Amu jé beyé’é be Yésus be nji tyi bidi?

Éyoñ Yésus a tabeya abô’ô Pâque ya mbu 30 É.J., mvuse ya valé be nga futi Jean Baptiste mimbôk. Jean a mbe a yi na beyé’é bé be tôñe Yésus, ve a kui den, bese be nji de bo.

Éyoñe Pâque ya mbu 31 É.J. a nto bebé ji, beyé’é be Jean béziñ ba zu be Yésus a sili nye na: “Amu jé éyoñ bia a Bepharisien bia tyi bidi, beyé’é bôé teke bie tyi?” (Matthieu 9:14, Mfefé Nkôñelan) Bepharisien ba nyoñe ntyiane bidi ane metume ya ñyebe. Yésus a ye belane belan éve’ela é liti’i aval avé mone Pharisien a ne njalan a mebun a ye’elan a jô’ô na: “A Zambe, me ave wo akéva amu me nji bo aval ane bôte befe . . . Me atyi bidi sondô wua metyi mebaé.” (Luc 18:11, 12) Aval ete fe beyé’é be Jean ba tyi bidi amu ba tôñe metume ya ñyebe. Be ne fe tyi bidi amu minleme mi ne be ntya’an amu Jean a ne mimbôk. Nge nalé a ne été, be ne kame na beyé’é be Yésus be nji bo avale da amu ba wô’ô Jean mintaé.

Yésus a yalane be a éve’ane ji: “Ye bemvôé be môt a lu’u minga be ne ngule ya wô’ô ôlun éyoñ môt a lu’u minga a ngenan a to? Ve melu me aye kpwan éyoñ be aye va môt a lu’u minga vôm be to, éyoñe te be aye bômbô zaé ya ôlun.”​—Matthieu 9:15.

Jean émien a nga liti na Yésus a ne nlu’u minga. (Jean 3:28, 29) Nté Yésus a ne a beyé’é bé, be nji yiane tyi bidi. Mvuse ya valé, éyoñe Yésus a ye wu, beyé’é bé ba ye yône nye a b’aye bi nkômbane ya di. Ve mam ma ye tyendé éyoñ a ye wômô! B’aye beta bi beamu ya k’ôsu a tyi bidi.

Mvuse ya valé, Yésus a ve bive’ane bibaé bi: “Amu môt a nji beté abaka éndélé e ne te ñwutan ntu’u ngômesan; amu abaka de ayiane dipe nyaban ngômesan, de aye viane limiti ntu’u ngômesan, ve nyaé, abé ve bo anen. Nalé fe bôt te loé mfefé vin minnôm mende’e bikôp: na mende’e me za tui, vin ve sôé si, mende’e bikôp vé wu ntuk: ve bôt be aloé mfefé vin mimfefé mende’e bikôp, wona bi aye bo mvaé bibaane.” (Matthieu 9:16, 17) Jé Yésus a kômbô jô?

Yésus a volô beyé’é be Jean Baptiste na be tu’a yem amu jé môt a nji yiane yange na beyé’é bé be tôñe minnôme metume ya ñyebe Bejuif, aval ane ntyiane bidi. A nji zu kôm nge wumulu fatan ékaña’a é nto nnôm a bebé ya ke abo si. Ékaña’a Yésus a wumulu é nji bo ji é tii a ñyebe Bejuif ya éyoñ éte, ékaña’a é ne njalan a metume ya bone be bôt. A nji jeñe na a loé mfefé abaka ntu’u ngômesan yôp, nge loé mfefé vin e nnôme ndek ékôp.