E yene zen

YE WO YENE WOMIEN ANE MÔT A NE MEVAK? Nge nalé, jé ja bo wo na ô bo mevak? Ye nda bôte jôé, ye ésaé jôé, nge ke mbunan ô bili asu ñyebe wôé? Eko éziñ na ô ne ôjeja’a ya yene jôm éziñ ô ne bo asu na ô bo mevak, ane e mane bo besikôlô, e yene mbamba ésaé, nge ke kuse mfefé metua.

Bôt abui ba wô’ô abim ava’a éziñ éyoñe ba tôé nsôñan, nge bi jôm éziñe ba too be yange’e. Ve ava’ ete da tabe abim éyoñ avé? Biyoñ biziñ e wô’ô ji’a man, a nalé a bo na be bi ate’e nlem.

Bôte ba jô na, mevak me ne été môt a tele éyoñe mam mese ma wulu nye mvo’é mvo’é; a nalé a yené éyoñe bôt a nye’e ba bômane nye, éyoñ a bili bone be mam ba ve nye nlem avak, nge beta be mam ma bo na a wô’ôtane mefo’o y’ényiñ, a nkômbane ya na mam mete me ke ôsu a boban.

A nde fe, mbôle meva’a me ne jôme ba wô’ôtan ayap, me tii a aval ényiñe môt a nyiñ, sa ke a biôm a bili ényiñe jé. E jô na, “Mé wô’ô mevak éyoñ . . .” a ne na wo jô na, mevak mete me nga’an ôsu, ô ngenane teke me bi.

Bi tame nyoñ éve’an: bi tame ve’e mevak a mvo’é ya minsôn. Aval avé bi ne bu’uban a mvo’é ya minsôn? Bia jeñe na bi yeme tobe bidi bia di, na bi bo sport a mam mevok ma volô na, bi bi mvo’é ya minsôn. Aval ete fe, meva’a ma so éyoñe bia tobe mbamba zen ényiñe jangan, a tôñe melebe me ne mfi ényiñ.

Melebe mevé nge ke aval ényiñ avé da liti na bia tôñe zene ja soo mevak? Ja’a na melebe méziñe me ne mfi a dañe ma mevok, ma ma zu si valé le me ne nya mfii:

• E VAK A ABIME BI BILI A E BO ANYEP

• MVO’É YA MINSÔN A E YEME YEMBAN

• NYE’AN

• NJAMAN

• NSÔÑAN ÉNYIÑ

• NDI NLEM

Beta kalate a ne njalan a fek abui bôte da semé a jô na: “Ebotan a ba be ne te bijô e mezene map été.” (Besam 119:1, Mfefé Nkôñelan) Bi tame fase zen éte.