8 Éve’ela

JÔME NALÉ A TINAN

Bebiaé ba liti bone bap éve’ela, ba bo mame ba ye’ele. Éve’an é ne na, ô vo’o yi na mone wôé a bo teke laane minsos nge a jaé wô’ô wo ô jô’ô na, “Kate nye na me nji bo nda,” éyoñ ô nji kômbô laan a môt éziñ a te so nda.

“Abui bôt da yeme nkana wu: ‘Bo’o avale ma jô, sa ke avale ma bo.’ Ve ñye’elan ôte ô nji bo mvo’é asu bongô. Be ne aval ane éponge, ba vili jôm ése bia jô a mam bia bo, a ba ye kate bia éyoñ éve’ela jangan é nji lu’an a jam bia jeñe na bi ye’ele be.”​—David.

ÑYE’ELANE YA BIBLE: “Wo, wo akate na, môt a ne te yiane wup, ye wo awup?”​—Beromain 2:21.

AMU JÉ É NE MFI

Bongô, ja’ane bisoé ba vu bebiaé bap a lôte bôte bese bevok, ja’a avale ba bo mam. Nalé a tinane na, ô ne ngule ya bo môt ôsu a telé bone bôé e nya zene, vengevenge ve wo bo mame wo ye’ele.

“Bi ne ba’alane jam éziñe biyoñe ntet, bi sili’i biabebien nge mone wongan a wôk, ve nge bi ve’ele bo teke bo mame bia jô fo’o ve éyoñe jia, mone wongan a ye kulane de. Bongô ba fombô jôm ése bia bo, ja’a éyoñe bi nji simesane na ba bo de.”​—Nicole.

ÑYE’ELANE YA BIBLE: ‘Fe’e ja so yôp é ne . . . teke bebadu’u.’​—Jacques 3:17, Mfefé Nkôñelan.

JAM Ô NE BO

Fase’e abo dulu womien ô bili. Wo yen avale minvôman avé? Wo belane minga wôé a bone bôé aya? Ô bili avale bemvôé avé? Ye wo nyoñe bôte bevo’o ngap? Bi ne jô tyi’ibi na, ye womien ô ne avale môte wo yi na bone bôé be bo?

“Bia nnôme wom bi nji ve bone bangan ñye’elane biabebien bi ne teke tôñ.”​—Christine.

Sili’i njaman éyoñe wo bo bikop. Bone bôé ba yeme na ô ne mbo mam abé. Éyoñe wo jô nyo ngal a bone bôé na, “Jamé’é ma” éyoñe wo bo ékop, wo ye liti be mbamba ñye’elane mfa’a ya bo zôsô a éjote nyul.

“Bone bangan ba yi na be yen ane biabebien bia meme bikobe biangan a ba yi fe na bi sili njaman. Nge bi teke de bo, be’ fe ba ye ke yé’é na be mem bikobe biap.”​—Robin.