Ye wo yene fo’o mefulu me Yéhôva me nji yené ne fômelé?

Éyoñe wo fombô abeñe sam, ateté ya yôp, nge ke éyoñe wo wô’ô ane asô’ô da sôk, ye wo yene fo’o wo Nté biôm? Bitétéa bise bia bômane bia bia ye’ele bia mefulu me Yéhôva me nji yené ne fômelé. (Bero 1:20) Nge bia nyoñ éyoñe ya fase mame mise mangan ma yen, bia ye yene ngule Yéhôva, nye’ane wé, fe’e jé, zôsô wé, a anyebe dé.​—Bs 104:24.

Bitua bi mame bi Yéhôva bivé wo yene môs ôse? To’o wo nyiñe tison, ô ne yen anon, nge ke bilé. Nge wo nyoñ éyoñe ya fombô bitétéa bi Yéhôva, nalé a ne volô wo na ô bo teke dañe tyelé nleme wôé yôp, a ne volô wo na, ô telé mame ma dañe mfi ôsu. Wo ye fe wônô mbunane wôé, a tabe ndi na Yéhôva a ye ke ôsu a nyoñe wo ngap. (Mt 6:25-32) Nge ô bili bon, volô’ô be na be yene beta mefulu me Yéhôva. Nge bia ve ngule ya nye’e bitétéa bia bômane bia, bia ye dañe kabetane Nté wongan.​—Bs 8:3, 4.

YENE’E VIDÉO A NE NLÔ AJÔ NA, BITUA BI BIÔME ZAMBE A NGA TÉ BIA VE NYE DUMA: ÉFUFUP A MEYAÑ, MVUSE YA VALÉ, YALA’ANE MINSILI MI:

• Jé ja bo na bi yene biôme bi bili meyañe mevale meval?

• Éyoñe bia tyendé été bi tele, bi wô’ô yen v’ane biôme biziñ bia tyendé meyañ, jé é wô’ô bo nalé?

• Amu jé bia yen v’ane yôp e bili abui meyañ?

• Bitua meyañe bivé ya ntéane biôm ô yeneya bebé a vôm ô too?

• Amu jé bia yiane nyoñ éyoñe ya tu’a fombô bitétéa bi Zambe?