Nlitan Jean a nga yen
10 A me nga yene ngungul éngele ôfe ô so’o yôp, ô be’e* nkut, a ndutum ô mbe nlô wé yôp, a asu dé é mbe ane nlô jôbô, a mimbiene mié* mi mbe ane mekône me nduan, 2 a mbe a bili mone mvulekane kalate wo a too nkulan. A nga telé abo ya mbo nnôm mañ, a di ya mbo ngale tyia, 3 a a nga kobô tyiñe yôp ane éyoñe ngbwengbweme ja bam. A éyoñ a nga kobô tyiñe yôp, metyiñe me zo’oyañe zangbwal me nga kobô.
4 Éyoñe bezo’oyañe zangbwal be nga kobô, me mbe bebé ya tili, ve me nga wô’ô tyiñ é so’o yôp é jô’ô na: “Ba’ale’e nsolan,* mame bezo’oyañe zangbwal ba kobô, a te tili me.” 5 Éngele me nga yen a tele tetele mañ a si a nga bete wo wé ya mbo nnôme mfa’a ya yôp, 6 a nga kane ngana be Nyu a nyiñe nnôm éto a nnôm éto, nyu a nga té yôp a biôme bi ne été a nyu a nga té si a biôme bi ne été, nyu a nga té mañ a biôme bi ne été, a nga jô na: “Éyoñe ya yange é maneya. 7 Ve melu ya éyoñ éngele zangbwale a ye bo bebé ya loñe toñe jé, nsolane jam ô ne étyi Zambe a nga kañete ane mbamba foé be alo dé émien, bekulu mejô, wo ye ke memane.”
8 A me nga wô’ô tyiñ é so’o yôp é beta kobô ma a jô na: “Kele’e nyoñe mvulekane kalate ô yoo, ô ne wo éngele a tele tetele mañ a tyia.” 9 Me nga ke mfa’a éngele a mbe a tele a jô nye na a ve ma mone mvulekane kalate. A nga jô ma na: “Nyoñe’e nye a di nye, a a ye bo na ôsañe wôé ô bo ayôl, ve anyu dôé, a ye bo zam ane wôé.” 10 Me nga nyoñe mone mvulekane kalate wo be éngele a di nye, a anyu dam été, a mbe zam ane wôé, ve éyoñe me nga di nye, ôsañe wom ô nga bo ayôl. 11 Nde be nga jô ma na: “Wo yiane beta kuli mejô mfa’a ya avale bôt ése, meyoñ, minkobô* a abui bejô bôt.”