Nkana bebo bisaé ya afube mindi’i mi woon

Yésus a ndôme kate bôte ba vô’ôlô nye e Pérée na “abui bôt é tele ôsu éyoñe ji ba ye tebe mvus a ba be tele mvus ba ye tebe ôsu.” (Matthieu 19:30, Mfefé Nkôñelan) A bifia bite a nkana bebo bisaé ya afube mindi’i mi woon:

“Éjôé ya yôp ja funane fo’o ve ane mie ndaa éziñ, nye a nga kui atan mame tyé na a nyoñe bebo bisaé asu afube mindi’i mi woon dé. Éyoñ a kuiya tyiñ a bebo bisaé, a mbe na a ya’ane be denié wua e môs, a nga lôme be afube mindi’i mi woon dé. Éyoñ a beta kui atan bebé mewolo ébul, a nga yene befe be tele teke jôm ba bo, nde a jô balé bete na: Mia fe kelan afube mindi’i mi woon, ma ye ve mia tañ ja yian. Ane be nga ke. Nde a beta kui atan bebé zañe môs a mewolo melale ya mame ngô’é a bo avale da. Akui a kui atan bebé mewolo metan ya mame ngô’é ve koone befe be tele, nye be na: Amu jé mi tele va ngume môs teke bo jôm? Be nga jô nye na: Amu môt éziñ a nji nyoñe bia bisaé. Nye be na: Mia fe kelan afube mindi’i mi woon.”​—Matthieu 20:1-7, Mfefé Nkôñelan.

Éyoñe bôte ba vô’ôlô Yésus ba wô’ô ane a kobô ajô “Éjôé ya yôp” a “mie ndaa,” ba yiane simesane Yéhôva Zambe. Mintilan mia liti Yéhôva ane masa ya afube woon, afube woon e too ndeme ya Ayoñ Israël. (Besam 80:8, 9; Ésaïe 5:3, 4) Bôte be ne élate ya Atiñe si be ne ane bebo bisaé y’afube woon. Ve e nkana ôte, Yésus a nji kobô asu mam me lôteya; a viane liti jam da boban melu mé.

Betebe ôsu ya ñyebe, ane Bepharisien be ndôme ve’ele Yésus ajô ya ntyaman aluk, ba yiane bo Zambe ésaé éyoñ ése. Be ne ane bebo bisaé ba saé ngumba môs a yange na be ve be ma’ane map, denié wua asu môs.

Beprêtre a bôte befe be ne valé ba yene na, jama bôt a nji kañe Zambe aval da yian, na be ne ane bebo bisaé ba saé étun éyoñ afube mindi’i mi woon. E nkana Yésus, bôte bete be ne ane bôte ba te ke nyoñe na be ke saé “bebé mewolo ébul” ya mame tyé nge mvuse ya valé (e zañ môs, mewolo mela ya mame ngô’é, a e memane, mewolo metan ya mame ngô’é).

Ba yene befam a binga ba tôñe Yésus ane bôte be ne “biyo’é.” (Jean 7:49) Be nga lôt abui éyoñ ényiñe jap na ba bo ésaé ñyobane kos nge be bé mefup. Mvuse ya valé, amane ya mbu 29 É.J., “mie afube mindi’i mi woon” a nga lôme Yésus na a nyoñe bôte bete, ba ba sili bebiene si na be ke bo Zambe ésaé ane beyé’é be Krist. Be ne “ba be tele mvus” Yésus a jô be, bebo bisaé ya mewolo metan ya mame ngô’é.

Yésus a mane nkana wé a liti’i jame da boban mame ngô’é éyoñ ésaé é maneya a jô’ô na: “Éyoñe ngô’é é nga kui, mie afube mindi’i mi woon a nga jô nkalakume wé na: Lo’one bebo bisaé a ve be ma’an, ataté ba be nga su’ulane nyoñeban a kui ba be nga taté nyoñebane bisaé. Nde ba ya mewolo metan ya mame ngô’é ba so a nyoñe denié wua môt ase. Éyoñe ba be nga taté nyoñeban be soya be buni’i na ba ye nyoñ a dañe ba bevok, ve be fe be nga nyoñe denié wua môt ase. Éyoñe be nyoñeya, ve taté na ba so’o mie ndaa be jô’ô na: Besu’ulane so ba ba te saé ve awolo da, wo ya’ane be ane bia aya, e bia bia te jibi ayôñ a adite ya ngume môs? Mie ndaa ve yalane wua ya be be na: A mvôé jam, me nji bo ékotekot mfa’a wôé; ye bia wo bi nji kui tyiñ ajô denié wua? Nyoñe denié wôé ô ke. Ma ve môte nyôna denié wua fe ane wo. Ye me nji bi ngule ya bo biôme biam ane ma kômbô? Nge na ye dise dôé da yen abé ane me ne mbamba môt? Nalé ate ñhe ba be tele mvus ba ye tebe ôsu a ba ya ôsu ba ye tebe mvus.”​—Matthieu 20:8-16, Mfefé Nkôñelan.

Memane ya nkana ôte me ne bo na beyé’é be kam. Aval avé betebe ôsu ya ñyebe Bejuif, e bôte ba yene bebien ane “ba ya ôsu” ba ye su’ulane “tebe mvus”? A aval avé beyé’é be Yésus ba ye su’ulane “tebe ôsu”?

Beyé’é be Yésus, e bôte Bepharisien ba yen ane “ba be tele mvus” mbe be nga zu “tebe ôsu” asu ya na be bi ma’ane map. Éyoñe Yésus a ye wu, Zambe a ye lum ayoñ Israël mvus, a tobe mfefé ayoñ, “Israël ya Zambe.” (Begalate 6:16; Matthieu 23:38) Jean Baptiste a nga kobô ajô y’ayoñ ete éyoñ a nga kobô ajô ya mbaptizô wo zu ôsu a zene ya mbamba nsisim. Bôte ba too “mvus” ba ye bo bôte b’ôsu ba ye bi mbaptizô ôte a bo bengaa be Yésus “akekui meku’u mese ya si nyô.” (Mam Minlôman 1:5, 8, Mfefé Nkôñelan; Matthieu 3:11) Nge beyé’é ba kôme wô’ô ntyendane Yésus a jôô wô va, be ne ngule ya ve’ele wô’ amu jé betebe ôsu ya ñyebe ba ye feme be, mbe bete ba ye bo bôte ba “su’ulan.”