Mame minlôman

21 Éyoñe bi nga kui na bi li’i be, bi nga nyoñ éfunga a ke tetele akekui Cos, môs ô nga tya’a valé, bi nga ke Rhodes a Patara. 2 Éyoñe bi nga yen éfunga ja tyi’ilan a ke Phénicie, bi nga dañ a ke. 3 Éyoñe bi nga yen ékôte si ya Chypre, bi nga li’i je mvus mfa’a ya mbo ngale ya éfunga a ke Syrie, a bi nga tebe Tyr, vôm éfunga é mbe na ja suu mimbe’e. 4 Bi nga jeñe beyé’é a éyoñe bi nga yene be, bi nga tabe a be melu zangbwal. Ve amu mame mfufube nsisim a nga bo na be yem, be nga kate Paul abui biyoñe na a bo te telé mebo Jérusalem. 5 Éyoñe melu bi mbe na bia lôte valé me nga man, bi nga kôlô a kee dulu dangan ôsu, bese be nga zu litane bia, binga a bone nsamba, akekui bi nga kôlô tison. Éyoñe bi nga kui éwome mañ, bi nga kute meboñe si a ye’elan. 6 Éyoñ éte bi nga ya’ane be a bet éfunga be ki be nga bulane menda map.

7 Éyoñe bi nga kôlô Tyr, bi nga mane dulu dangan éyoñe bi nga suane Ptolémaïs. Bi nga batane bobejañe ya valé a tabe a be môse wua. 8 Môs ô nga tya’a valé, bi nga kôlô a ke Césarée be Philippe, nkañete mbamba foé, nnye a mbe môte wua ya bôte zangbwal be nga top, a bi nga tabe nda jé. 9 Môt ate a mbe a bili bobebinga benyin, be too minkoé* be nga kuli mejô. 10 Ve éyoñe bi mbe bi lôteya abui melu valé, nkulu mejô a too jôé na Agabus a nga suan a so’o Judée. 11 A nga zu be bia, a nyoñe kandé Paul a tiñeti émiene mo a mebo, a jô na: “Avale di nde mfufube nsisim a jô, ‘Môt a nee kandé nyi, avale di nde bejuif ya Jérusalem ba ye ka’ate nye a ba ye kee nye mo me bôte ya meyoñ.’” 12 Éyoñe bi nga wô’ô de, biabebien a bôte be mbe valé, bi nga taté na bia ye’elane Paul na a bo teke bete Jérusalem. 13 Éyoñ éte Paul a nga yalane na: “Amu jé mia yôn a amu jé mia kômbô ma te’e nyul?* Kôme’e yemané na me ne nkômesan, sa ke ve na be ka’a ma ngata’a, ve na me wu fe Jérusalem amu jôé Tate Yésus.” 14 Amu bi nji kui na bi vañe nye, bi nga jô’é a jô na: “Nkômbane Yéhôva* ô boba’an.”

15 Nde mvuse melu mete, bi nga kômesane dulu dangan a téé na bia ke Jérusalem. 16 Beyé’é béziñe ya ba be a bia, bi nga ke nsamba e Césarée, be nga kee bia be Mnasôn ya Chypre, môte wua ya bôte be ôsu be nga bo beyé’é, nde bi nga bo beyeñe nda jé. 17 Éyoñe bi nga suane Jérusalem, bobejañe be nga nyoñe bia a mevak. 18 Ve môs ô nga tya’a valé, bia be Paul bi nga ke be Jacques a bemvendé bese be mbe valé. 19 A nga batane be, nde a nga taté na a kañete be bone be mame bese Zambe a nga bo bôte ya meyoñ a zene ya ésaé nkañete jé.

20 Éyoñe be nga wô’ô mame mete, be nga taté na ba ve Zambe duma, ve be nga jô nye na: “Tame yen a mojañ, abime betoyini bejuif é ntoo bebuni a bese be ne ayôñe mfa’a ya Metiñe me Moïse. 21 Ve be nga wô’ô bôte be jô’ô na a zene ya ñye’elane wôé, wo tindi bejuif be ne meyoñe na be li’i Metiñe me Moïse, ô kate’e be na be bo teke tyi’i bone bap metyel a na be bo te tôñe metume bemvamba be nga lik. 22 Nde bia yiane bo ajô di aya? Amu teke vaa nge beté, ba ye wô’ô na ô ntoo va. 23 Nde bo’o jame bia zu wo jô di: Bi bili befame benyin be nga tiñeti bebien atiñ. 24 Kele’e a bôte bete ô tune womien avale Metiñe me Moïse ma jô, a mane ke ya’ane moné ase a sili asu dap, ndembene be ne tyeñebane minlô. Nde bôte bese ba ye yeme na, mame mese ba jô mfa’a wôé me ne minsos, ve na wo ke ôsu a bi mbamba ntaban, ô semene fe Metiñe me Moïse. 25 Wôna mfa’a ya bebuni be ne meyoñ, bi nga tili be kalate a kate be ntyi’ane bi nga nyoñ, ñwô ô ne na, ba yiane tyi jôm ése be nga ve bengulemelan a metyi a jôm ése é ne teke ntyi’ane tyiñ* a mvite mame ya bisôk.”*

26 Môs ô nga tya’a valé, Paul a nga ke a bôte bete, a tun émien aval ane Metiñe me Moïse ma jô, ane a nga nyiine Temple, mfa’a ya kat éyoñe melu ya ntunane ma ye man, a éyoñ a yiane zuu mimvean asu môt ase ya be be.

27 Éyoñe melu zangbwale me mbe me ntoo bebé ya man, bejuif ya Asie be nga yene nye Temple, ane be nga tindi nsamba bôte na ô wô’ô Paul ôlun, nde be nga bi nye 28 be yôta’ane na: “A bôte ya Israël, vola’ané bia! Môte nyu, nnye a ye’ele bôte bese, bevôme bese mame ma ndaman éyôlé ya ayoñe dangan a Metiñe me Moïse a vôme nyi. A jame da dañ é ne na, a bo na begrec be nyiine Temple a na vôm a ne étyi nyi a bo mvit.” 29 Amu be mbe be ndeme yene ba Trophime môte ya Éphèse be kele’e ba wulu tison, a be nga buni na Paul a nga nyiñili nye Temple été. 30 Nde zô’é é nga bo tison ése, bôte bese be nga valé mbil a ke bi Paul, nde be nga dutu nye tyia Temple a kee nye nseñ, a mimbé ya Temple mi nga feteban été été. 31 Nté be mbe be jeñe’e na be wôé Paul, foé é nga kui be njôô nkane bezimbi* na jo’ojo’o a ne Jérusalem ase; 32 été été a nga nyoñe bezimbi a bivete bezimbi a ke mbil a ke koone be. Éyoñe be nga yene njôô nkane bezimbi a bezimbi, be nga jô’é teke beta bôme Paul.

33 Njôô nkane bezimbi a nga subu bebé a bo na be bi Paul a ve tyiñe na be tiñeti nye a bengôkobe bebaé; éyoñ éte a nga sili na a ne za, a jam ébien a nga bo. 34 Ve bôte béziñe ya nsamba bôte be mbe be jô’ô jame di, bevo’o ki be jô’ô jam afe. Amu a nji kui na a yeme jam éziñ amu jo’ojo’o a mbe, a nga ve tyiñe na be kee Paul yate bezimbi. 35 Ve, éyoñe Paul a nga kui vôme bôte ba bete na be kui vôme bezimbi be too, é nga sili na bezimbi be be’e nye, amu nsamba bôt ô mbe ô kômbô’ô bo nye mbia jam, 36 ve nsamba bôt ô mbe ô tôñe’e nye ô yôta’ane na: “A wo’ok!”

37 Éyoñe be mbe be nga zu nyiine nye yate bezimbi, Paul a nga jô môt a jôé nkane bezimbi na: “Ye me ne jô jôm éziñ?” A nga yalane nye na: “Ye wo kobô Grec? 38 Ye sa wo ô ne môte ya Égypte, nnye ate den a ntoo ôbe nté, a nga tindi bôte na be bo éngana’a a ke nkôte si a bewôé bôte 4 000?”* 39 Nde Paul a nga jô na: “E nya ajôô, me ne mone juif ya Tarse ya Cilicie, bialé-bialé ya tisone bôte ba yem. Nde ma ye’elane wo na ô jô’é ma me kobô nsamba bôte wu.” 40 Éyoñ a nga ve nye nkobô, Paul a tele vôme bôte be wô’ô bete na be ke yate bezimbi, a nga febe bôte wo. Éyoñe bese be nga tabe bivôl, a nga kobô be nkobô Hébreu a jo’o na: