ane mbas akok été. Mvuse ya valé a nga feneke akok, a dip anyu soñ. 47 Ve Marie Madeleine a Marie nyia Joses, be nga ke ôsu a fombô vôme be nga bôé nye.