Éyoñe beta ébubua a kui

“Atata’a, bi mbe te yem jé bi ne bo. Ndône mendim é nga bo na si é bu’i, ane bi nga mane jañele biôm biangan bise.”—Andrew, Sierra Leone.

“Éyoñ ôkôs ô lôteya, bi nga bulane nda. Bi nji koene ve ndôndo. Bi nga li’i menyu me yoo. Ngo jam ve ku, é nga yôn.”—David, Îles Vierges.

NGE ô nga fam awu mvus ébubua éziñ, ô ne yeme tebe été bôte ba: éko éziñ wo wô’ô v’ane wo te jimbi jôm éziñ, ô kate’e kañese jame da te boban, fe’ é ne wo njañan, nlem ô tyele wo yôp, wo bo fe bekô’ôbulu. Nlem ô wô’ô taé abui bôt ébubua é nga bi aval é ne na, be nji beta bi nkômbane ya k’ôsu a bu’uban ényiñ.

Nge ô nga jañele biôme biôé bise éyoñ ébubua é nga kui, wo fe ô ne wô’ôtane na minju’u mi kuiya wo ébe’e nja’a. Ô ne fe wô’ôtane v’ane é nji beta bo mfi na ô k’ôsu a bu’uban ényiñ. Ve jame da, Bible a liti na, é ne mfi na ô ke ôsu a bu’uban ényiñ, ô ne fe bi nya ndi nleme asu melu ma zu.

BENYA MEJÔÔ YA BIBLE BA VE BIA NDI NLEM

Kalate Écclésiaste 7:8 a jô na: “Asu’ulane jam e ne mvaé a dañ atata’a ya été.” Éyoñ ébubua é ndeme wo bi, ô ne bo te yeme jam ô ne bo. Ve mam me ne ke ma kômban ôte’ete’e ôte’etek nté wo jeñe na ô beta kôm ényiñe jôé.

Kalate Zambe a kobô ajô éyoñ “tyiñe ya du a tyiñe ya ñyôn bi aye bo te beta wô’é.” (Ésaïe 65:19) Jam ete da ye tôéban éyoñ Éjôé Zambe ja ye bo na si é bo paradis. (Besam 37:11, 29) Bibubua bi aye beta bo. Mintaé mise môt a ne bi mia ye jañe nnôm éto amu Zambe ya Ngul Ése a ka’ale na: “B’aye bo te simesane mame ya mvus, nge zu me nlem.”—Ésaïe 65:17.

Tame fas: Nté biôm bise a nga mane ta’a na a ‘ve wo ndi nlem,’ mbamba ényiñ éjôé jé si. (Jérémie 29:11) Ye e yeme benya mejôô bete a ne volô wo na ô k’ôsu a bu’uban ényiñ? Sally bia te jôô nye nlô ajô y’atata’a a jô na: “E simesane mbamba be mam Éjôé Zambe ja ye bo asu dangan melu ma zu a ne volô wo na, ô bo te beta simesane mame ya mvus, a na ô jibi minju’u wo tôbane mie den.”

Nga ô ne jeñe na ô yé’é abui mam afe a lat a mam Éjôé Zambe é mbeme zu bo asu bone be bôt? Nge ô bo nalé, ô ne tabe ndi na, akusa bo wo te juk amu ébubua wo te bi, ô ne k’ôsu a bu’uban ényiñe den, nté wo yange émo ja ye bo teke fe bibubua. Ve éyoñe ji, Kalate Zambe a ve melebe me ne volô wo na, ô dañe minju’u bibubua bia te so mie. Bi tame yene bone bive’an.

Bifuse ya Bible bi ne volô wo

Jeñe’e na ô kôme wo’on.

“E ne mvaé ya ve womien ôbe awo’on a lôte na ô tu’i nyôle jôé a mboon ésaé é ne teke yeme mfi y’été.”—Écclésiaste 4:6, Mfefé Nkôñelan.

Befase mam ba jô na “bôt ébubua ja te bi ba ye wô’ô nyul atek . . . a ba ye ke ji’a bo mvo’é nge be nji ke ôyo avale da yian.” Nde, e wo’on avale da yian a ne zene ya fek.

Kate’ aval wo wô’ôtan.

“Biyebe ya nleme môt bia tya’a nye, ve mbamba éfia a ve nye mevak.”—Minkana 12:25, Mfefé Nkôñelan.

Laan a ébu’a ya nda bôte jôé, nge mvôé ô too je ndi. Éyoñ wo kate be avale wo wô’ôtan, bibu’a ya nda bôte jôé nge bemvôé bôé be ne ngule ya volô wo a mbamba bifia, a be ne ve wo melebe ma ve ngule nyul.a

Simesa’an éyoñe mam mese ma ye bo mvo’é.

“Ve na, aval ane ntiñetane wé ô né, bi ayange mimfefé mi yôp a mfefé si, nne zôsô a to été.”—2 Pierre 3:13.

a E ne sili na môt a tabeya ayap nlem ô tyele nye yôp, nge nlem ô to nye tya’an, a ke yene dokita.