Kalate ôsu Paul a nga tili Becorinthien

5 E nya ajôô, ma wô’ô na, mvite mame ya bisô’ô* ja bobane be mia, a avale mvite mame ya bisôk* éte é nji tame bobane be bôte ya meyoñ, amu môt a nyiñ* a minga ésa wé. 2 A ye mia bo de éngelezek? Nga mia yiane viane yôn a vaa môt a bo avale jam éte ézezañe jenan? 3 To’o me nji bo a mia, ve me ne a mia mfa’a ya nsisim, aval ane nge me ne fo’o a mia. Me tyi’iya ajô nyu a nga bo avale jam éte. 4 Éyoñe mia sulane vôma wua e jôé Tate wongane Yésus, a mi yeme’e na, me ne a mia mfa’a ya nsisim a ngule Tate wongane Yésus. 5 Mia yiane ve Satan avale môt éte mfa’a ya njañane ya minsôn, ndembene nsisim ô ne nyiibane môse Tate.

6 Jame mia bo de éngelezek é nji bo mvaé. Ye mi nji yeme na, mone mvusu* a ne bo na, amama’a ése é mane vus? 7 Va’ané nnôma mvusu na, mi bo mfefé amama’a amu na, e nya ajôô mvusu a nji bo be mia.* Amu na Krist, ntômba ya Paska wongan a nga vebane metuna’a. 8 Nde njemané beta abôk, sa ke a nnôma mvusu nge a mvusu ya abé a mbia be mam, ve a belet é ne te mvusu, belete ya zôsô a benya mejôô.

9 E kalate wom été, me nga tili mia na mi bo te yeñ* a bôte ba bo mvite mame ya bisôk,* 10 me nji be me kobô’ô ajô ya bôte bese ya émo ba bo mvite mame ya bisôk,* be ne ôzañ akum, be ne miñwuwup, be ne bekañe bengulemelan. Nge nalé, yeme’e na mia yiane fo’o kôlô émo. 11 Ve éyoñe ji ma tili mia na mi bo te yeñ* a môt ase a loobane na mojañ, a bo’o mvite mame ya bisôk,* nge ke na a too ôzañ akum, nge nkañe bengulemelan, nge nta bôt,* nge nso’o woon, nge ñwuwup, mi bo bo te di a avale môt éte. 12 Amu sa ke ma ma tyi’i ba be nji bo ékôan été mejô. Ye sa mia mia tyi’i bôte be ne été wôé mejô 13 nté Zambe a tyi’i bôte ya atane mejô? “Va’ané mbia môte zañe jenane miabebien.”