Jé ba loone na nkpwa’a mefan?

Nkpwa’a mefan a ne môt a yoé zen asu na bôte bevok be tôñe nye. Bi ne jô na Yésus a mbe nkpwa’a mefan. Amu jé? Yéhôva a nga lôme nye si na a zu yoé zene ya éyiñ a kôté bia (Matthieu 20:28). Dene fe, Bengaa be Yéhôva ba vu nye amu ba ke ba kañete mbamba foé. (Matthieu 28:19, 20) Abui ya été be ne bekpwa’a mefan.

Môt a kañete éyoñ ése. Bengaa be Yéhôva bese ba kañete mbamba foé. Ve bevok be nga ta’a éyoñe jap na be bo bekpwa’a mefan. Bekpwa’a mefan be ne mevale meval. Bekpwa’a mefane y’éyoñ ése (ba ve mewolo 70 ngon ése). Asu na be bo jam ete, be wô’ô jeñ ésaé é ne teke be nyoñ abui éyoñ. Bevo’o ke be ne bekpwa’a mefane be ne ngum aval (ba ve mewolo 130 ngon ése). Ba lôme balé vôme Bengaa be ne tyôtyoé. Ba jeñe ke abui akum. Be too ndi nleme na Yéhôva a ye jalé miñyiane miap. (Matthieu 6: 31-33; 1 Timothée 6:6-8) Bengaa bevok ke be ne tobe ngume ngone na ba kañete mewolo 30 nge 50, be ne bekpwa’a mefane y’étun éyoñ.

Môt a nye’e Zambe a bôte bevok. Aval ane Yésus, bia fe bia yene na bôt abui be ne azoé nsisim. (Marc 6:34) Ñyemane bi bili ô ne volô be na be bi nya ndi nlem asu melu ma zu. Nkpwa’a mefan a nye’e bôte bevok, ajô te a belane ngul a éyoñe jé ése na a volô be. (Matthieu 22:39; 1 Bethessalonicien 2:8) Mboon ôte wo wônô mbunane wé, wo bo fe na a subu Zambe bebé, wo ve fe nye abui mevak.

• Ô ne jô na nkpwa’a mefane a ne jé?

• Jé ja tindi Ngaa na a bo nkpwa’a mefan?