Mfi ya yeme jam é ne mvaé a di é n’abé

E YEME JAM É NE MVAÉ A DI É NE ABÉ A TINAN AYA?

Bôte be bili mbamba ñye’elan ba yeme kandé mvaé a abé. Be nji nyoñe mintyi’ane mi tii a jam ba wô’ôtan nlem été éyoñ be tele été éziñ. Miñye’elane be nga bi a lat a jam é ne mvaé nge abé mmie mia wulu mintyi’ane ba nyoñ, ja’a bôte be nji lôô be.

AMU JÉ E NE MFI YA YEME JAM É NE MVAÉ A DI É NE ABÉ?

Bongô be sikôlô bevok, mezik ba wôk, befilm a mam mese mevo’o ba liti bingeñgeñ, bia futi bongô ôsimesan ô nji yian nlô a lat a jam é ne mvaé a di é ne abé. Avale mam ete é ne bo na be taté na ba sôane miñye’elane be nga bi a lat a jam é ne mvaé a di é ne abé.

Beta nju’u bisoé bi bili fo’o le. Avale kalate Beyond the Big Talk a jô, “e ne mfi na be yeme na, abui bôt da ye tindi be na be bo mam méziñ asu na bôte bevo’o be nye’e be. Ba yiane fe nyoñe ntyi’ane ya bo mam me ne mvaé, to’o bemvôé bap be nji nye’e de.” Bebiaé ba yiane fo’o jeñe na be yañele bone bap ôsusua na ba bo bisoé.

AVAL Ô NE YE’ELE NYE JAM É NE MVAÉ A DI É NE ABÉ

Tuka’a ye’ele nye nsela’ane a ne zañe mvaé a abé.

ÑYE’ELANE YA BIBLE: “Ve benya bôtô . . . be mbili ngule ya yemelane jôm é ne abé a ji é ne mvaé.”​—Behébreu 5:14, Mfefé Nkôñelan.

• Bela’ane bifia bia liti na jam éziñ é ne mvaé nge abé. Bela’ane mam ma kui môs ôse na ô liti nsela’ane a ne zañe: “Jam é ne zôsô a di é ne ékotekot.” “Jam é ne été a di é ne minsos.” “Mbamba nlem a mbia nlem.” A zen éte, nyo mon a ye yé’é mam a yiane bo a ma a nji yiane bo.

• Liti’i nye amu jé jame si jame ka é ne mvaé nge abé. Ô ne sili nye na: Amu jé é ne mfi ya bo zôsô? Aval avé minsos mi ne ndaman amvôé? Amu jé wup ô ne abé? Bela’ane mbamba mfasan a ne volô nyo mone na a yeme kandé mvaé a abé.

• Liti’i nye bibotan a ne bi nge a bo mam me ne mvaé. Ô ne jô nye na: “Nge ô ne zôsô, bôte bevok ba ye tabe ndi a wo” nge na “Nge ô ne mbamba nlem, bôte ba ye subu wo bebé.”

Bo’o na nda bôte jôé ése é tôñe miñye’elane mite.

ÑYE’ELANE YA BIBLE: “Ve’ela’ane miabebien.”​—2 Becorinthien 13:5.

• Nge nda bôte jôé ja ve ngule na é bo mam me ne mvaé, wo ye ke ko woñe ya jô na:

  • “Bi nji laane minsose nda bôte jangan.”

  • “Bi nji bo njet nge bame bôte bevok.”

  • “Bi nji belan ayete nkobô nge ta bôte bevok.”

Nyo mon a ye yene na ntyi’ane ya bo mam me ne mvaé ô nji bo ve zezé metiñe ya semé, ve wo liti avale nda bôte mi né.

• Bo’o mbane ya laan a nyo ajô mintyi’ane mite. Bela’ane mam ma kui môs ôse na ô ve nye miñye’elan. Ô ne ve’e mintyi’ane mi bili a mi mia veban e télé nge ke sikôlô. Ô ne sili nye na: “Jé ô nga ye bo?” “Aval avé nda bôte jangan é ne dañe jame di?”

Yemete’e ntyi’ane wop ya bo mam me ne mvaé.

ÑYE’ELANE YA BIBLE: “Mi bii’ mbamba mone môte ya nlem.”​—1 Pierre 3:16.

• Se’e be éyoñ ba te bo mbamba jam. Éyoñ ése nyo mon a bo jam é ne abeñ, se’e nye a kate nye amu jé jam a te bo é ne mvaé. Ô ne jô nye na: “Wo te fo’o bo zôsô. Ma wô’ô wo mvaé.” Nge a meme mbia jam a te bo, taté se’e nye amu a te bo zôsô ôsusua na wo foñôsô nye.

• Foñôsô’ be éyoñ ba te bo mbia jam. Volô’ô bone bôé na be kañese fonose ya mbia jame ba te bo. E ne mfi na be yem amu jé jam ba te bo é ne abé, a aval avé mboon ôte wo selan a miñye’elane ya nda bôt. Bebiaé béziñ ba wô’ô aval étam éyoñ mone wop a ‘wô’ô émien éngôngol’ amu ba te nye ve melep; ve e liti nye na jam a te bo é ne abé a ye volô nye na a bi mone môte ya nlem a yeme kandé mvaé a abé.