Kalate baa Paul a nga tili Bethessalonicien

1 Ma Paul, Silvain* a Timothée, ma tili bekristene ya ékôane bekristene* ya Thessalonique kalate, mbe ba wulu ba’aba’a a Zambe Ésa ba Tate Yésus Krist:

2 Beta mvam a mvo’é bia so be Zambe Ésa ba Tate Yésus Krist bi tabe’e be mia.

3 A bobejañ, bi ne ntindane ya ve Zambe akiba éyoñ ése asu denan. Nalé a yian amu mbunane wônan wo yaé étua abui a nye’ane môt ase a nye’e nyu mbo’o wo yaé mfa’a be môte mbok. 4 Amu nalé, éyoñe bia kañete ajô denane bikôane bi Zambe bi ne mevak. Bia kate bie na, akusa bo mia tôban étibila’a a minjuk, mia bo mbane ya jibi, mia tabe fe Zambe ndi. 5 Nalé a liti na ntyi’ane mejô Zambe ô ne zôsô, amu nalé, mi nga lañeban ane bôte ba yian Éjôé Zambe, amu mia jibi minjuk amu Éjôé éte.

6 Amu é ne zôsô mise me Zambe na, a tibili fe bôte ba tibili mia. 7 Ve mia mia tôban étibila’a, bia be mia bia ye kôme bi awo’on éyoñe Tate Yésus a mingungule beéngele bé ba ye yené, be so’o yôp, 8 nkaba’a nduan été, éyoñ a ye mane wôé éyoñe jia ya biyoñe bise, bôte be nji yeme Zambe a ba ba bene kañese mbamba foé ya Tate Yésus wongan. 9 Tate a ye ve bôte bete mekua. A ye wôé be éyoñe jia ya biyoñe bise, nde fe ba ye jañe mise me Tate, a beta ngule wé. 10 Môse Tate a ye so, a ye nyoñe duma fufulu a mintoban, a bôte ba liti a mimboone na be bili mbunane ba ye ke ku avem. Mia mi nga buni foé bi nga kañete mia, mia ye bo nsamba ôte.

11 Jôme te nje bia ye’elane Zambe kom ése asu denane na, Zambe wongan a futi mia nsamba bôte ba yiane nloone wé, a na, a zene ya ngule jé, a bo mbamba be mame bese a kômbô bo, a bo fe na mbunane wônan ô bo ngumba. 12 Ndembene jôé Tate Yésus da ye bi duma a zene jenan, a na mia ye fe bo benyoñe ngabe ya duma éte, amu beta mvame Zambe ba Tate Yésus Krist.