“Mewosane me ne jôme Yéhôva”

Mbu 1999, éjôé ya France é nga jô na Béthel ya France a yiane ya’ane toya a lat a mimveane be nga bi ataté mbu 1993 akekui mbu 1996. Bi nga jeñe na bi kôm ajô éte abui meba mejô, ve teke ndoñ. Mvus éyoñe bi kuya ajô e court d’appel, éjôé ya France é nga mane bia wôlé moné ase a mbe bia banque. Moné ate a mbe a lôte’e bemillion euros ényin a étun (2 947 500 000 fcfa.) Susu’a vôme bi mbe ve beta kee ajô éte a mbe CEDH. Ôsusua na ba kobô ajô éte, CEDH a nga jô na mengame mebaé me taté ke tôban ôsu greffier, nnye ate a bili mbe’e ya fase mame mese me tii a mejô ma kobane beta nda mejô ate, asu na be yen avale be ne kôm ajô éte.

Bi mbe bi yeme’e na bi bete bi sisik, greffier ate a ye yemete bia na bi ve éfase moné ya abim éjôé ya France é nga jô na bi ya’an. Ve bi mbe bi yeme’e na, e ve fo’o ve dolé da ya moné ate, a mbe a tyame’e miñye’elane ya Kalate Zambe. Bobejañe be nga bo mimvean asu na be su’u minsôñane ya Éjôé Yéhôva sa ke ji ya France. (Matt. 22:21) Bi nga ke tabe ékôan éte fo’o ve asu na bi semé nta’ane mame ya nda mejô éte.

Bi nga sulane mbamba aba ya nda mejô éte. Ékôan éte é nji taté mvo’é. Greffier a nga jô été été na Bengaa be Yéhôva ba yiane ya’an éfase moné ya toya éjôé ya France ja jô na be ve. Nsisime Yéhôva ô nga tindi bia na bi sili nye na, “Ye wo yeme fo’o na éjôé ya France é wôléya bia million ényiñ a étun é mbe bia banque?”

Minga a mbe greffier a nga wô’ô jam éte mbia ôlun. Éyoñe beloya ya France be nga bo’olô na éjôé é nga mane bia wôlé moné, ôsimesane minga ate a mbe a bili a lat a ajô éte ô nga tyendé. A nga kômekane be a telé ékôan. Bi nga yemelan été été na Yéhôva a nga tyiñelan ajô éte avale bi nji be bi buna’an. Bi nga kôlô ékôan éte bi too mevak, ve fe’e ne vema a jam é nga boban.

Ngone samane é too melu 30, mbu 2011, CEDH a nga tyi’i na bia bia kabe ajô. Be nga jô na bi nji yiane ya’ane toya ate, a yemete éjôé ya France na é mane bia bulane moné be nga wôlé, be nga futi fe abete yôp! Ntyi’an ôte ô nga bo na bebo bisaé be Yéhôva ya France be bo fili ya ke ôsu a kañ Ésa wop azukui den. Nsili wua bi nga sili ô mbe ve ane ôkôk ô nga nyiine Goliath mvom asu, ane mewosane me nga tebe. Amu jé bi nga kabe ajô éte? Amu, avale David a nga jôô Goliath, “mewosane me ne jôme Yéhôva.”—1 Sam. 17:45-47.

A nji bo ajô ôsu bia kabe le. Melu ma, bi kabeya mejô ôsu beta bijôé bi pôlitik a ôsu miñyebe mia wosane bia, beta meba mejô ya mesi 70. Abui meba mejô ya si ése e tyi’iya mejô Bengaa be Yéhôva 1 225. Mintyi’ane mejô mite mia kamane metiñe mangan, aval ane di ya kañese na bi ne ngume ñyebe, fili ya kañete mbamba foé, e ba’ale été ndeba’a étame jangan, a bene nyoñe metyi.

Jé é nga boban asu na me ke kobô mejô Europe, a too ke na me mbe me saék wofise Bengaa be Yéhôva e New York, États-Unis?

MBAMBA ÉVE’ELA MFA’A ÉSAÉ MISSIONNAIRE

Bebiaé bam, George ba Lucille, be nga kui sikôlô ya Galaad aba 12, éyoñe te be nga lôme be Éthiopie mbu 1956, mbu ôte ñwô fe me nga bialé. Be nga yôlé ma na Philip, aval ane nkañete mbamba foé ya ntete mimbu ôsu. (Mame mi. 21:8) Mbu ô nga tôé valé, éjôé é nga tyili ésaé nkañete jangane si éte. É ne été na me mbe mongô, ve me ngenane me simesan éyoñe nda bôte jam é mbe é kañe’e Yéhôva asoé. Me mbe me nye’e de! Ve mbu 1960, bijôé bi nga titane bia.

Éyoñe nda bôte jam é nga ke tabe Wichita, Kansas, États-Unis, bebiaé bame be nga kee mbamba jame wôé: ayôñe dap ésaé nkañete. Be nga ye’ele bia kale jam é mbe mvendé é too jôé na Judy, a mone monyañe wome Leslie, mbe bete be nga bialé fe Éthiopie avale bi ne nye’e Yéhôva a kañe nye a nlem. Me nga dubane me bili mimbu 13. Mvuse mimbu milal, nda bôte jam é nga ke suk ésaé nkañete vôme bekañete mbamba foé ba jemban Arequipa, Pérou.

Mbu 1974 éyoñe me nga bi fo’o ve mimbu 18, nde Béthel ya Pérou a nga lôme ma a bobejañe befe benyin ane bekpwa’a mefane be ne ngum aval. Bi mbe bi yiane ke kañete afôla bôte be mbe be ngenane teke kañete, e minkôle ya Cordillère des Andes centrales. Nalé a mbe fe a tina’ane na bia yiane kañete bebialé-bialé be mbe be kobô’ô nkobô Quechua a Aymara. Bi mbe bi kele’e wôé a metua a too ane nda. Ma nye’e avale bi mbe bi bela’ane Kalate Zambe na bi volô bôte bete na be yeme na Yéhôva a mbeme zu mane vaa minjuk, ane azoé, akon a awu. (Nlitan 21:3, 4) Abui ya be be é nga kañese mbamba foé ya Éjôé.

MA KE SAÉ WOFISE WO TEBELE ÉSAÉ BENGAA BE YÉHÔVA SI ÉSE

Mbu 1977 mojañ Albert Schroeder, ébu’a jia ya Tin ékôan a nga zu jome Béthel ya Pérou. A nga jô ma na me jalé afebe na me ke saé Béthel ya wofise wo tebele ésaé Bengaa be Yéhôva si ése. Me nga bo aval a nga jô. Mvuse mon éyoñ, Ngone samane é too melu 17, mbu 1977, me nga taté ésaé Béthel ya Brooklyn. Mimbu minyine mi nga lôte valé, me nga saé wofise wo bo mfuban a ba’ale Béthel.

Ngone samane ya mbu 1978, me nga ke tabe beta étôkan a nga boban Orléans Louisiana. Nne me nga tôban Élizabeth Avallone wôé, nye fe a nga yaé benya mejôô. Éyoñe me nga tôban Élizabeth, a mbe a boya ésaé nkpwa’a mefane tañe mimbu minyin. A mbe fe a yiik na a kee ésaé nkpwa’a mefane jé ôsu. Bia nye bi nga ke ôsu a laan. Mvuse mon éyoñ, nye’ane wongan ô nga bo ane nduan. Ngon awômô é too melu 20, mbu 1979, bia Élizabeth bi nga lu’an, a bi nga taté na bia saé Béthel.

Be nga taté lôme bia ékôane bekristene ya nkobô Espagnol e Brooklyn. Bobejañ a besita ya wôé be nga nyoñe bia a mevak. Ane mimbu mi nga lôt, bi nga ke bikôane bekristene bife bilal, a bobejañe be nga ve bia ngule nyul asu na bi kee ésaé ya Béthel ôsu. Bia kôme nye’e ngul ése bobejañe bete be nga ve mfa’a ya su’u bia. Bemvôé bangan a nda bôte jangane fe be nga volô bia na bi nyoñe ngap a bebiaé bangane be mbe be ntoo minnôm.

MA KE SAÉ WOFISE WO KAMANE BEBO BISAÉ BE YÉHÔVA MEBA MEJÔ

Ngon ôsu ya mbu 1982, me nga teme ba nga lôme ma na me ke saé wofise wo kamane bebo bisaé be Yéhôva meba mejô. Mvuse mimbu milal, be nga jô ma na me ke bo sikôlô beloya. Me mbe mevak éyoñe me nga yeme na, abui fili bôte ba bu’ubane de États-Unis a mesi mefe, é ne amu Bengaa be Yéhôva be nga kabe abui mejô meba mejô. Bi nga sañetane mame mete abui biyoñ aba sikôlô.

Mbu 1986 éyoñe me nga bi mimbu 30, be nga telé ma ntebele ya wofise wo kamane bebo bisaé be Yéhôva meba mejô. Mbôle me mbe me ngenan ésoé, me nji be me yeme’e ésaé ja yange ma. Me mbe mevak, ve nlem ô mbe fe ô tyele ma yôp.

Mbu 1988 me nga kui sikôlô beloya. Ve mbia jam a ne na, sikôlô ate a nga bo na me bo teke beta bi éyoñ asu mame ya nsisim a bo na élate jam a Yéhôva é kômbô ndaman. Beta besikôlô be ne bo na ô bi nkômbane ya wumulu womien, a éyoñ ô nga yem abui mam, ô ne taté na wo biasé bôte bevok. Nte na Élizabeth a nga su’u ma abui mfa’a ôte. A nga volô ma na me beta taté na ma bo mame ya nsisim avale me mbe me bo’o ôsusua na ma ke sikôlô ate. Jam éte é nga nyoñe ma abui éyoñ, ve me nga beta wône nsisim. Me ne ngule ya jô na e bi abui ñyeman a lat a mame méziñ, a nji bo jame da dañe mfi ényiñ. Jame da dañe mfi ényiñe môt é ne na a bi mbamba élat a Yéhôva a nye’e nye a bôte bé nya abuii.

MA KAMANE MBAMBA FOÉ A BO NA A KE ÔSU A KATEBAN

Éyoñe me maneya sikôlô, me nga taté na ma ve ngule jam ése mfa’a ya su’u wofise wo kamam ésaé bebo bisaé be Yéhôva meba mejô, wo kaman ékôane Yéhôva a volô bebo bisaé be Yéhôva na be bi fili ya ke ôsu a kañete mbamba foé. Ésaé éte é mbe fo’o abeñ, ve é mbe fe é bili minjuk amu mame me mbe me tyendé’é abui ékôane Yéhôva éyoñ ése. Éve’an é ne na, bi mbe bi bili fulu ya sili bôte mimvean éyoñe bia ve be bekalate, jôme te nje, mbu 1991, be nga jô wofise wo kamane bebo bisaé be Yéhôva meba mejô na ô yene jam ô ne bo asu na ô telé mboon ôte. Mvuse ya valé Bengaa be Yéhôva be nga taté na ba ve bôte bekalate zezé. Jam éte é nga bo na ésaé ya Béthel é bobane tyi’ibi, a na bijôé bi bo teke beta yene fane ya jô bia na bi ya’ane toya. Bôte béziñe be mbe be simesa’ane na ntyendan ôte wo ye bo na moné a man a bo na ésaé nkañete é bo teke beta wulu mvo’é. Ve sa ke nde mame me nga bobane nalé. Ataté mbu 1990, tañe bebo bisaé be Yéhôva é nga ke ôsu a nenenen, a melu ma, bôte ba ke ôsu a bi bidi ya nsisime bi ne ngule ya nyii binyiñe biap zezé. Mamiene me nga kôme yene na, ngule Yéhôva a ve ôlo ô ne mewôk a fek, nje fo’o ja bo na mintyendane mi boban ékôane jé a na mame me wulu mvo’é.—Nkôl. 15:2; Matt. 24:45.

Nge bia kabe abui mejô, a nji bo amu bia dañ atyeñ. Ve abui biyoñ, jam é wô’ô tindi bijôé na bi nyoñ avale ntyi’an ôte, é ne amu mbamba ntabane bebo bisaé be Yéhôva. Me nga yene jam éte mbu 1998, éyoñe bibu’a bilale ya Tin ékôan a binga bap be nga ke tabe étôkan é ne ngum aval é nga bobane Cuba. Mbamba nleme wop a ésemé jap a nga bo na bijôé bi kañese été jangan a lat a mame me pôlitik éyoñe bi nga laan a be bikôan.

Ve éyoñe bia kate kui tyiñ a bijôé mfa’a ya fili jangan, ‘bi wô’ô kamane mbamba foé’ meba mejô. (Philip. 1:7) Éve’an é ne na, tañ abui mimbu, bijôé ya Europe a bi ya Corée du Sud bi nga bene kañese fili jangane ya top ésaé éfe a lôte na bi bo ésaé bezimbi. Jam éte é nga bo na be futi bobejañe béziñe 18 000 ya Europe a bobejañ a lôte 19 000 ya Corée du Sud mimbôk, amu be nga bene nyiine bezimbi étome mone môte ya nleme wop.

Ngone zangbwale é too melu 7, mbu 2011, CEDH a nga nyoñe beta ntyi’an ajô é mbe é fombô’ô mojañe Bayatyan v. ya si ya Arménie a jô’ô na bijôé bise ya Europe bia yiane kañese na môt a bo ngule ya top ésaé éfe a lôte na be yemete nye ésaé bezimbi. Avale ntyi’an ôte nde fe é nga nyoñebane Corée du Sud Ngone samane é too melu 28, mbu 2018. Bi nji ye kabe ajô éziñe nge bobejañe béziñe be nga ye tyi’i na ba bo nkômbane bijôé.

Wofise wo kamane bebo bisaé be Yéhôva ô ne Tin ékôan, a ba ya be Béthel ya si ése, ba saé a ngule jap ése asu na be kamane fili jangane ya ke ôsu a kañe Yéhôva a bo ésaé nkañete. Bi ne angôndô ya meva’a ya kamane bobejañ a bekale bangane bijôé bia tibili. To’o bia kabe mejô nge momo, bi bili fane ya kañete bengovina, bejô bôt a meyoñe mese. (Matt. 10:18) Betyi’i mejô, bengovina, bôte mefoé a bôte bese, be wô’ô bi fane ya wô’ô mbamba foé a yene na mame bia buni ma so Kalate Zambe. Bôte be bili mbamba été nsisime be wô’ô bi fane ya kôme yeme Bengaa be Yéhôva. Bôte béziñe ya été be wô’ô su’ulane zu kañe Yéhôva a bia.

MA VE YÉHÔVA AKIBA!

Tañe mimbu 40 a mvuk, me nga bi mvome ya saé a abui bobejañe ba saé wofise wo kamane bebo bisaé be Yéhôva meba mejô e si ése. Me nga ke fe kobô mejô beta meba mejô a tôbane beta betyi’i mejô. Ma nye’e bobejañe bia be be bia saé wofise wongan, a ba bese ba saé bewofise bete si ése. Me nga bu’ubane fo’o abui bibotan ényiñe jam.

Élizabeth a te su’u ma a nye’an ôse mimbu 45 mia te lôte mi, mbamba biyoñ a mbia biyoñ. Ma nye’e nye angôndô, amu a mbe a bo’o jam éte akusa bo a mbe a bili ngul ôkon é mbe é bo’o nye na a kate beta saé a ngule jé.

Bi nga kôme yé’é na ngule ya kabe mejô é nji so amu atyeñe mboone mame dangan. Avale David a nga jô: “Yéhôva a ne ngule jangan.” (Bsa. 28:8) Nya ajôô a ne na, “mewosane me ne jôme Yéhôva.”