Kalate a so Tin ékôan

A bobejañ a bekale bangane bia nye’e:

Nye’ane bia nye’e Zambe a bôte wo tindi bia na bi ‘ke . . . bo bôte ya meyoñe mese beyé’é, a du be.’ (Matt. 28:​19, 20; Marc 12:​28-31) Bia yiane nye’e bôt a nlem ôse. Avale nye’an éte é ne nambe minleme mi ‘bôte bese be bili mbamba été nsisim asu ényiñe ya nnôm éto.’—Mame mi. 13:48.

Melu mvus, bi mbe bi dañe’e jeñe na bi tôñe fatane mboone bia koone je bive’ela ya tôñ, a ve bôte bekalate. Ve melu ma, bia jeñe na bi tu’a yem avale bi ne taté minlañ. Mbôle bia kômbô liti bôte na bia nye’e be, jôme te nje bia kobô be ajô ya minlô mejô mia nambe be minlem. Ajô te, bia yiane bo nkômesane ya tyendé minlô mejô miangan a nyoñ éyoñe ya fase minju’u bôte ba tôbane mie a mame ba nye’e. Aval avé nsoé kalate wu wo ye volô bia na bi tôé nsôñan ôte?

Nsoé kalate wu ô bili meyé’é 12. Meyé’é mete ma kobô ajô ya mefulu bia yiane bi asu na bi liti bôte nye’an a bo be beyé’é. Mbôka’a ya ayé’é ése ô tii e mame Yésus nge ke bekañete mbamba foé béziñe ya ntete mimbu ôsu be nga bo. Wo ngôné mefulu be nga liti ésaé nkañete jap. Nsôñan ô nji bo na bi yeme ba’alane mejô bia koone me bive’ela ya tôñ, ve na bi jeñe mezene ya liti bôte bia be be bia laane nye’an. Akusa bo na mefulu mese me ne mfi éyoñe bia bo ésaé nkañete, ve bia zu ngôné ma ma dañe mfi asu na bi yeme taté minlañ, bi yeme bo minjoman a yeme taté meyé’é.

Éyoñe wo ye bo ayé’é ése, nyoñe’e éyoñe ya fas aval ô ne liti fulu ése. Fasek avale wo fe ô ne belane fulu éte éyoñe wo laan a bôte ya vôm ô too. Bo’o na nye’ane wo nye’e Yéhôva a bôte bevok ô tu’a bo ngul. Sa ke ngum avale mboone mam éziñ, ñwô wo ye volô wo na ô bo bôte ya meyoñe mese beyé’é. Ve jame da ye volô wo é ne nye’ane wo nye’e bôt.

Bi ne meva’a ya bo ésaé Zambe a nga ve bia nsamba a mia. (Soph. 3:9) Ngo’o nge Yéhôva Zambe a botane mia, amu mia ke ôsu a liti nye’an a bo bôte beyé’é!