KABETÔLÔ 7

B’astrologue ba jome Yésus

B’ASTROLOGUE BA TÔÑ “ÔTETÉ” WO KEE BE JÉRUSALEM, MVUSE YA VALÉ BE YÉSUS

Bôte béziñ ba so mfa’a jôp da tôô, a ne b’astrologue. B’astrologue be ne beyeme mam ba fas ateté a vôm e tele a ba meme na, e yeme vôm ateté e tele a volô be na, be bo ngule ya yem atinane ya mam ma kui bôt ényiñ. (Ésaïe 47:13) Nté be mbe nda jap mfa’a jôp da tôô, be nga yen “ôteté” a tôñe wô mintete bekiliméta, sa ke zene ja ke Bethléhem, ve Jérusalem.

Éyoñe b’astrologue ba kui wôé, nde ba sili na: “Môt a nga bialé Njô Bejuif a ne vé? Amu bi nga yen ôteté vié mfa’a jôp de atôô, bi zuya kañe nye.”—Matthieu 2:1, 2.

B’astrologue ba kute Njô bôte Hérode meboñ

Éyoñe Hérode Njô bôte ya Jérusalem a wô’ô foé éte, nde metyi ma tyi’i nye fé. Nde a loene bemie beprêtre a betebe ôsu ya ñyebe Bejuif, a sili be vôme Krist a te bialé. Ba ve éyalane ja so Kalate Zambe, be jô’ô na: “Bethléhem.” (Matthieu 2:5; Michée 5:2) Éyoñ a wô’ô jam ete, nde a loene b’astrologue asoé, a jô be na: ‘Kelan, mi ke tu’a yemelan ajô mone mongô ate; éyoñ mi aye yene nye, mi zu kate me foé, ma fe me aye ke kañe nye.’ (Matthieu 2:8) Ve avale bia yem, Hérode a jeñe mongô ate amu a kômbô wôé nye!

Éyoñe b’astrologue be keya, nde étua jam ja boban. “Ôteté” be nga yen éyoñe be mbe mfa’a jôp da tôô ô ntele be ôsu. Da yené ne ngeññ na, ôteté ôte ô nji bo zezé ôteté, ô ne valé na wo liti be zene ba yiane ke. B’astrologue ba tôñe wô akekui wo tebe nda Joseph ba Marie a mone wop be too.

B’astrologue ba tôñ ôteté akekui Bethlehem, a ba ve Marie a Yésus das

Éyoñe b’astrologue be nyiineya nda été, ba koone Marie a mone mongô: Yésus. Nde b’astrologue ba kute Yésus meboñe si. Ba dasé fe nye or, meyemete m’élé me ne mbamba menyum a myrrhe. Mvuse ya valé, éyoñe ba jeñe na be bulane be Hérode, nde Zambe a bemene be biyeyeme na, be bo te bo de. Ane ba nyoñe zene fe a bulane nlame wop.

Wo simesan aya, za a nga belan “ôteté” ô mbe ô liti’i b’astrologue zen? Te vuane na, ô nji kee be été été be Yésus e Bethléhem. Ve ô nga taté kee be Jérusalem vôme be nga ke yene Njô bôte Hérode, nyô a nga kômbô wôé Yésus. A nga ye fe de bo nge Zambe a nji ye bemene b’astrologue na, be bo te bulane be Hérode a kate nye vôme Yésus a ne. Da yené ne ngeññ na, Satan, nsiñe Zambe nnye a mbe a kômbô’ô wôé Yésus, a nga belane fe zen éte asu na a tôé nsôñane wé.