Ye Bengaa be Yéhôva be nga bo na Kalate Zambe wop a lu’an a mame ba buni?

Momo, bi nji bo nalé. Ve, éyoñ ébiene bi nga yene na, mame méziñe bia buni me nji lu’an a Kalate Zambe, bi nga tyendé me.

Ôsusua na bia taté na bia kuli Traduction du monde nouveau, mbu 1950, bi nga nyoñ éyoñe ya kôme yé’é Kalate Zambe. Bi nga belane minkôñelane mi Kalate Zambe mise mi mbe éyoñ éte, bi nga jeñe fe na mame bia buni me wô’é a mame bi nga bo bi yé’é été. Womien, tame yen bone bive’ela biziñ ya mame Bengaa be Yéhôva ba buni, asu na ô yen nge ma lu’an a miñye’elane ya Kalate Zambe.

1. Mame bia buni: Zambe a nji bo bôte bela. Kalate bi mbe bi loene na, Le Phare de la Tour de Sion ya ngone 7, mbu 1882 a too Ngone zangwale, a mbe a jô’ô nkobô Inglis na: “Bôte ba lañe bekalate bangan ba yeme na, akusa bo bia buni Yéhôva, Yésus, a mbamba nsisim, bi nji kañese miñye’elan mia jô na, Yéhôva, Yésus, a mbamba nsisim be ne Zambe wua bôte bela, amu ñye’elan ôte ô nji so Kalate Zambe été.”

   Avale Kalate Zambe a jô: “Yéhôva Zambe wongan a ne Yéhôva wua.” (Deutéronome 6:4, Kalate Zambe Nnôm ba Mfefé) “Ve mfa’a wongan, Zambe a ne wua, nnye a ne Esa, nyô biôm bise bi aso e be nye, bia fe bi ne ve amu nye; a Nti a ne wua, Yésus Krist, nyô biôm bise bi nga so amu nye, bia fe bi too amu nye. (1 Becorinthien 8:6, Kalate Zambe Nkôñelane Rev. Matthias Meye) Yésus émien a nga jô na: “Tate a dañe ma.”​—Jean 14:28, Kalate Zambe Mfefe Nkôñelan.

2. Mame bia buni: Kalate Zambe a nji kobô ajô nduane kom. Kalate bi mbe bi loene na, Le Phare de la Tour de Sion ya ngone 6, mbu 1882 a mbe nlô ajô na “La solde du péché, c’est la mort.” Nlô ajô ôte ô mbe ô tii a kalate Beromain 6:​23, nkôñelane ya Bible du roi Jacques. A mbe a jô’ô nkobo Inglis na, “Mejô mete me ne angôndô ya tyi’ibi, ma nyiine fe melo ne sañesañ. Ve a ne jame ya kame na, bôte ba jô na be bili mbunan, a na ba nyoñe Kalate Zambe ane mejô me Zambe, ba ke ôsu a sôane mejô mete. Ba kôme bele jô na Kalate Zambe a ye’ele na, ma’ane ya abé me ne ényiñe ya nnôm éto e nduane kom.”

   Avale Kalate Zambe a jô: Bôte be nji bo Zambe mewôk b’aye ke di’i nduane kom, ba ye “[jañ] nnôm éto”​—2 Bethessalonicien, Kalate Zambe Nkôñelane Rev. Matthias Meye.

3. Mame bia buni: Éjôé Zambe é nji bo minleme mi bôt été, é ne fo’o nya Éjôé. Kalate bi mbe bi loene na, Le Phare de la Tour de Sion ya ngone 12, mbu 1881 a mbe a jô’ô na: “Éyoñ éjôé te ja ye tebe, ja ye mane jiane bijôé bise bi ne si va.”

   Avale Kalate Zambe a jô: “Melu ya bejô bôte bete, Zambe ya yôp a ye telé, ayoñe d’aye bo te jañe nnôm éto, nalé fe njôane ya été w’aye bo te li’i mo me ayoñ bôt afe; ve ayoñ ete d’aye bu’u meyoñe mete mese bitun a di me, a d’aye tebe nnôm éto.”​—Daniel 2:​44, Kalate Zambe Nnôm ba Mfefé.

Ye Bengaa be Yéhôva ba belane ve Traduction du monde nouveau éyoñe ba nkañete?

Momo, bia ke ôsu a belane minkôñelane mi Kalate Zambe mife asu ésaé nkañete jangan. Ja’a na bia ve môt bia be nye bia yé’é Kalate Zambe Traduction du monde nouveau e zezé, bia wô’ô fe meva’a ya yé’é a bôte ba zômbô minkôñelane mi Kalate Zambe mife.