Nkulan ajô Ésaïe wo jaléban

Éyoñ a yemeya na Bepharisien ba be bôte ba su’u Hérode ba bôndé fe’e na be wôé nye, Yésus ba beyé’é bé ba ke e fefele Mañe ya Galilée. Bizu’u bi bôt bia zu be nye, bi so’o bevôme bese: e Galilée, e bitison bi ne mfôme mañe ya Tyr a Sidon, mfa’a jôp da tôô Ôsôé ya Jourdain, e Jérusalem, a sud ya Idumée. Mbôle Yésus a saé abui bôt, ba be bili mbia b’akon ba mane bômane nye. Teke fe yange na a nambe be, bebiene ba jeñe fane ya nambe nye.​—Marc 3:9, 10.

Nsamba bôt ô nembaneya abui aval e ne na, Yésus a jô beyé’é bé na be jeñe nye mone sitima asu na a ke ôbe nté, bôte be bo teke beta kubu nye nyul. Nde fe, a ne ye’ele be a tele sitima été nge ki vôme mfe mfôme mañ na a volô abui bôt.

Ñyé’é Matthieu a yene na, ésaé Yésus a bo ja tôé “jame nkulu mejô Ésaïe a nga jô.” (Matthieu 12:17, Mfefé Nkôñelan) Nkulan ajô ôvé Yésus a jalé valé?

“Mi lô, mbo ésaé wom me nga top: nnye me anye’e, nleme wom wo ayene nye mvaé: me aye ve nye nsisime wom, nnye a ye kate bôt be ne te yeme Zambe mejô me ne zôsô. A ye bo te bo ntañete, te bam; nalé fe te ke môt a ye wô’ô tyiñe jé minseñ. Nkaé ô ngenan ôtita, a ye bo te dime wô, akekui éyoñ mame ya si nyô me aye yiane si se. A bôt be ne te yeme Zambe be aye buni jôé dé.”​—Matthieu 12:18-21; Ésaïe 42:1-4.

Yésus a ne fo’o mbo ésaé Zambe a yene mvaé. Yésus a kôme liti jé é ne nya zôsôô, nnye bivuse metume ya miñyebe mia mane kotô. Amu ba belan Atiñe Zambe asu mfi wop, Bepharisien be vo’o ke volô nkôkon e môse Sabbat! Asu ya na a liti nya zôsôô Zambe, a fe na nsisime Zambe ô ne be nye, Yésus a vaa bôte mbe’e ya bikotekote metum. Amu nalé, betebe ôsu ya miñyebe ba kômbô nye wôé. Aval éngôngole jam ete!

Jé ja tinane na, “a ye bo te jeñe mintañete, a ye bo te yôtane tyiñ, tyiñe jé ja ye bo te wô’é minseñ”? Éyoñ a mbe a saé bôt, Yésus a nji kañese na bôte bete, ja’a mimbia minsisim, be “kulane nye.” (Marc 3:12, Mfefé Nkôñelan) A nji yi na bôt be yeme nye a zene ya zô’é e minjoñe minjoñ, nge ki a bivuse mefoé bia kalan menyu menyu.

Nde fe, Yésus a kate bôte be ne minleme ntya’an ane nkaé ô ne ntusan a nte’an foé ja ve be ngule nyul. Be ne ane nsañ wo kui ôtita, ñwô ôte ô nga zu dim. Yésus a nji kok nkaé ô nto ntusan, nge dime nsañ wo kui ôtita ô li’iya ô yôñô’ô mone jôm. Ve, a viane bete ba be ne éjoté nyul a nye’an ôse a nje’ebane nlem. Ôwé, Yésus a ne nyô meyoñ me ne tabe nye ndi!