Ñye’elane 3

Za ane Yésus Krist?

Amu jé b’aloene Yésus na “ntôle mone” Zambe? (1)

Amu jé b’aloene nye na “Efia”? (1)

Amu jé Yésus anga zu si a too môt? (2-4)

Amu jé anga bo mesimba? (5)

Jé Yésus ébo ana’ana? (6)

1. Yésus anga taté nyiñe yôp a too nsisim ôsusua na azu si nyô. Ambe étetéa ôsu Zambe. Jamete b’aloene nye na “ntôle mone” Zambe. (Becolossien 1:15; Nlitan 3:14) Yésus étam ane mone Zambe émien anga té. Ôsusua na azu bo môt, Yéhova anga belane nye ane “beta ntyetyeñ mbo ésaé” amu na a té biôm bise bivok bi ne yôp a si. (Minkana 8:22-31; Becolossien 1:16, 17) Zambe anga belane fe nye aval ane beta nkalane mejô wé. Jamete nde b’aloene nye na “Éfia.”—Jean 1:1-3; Nlitan 19:13.

2. Eyoñ Zambe anga lôme mone wé si nyô, anga futi ényiñ jé abum be Marie. Jamete ésaa Yésus anji bo môt a binam. Amu nalé, Yésus anji bialé a nsem nge a abé éziñ. Zambe anga lôme Yésus si nyô amu mam mela: (1) na azu bia ye’ele benya mejôô mfa’a ya Zambe (Jean 18:37), (2) na a liti zôsôa ntaban, a ve bia éve’ela’a bi ayiane tôñ (1 Pierre 2:21), a (3) na azu ve ényiñ jé na a kôté bia abé a awu. Amu jé énga yiane nalé?—Matthieu 28:20.

3. Eyoñ Adam anga bo Zambe melo, anga bo jame Kalate Zambe a loene na “nsem”. Ajôte Zambe anga tyi’i na a yiane awu. (Metata’a 3:17-19) Amu anji fe beta jalé mintelane mi Zambe, nde anji beta bo zôsôô mise mé. Ane anga taté na a yômbô, akekui anga wu. Adam anga kalane bone bé abé. Ajôte bia fe, bi ayômbô, a kon, a wu. Aval avé bôt be ne kôteban?—Beromain 3:23; 5:12.

4. Yésus ambe môt ane teke abé éziñ aval ane Adam. Ve da Yésus anga bo Zambe mewôk to’o éyoñ anga tôban ngule meve’ele; vôm ate nye a selan Adam. Ajô te anga too ngul ya ve ényiñ jé na a ya’ane abé Adam. Kalate Zambe a loene jamete na “Ntañ”. Nalé a volô na bone b’Adam be kôteban awu. Bôt bese b’abuni Yésus bene yene njaman minsem, a bi ényiñ ya nnôm éto.—1 Timothée 2:5, 6; Jean 3:16; Beromain 5:18, 19.

5. Eyoñ Yésus anga too si va, anga saé minkôkon, a ve bôt bidi, a telé akôs. Anga wômôlô fe mimbim. Amu jé anga bo mesimba? (1) Anga wô’ô bôt be bili minjuk éngôngo a kômbô volô be. (2) Mesimba mete me nga liti na ane mone Zambe. (3) Mesimba mete me nga liti fe mam ébo bôt mewôk éyoñ ébo njôé ya si nyô.—Matthieu 14:14; Marc 2:10-12; Jean 5:28, 29.

6. Yésus anga wu; ve Zambe anga wômôlô nye a to nsisim na a bulane yôp. (1 Pierre 3:18) A taté éyoñ éte Zambe anga télé nye njôé. Ana’ana Yésus é mane vaa minjuk a abé ése si va.—Besam 37:9-11; Minkana 2:21, 22.

[Eve’ela ya afep 7]

Yésus anga so na ave minye’elan, a bo mesimba a ve fe ényiñ jé metuna’a