Mbamba foé Jean a nga tili
2 Môse lale, abôk aluk é nga bobane Cana ya Galilée, a nyia Yésus a mbe wôé. 2 Be nga bañete fe Yésus a beyé’é bé abôk aluk éte.
3 Éyoñe woon a nga bo tyôtyoé, nyia Yésus a nga jô nye na: “Be nji beta bi woon.” 4 Ve Yésus a nga jô nye na: “A minga,* jé ja fombô bia wo été?* Awolo dam é ngenane teke kpwaan.” 5 Nyia wé a nga jô bôte be mbe be bela’ane beyeñe na: “Bo’ané jam ése a ye jô mia na mi bo.” 6 Minka’a* mendime misamane mi mbe valé, avale metiñe bejuif me mbe me jô’ô mfa’a ya na be sôbe mo ôsusua na ba di. Nka’a mendim ôse ô mbe lita bebé 44, nge ke lita 66.* 7 Yésus a nga jô be na: “Jala’ané mendime minkak.”* Nde be nga jalé me ne lut. 8 Ane a nga jô be na: “Bietané abim éziñ, mi ke ve môt a tebele abôk.” Nde be nga biet a ke ve nye. 9 Éyoñe môt a tebele abôk a nga tye’e mendime Yésus a nga bo na me veñesane woon, a nji be a yeme’e vôm a so (akusa bo bôte ba belane beyeñe be mbe be yeme’e jam é nga boban), môt a tebele abôk a nga loone nlu’u minga 10 a jô nye na: “Môt ase a taté ve bôte woon a dañe mvaé, éyoñe bôte be nga sok, éyoñ éte a zu ve nyi a nji dañe mvaé. Wo te ba’ale mbamba woon azukui éyoñe ji.” 11 Yésus a nga bo jame di e Cana ya Galilée, a mbe asimba ôsu a nga bo, a a nga liti étôto’o jé, a beyé’é bé be nga buni nye.
12 Mvuse ya valé Yésus, nyia wé, bobenyañe bé a beyé’é bé be nga siliki Capernaüm, ve be nji tabe wôé abui melu.
13 A nga bo na, Paska bejuif a mbe a nga zu a subu, a Yésus a nga bete Jérusalem. 14 A nga koone na, e Temple, bôte be mbe be ku’ane binyaka, mintômba a bezum. Bôte ba tyendé moné be mbe fe be too bito biap. 15 Nde éyoñ a maneya kôme nkasa minkol, a nga titane bôte bese a mintômba miap a binyaka biap Temple, a nga wua fe moné betyendé moné si, a sô’ôlô betebele bap. 16 A a nga jô bôte be mbe be ku’ane bezume na: “Va’ané biôme bina va! Te mia beta bo na, nda Ésa wom é bo nda makit!”* 17 Beyé’é bé be nga simesan aval é ne ntilane na: “Nye’ane ma nye’e* nda jôé, wo ye bo ane nduane ja yôñe ma nlem été.”
18 Nde bejuif be nga sili nye na: “Ye ô ne ve bia ndeme ja liti na, ô bili ngule ya bo mame ma?” 19 Yésus a nga yalane be na: “Tyamané temple nyi, a e melu melal, ma ye bete nye.” 20 Ane bejuif be nga jô na: “Temple nyu a nga lôñebane mimbu 46, ve wo wo ye bete nye e melu melal?” 21 Ve temple a mbe a jô’ô nye a mbe nyule jé. 22 Éyoñ a nga wômô miñwuan, beyé’é bé be nga simesane na, a mbe a ju’u jô jame di, a be nga buni mintilan a mame Yésus a nga jô.
23 Ve éyoñ a mbe Jérusalem abô’ô Paska, abui bôt é nga buni nye* éyoñ é nga yene mesimba a mbe a bo’ok. 24 Ve Yésus a nji be a too ndi a be, amu a mbe a yeme’e be bese. 25 A amu a nji be a yi na, môt éziñ a kañete nye ajô ya môt, amu a mbe a yeme’e jôm é ne môte nlem été.