Nlitan Jean a nga yen

15 A me nga yen e yôp été, ndeme fe é too anen a jame ya semé, beéngele zangbwal a minju’u zangbwal. Mame mete me ne ma ma su’ulan, amu a zene ya mame mete, ayaa Zambe da ye jaléban.

2 A me nga yene jôm éziñ é too ane mañe me éyet, mfula’ane a nduan, a ba be nga dañe beta tit afan a éve’ela jé a nombo ya éyôlé jé, be mbe be tele e mañe me éyet, be bili memvete me Zambe. 3 Be mbe be yia jia Moïse ôlo Zambe a jia Mone ntômba, be jô’ô na:

“Mimboone miôé mi ne anen a jôme ya semé, a Yéhôva* Zambe, Nyu a bili ngul ése. Mezene môé me ne zôsô a benya mejôô, Njô bôte ya nnôm éto. 4 A Yéhôva,* za a ye fo’o bo te ko wo woñ a ve jôé dôé duma, amu wo étame wo ba’ale élat? Amu meyoñe mese ma ye so a ve wo ékaña’a ôsu wôé, amu bezôsô metiñe bôé be maneya yené.”

5 Mvuse ya valé, me nga yen, a vôm a dañ étyi ya tabernacle nkañete, a nga yombô e yôp été, 6 a beéngele zangbwal a minju’u zangbwal be nga so vôm a ne étyi, be be’e biyé bi ne mfuban, éfumulu ndombo, a be be’e meses me too a gôlôt, mbôma’ane a minku’u miap. 7 Vevee ététéa wua ya bevevee bitétéa binyin a nga ve beéngele zangbwale bisua zangbwal bi too nkôman a gôlôt, bi too njalan a ayaa Zambe, nnye ate a nyiñe nnôm éto a nnôm éto. 8 A vôm a dañ étyi a nga jaé a ôtita amu duma Zambe a amu ngule jé, a teke môt éziñ a mbe ngule ya nyiine vôm a dañ étyi akekui minju’u zangbwal ya beéngele zangbwal mi nga man.