Mbamba foé Matthieu a nga tili

21 Éyoñe be nga kui bebé Jérusalem, e Bethphagé, Nkôle Beolivier, ane Yésus a nga lôme beyé’é bé bebaé. 2 Nde a nga jô be na: “Kelané nlame mia yen ôsu valé, éyoñe mia ye kui wôé, mia ye koone ngal éjakas a too ntiñetane ba mon, ti’iané be, mi zuu ma be. 3 Nge môt éziñ a sili mia jôm, katané nye na, ‘Tate a yi be.’ Été été a ye jô’é mia na mi kee be.”

4 Mame mete me nga tôé mejô me nkulu mejô ma: 5 “Katané ngone ya Sion na: ‘Tame yen! Njô bôte wôé a zu be wo, a ne évôvoé nlem, a bete éjakas yôp, ôwé mon éjakas, mvoñe tite ja be’e mimbe’e.’”

6 Ane beyé’é be nga ke a bo fo’o ve avale Yésus a nga jô na be bo. 7 Éyoñe be soya ngal éjakas ba mon, ane be nga nyoñe biyé biap ya yôp a beté bie bijakas yôp, nde Yésus a nga tabe bie* yôp. 8 Bôte béziñe ya nsamba bôt ôte be nga bôé biyé biap ya yôbe njoñe yôp, nté ba bevo’o be mbe be tyi’i mebui melen a bôé me njoñe yôp. 9 Abui bôte ya nsamba ôte é nga ke nye ôsu, ba bevo’o ki be mbe be tôñe’e nye mvus, be yôta’ane na: “A Zambe, ba’ale’e Mone David! Ébotan é bo’o be nyu a so a jôé Yéhôva!* A wo ô ne ôyabe yôp été, bia ye’elane wo na ô ba’ale nye!”

10 Éyoñ a nga nyiine Jérusalem, tison ése é mbe é ti’itan, bôte be sili’i na: “Nyu a ne za?” 11 Ane nsamba bôt ô nga yalane na: “A ne nkulu mejô Yésus, môte ya Nazareth e Galilée!”

12 Ane Yésus a nga nyiine Temple été a kuli bôte bese be mbe be kuse’e biôm, a ba bese be mbe be ku’ane biôm atan. Nde fe, a nga sô’ôlô betebele be bôte be mbe be tyendé’é moné a bito bi bôte be mbe be ku’ane bezum. 13 Ane a nga jô be na: “É ne ntilane na, ‘Nda jame ja ye loobane na nda meye’elan,’ ve mia, mi boya je asoé miñwuwup.”* 14 Nde fe mindindim a miñyeyeme mi nga zu koone nye Temple, ane a nga mane saé mie.

15 Éyoñe bejôô beprêtre a bescribe be nga yene bitua bi mam a mbe a bo’ok, a éyoñe be nga wô’ô bobefame be yôta’ane Temple été na: “A Zambe, ba’ale’e nye!” Ane be nga wô’ô mbia ôlun. 16 Ane be nga sili nye na: “Ye wo te fo’o wô’ô jame bana ba jô?” Nde Yésus a nga yalane be na: “Ôwé, ye mi nji lañe na, ‘Bongô a bone ba ye ve Zambe duma?’” 17 Nde a nga li’i be valé, a kôlô tison éte, ane a nga ke bômbô Béthanie.

18 Éyoñ a nga bulane Jérusalem ndibe tyé, a nga wô’ô zaé. 19 Ane a nga yen élé figuier é tele fefele njoñ, ane a nga ke élé éte si, teke koon ébuma été, ve mekaé mekaé, nde a nga jô je na: “Wo ye bo te beta wume bibuma môs éziñ.” Été été élé, figuier é nga mane kôt. 20 Éyoñe beyé’é be nga yene jam éte, be mbe fe’e ne vema a sili na: “Jé ja te bo na élé figuier é kôt été été?” 21 Yésus a nga yalane be na: “Ma kate fo’o mia na, nge mi bili mbunan a teke bisô nlem, mia ye ke bo fo’o ve jame ma te bo élé figuier, to’o mia jô nkôle wu na, ‘Kôlô’ô va ô ke ku mañ été,’ nalé a ye boban. 22 A mame mese mia ye sili meye’elan, mia ye bi me, nge mi bili mbunan.”

23 A nga bo na, éyoñ a nga ke nyiine Temple été, nde bejôô beprêtre a bemvendé ya ayoñe be nga zu koone nye a ye’ele’e bôt, nde be nga sili nye na: “Wo soo ngule ya bo mame ma vé? Nge ke na, za a ve wo ngule ya bo mame ma mese?” 24 Yésus a nga yalane be na: “Ma fe ma zu mia sili nsili wua, nge mi yalane ma, ma fe ma zu mia kate vôme ma soo ngule ma bo je mame ma: 25 “Za a nga lôme Jean na a du bôt? Ye Zambe ya yôp, ye bôt?” Be nga taté na ba kobô be be, be jô’ô na: “Nge bi jô na, ‘Zambe ya yôp,’ a ye sili bia na, ‘Amu jé ñhe mi nji buni nye?’ 26 Ve nge bia jô na, ‘bôt,’ bia mate jame nsamba bôt ô ne bo, amu bese ba yene Jean ane nkulu mejô.” 27 Nde be nga yalane Yésus na: “Bi nji yem.” Nde Yésus fe a nga yalane be na: “Ma fe ma kate ke mia vôme ma soo ngule ma bo je mame ma.

28 “Mia simesan aya? Môt éziñ a mbe a bili bone bebaé. Ane a nga ke jô nyu ôsu na, ‘A mon, kele’e saé afube mindi’i den.’ 29 Nde a nga yalane nye na, ‘Ma ben,’ ve mvuse ya valé, a nga jôban a su’ulane ke. 30 Ane a nga ke yene nyu baa a jô nye avale da, nde a nga yalan ésa na, ‘Ma zu ke,’ ve a nji ke. 31 Mia simesane na, mone mbé ya bone bebaé ba a nga bo nkômban ésa? Nde be nga yalane nye na: “Nyu ôsu.” Ane Yésus a nga jô be na: “Ma kate fo’o mia na benyoñe toya a binga bijabô, ba ye tebe mia ôsu Éjôé Zambe. 32 Amu Jean a nga zu liti mia nya zene, ve mi nji buni nye. Benyoñe toya a binga bijabô be be nga buni nye, to’o éyoñe mi nga yene nalé mi nji jôban a buni nye.

33 “Vô’ôlané éve’an éfe, môt éziñ a mbe a bili abôta si, nde a nga bé afube mindik été, a lôñe nka’ale ô bôma’ane afup, a nga fa’a fe vôme ba miate woon a lôñe fe nkum été, nde a nga li’i de bebé mefup , émiene ki a kele dulu. 34 Éyoñ éyoñe ya kolé bibuma é nga kui, nde a nga lôme alo dé na é ke yene bebé mefup asu ya na be lôme nye abime bibuma dé. 35 Ve éyoñe bebé mefube be nga yen alo dé, nde be nga bôme wua mbia ébôm, wu ôvo’o be nga wôé wô, wu ôvo’o ki be nga lume wô mekok. 36 Ane a nga lôme alo afe, é too abui a lôt abim a nga taté lôm, ve be nga bo de avale da. 37 Nde a nga su’ulane lôme mone wé, a jô’ô na, ‘Ba ye semé mone wom.’ 38 Éyoñe bebé mefube be nga yene mon, nde be nga taté na ba jô na, ‘Môt a ne éli’i le a zu. Nwôané nye bi nyoñe éli’i jé!’ 39 Ane be nga bi nye a wua nye afube mindik atan, a wôé nye. 40 Nde éyoñe môt a ne a afube mindik a ye so, a ye bo bebé mefube ba aya?” 41 Be nga yalane nye na: “Amu be ne mbia be bôt, a ye mane jiane be, a ve bebé mefube befe afube mindik, mbe ba ye ve nye bibuma éyoñ éyoñe ya koé ja ye kui.”

42 Yésus a nga sili be na: “Ye mi nji lañe mintilan été na, ‘Ako’o belôñe menda be nga ben, nde é nga su’ulane bo nlô ako’o ya jua?* Jam éte da so be Yéhôva, a ne fe jame bia semé.’ 43 Ajô te nde ma kate mia na, ba ye vaa mia Éjôé Zambe mo, a kee je ayoñe bôte da ye wume bibuma ya été. 44 Nde fe, môt ase a ye ku akok éte yôp a ye bu’i, a nyu ase akok éte da ye ku yôp, da ye nyose nye.”

45 Éyoñe bejôô beprêtre a bepharisien be nga wô’ô bive’ane bite, be nga yeme na mbe a jô be. 46 Akusa bo be mbe be kômbô’ô bi nye, be nga ko nsamba bôte woñ, amu ô mbe ô yene’e nye ane nkulu mejô.