Ñye’elane 6

Jé éne éjôé Zambe?

Ejôé Zambe étele vé? (1)

Za ane njôô y’été? (2)

Ye bôt befe b’avolô nye jôé? Nge nalé, be ne tañaya? (3)

Jé j’aliti na bi anyiñe melu m’asu’ulan? (4)

Za mam éjôé Zambe j’ébo mfa’a bôt melu m’azu? (5-7)

1. Eyoñe a nga too si nyô, Yésus anga ye’ele beye’é bé na be ye’elan amu éjôé Zambe. Ejôé éne ngô’ane bôt é bili ngumba évet. Ejôé Zambe éne ngumba aval éjôé. Ejôé te étele yôp été, ve j’awulu mam ya si. J’éfubu éyôlé Zambe a ve je duma. J’ébo na nkômbane Zambe ô bo si aval ône yôp.—Matthieu 6:9, 10.

2. Zambe anga ka’a na Yésus é bo njôô y’èjôé jé. (Luc 1:30-33) Eyoñe Yésus anga too si nyô, anga liti na ébo njôé ane mbamba nlem, zôsôô a teke évus. Eyoñ a bulaneya yôp, be nji ve nye éto njôan y’éjôé Zambe été été. (Behébreu 10:12, 13) Mbu 1914 nwô Yéhova anga ve Yésus éjôé anga ka’a nye. A taté éyoñ te Yéhova anga télé Yésus njôé y’éjôé jé.—Daniel 7:13, 14.

3. Yéhova anga fiale fe befam a binga be ne benya bebuni si va na be ke yôp. Ba be Yésus b’éjôé, a tyi’i mejô, ave metuna’a ya bôt bese ya si nyô. (Luc 22:28-30; Nlitan 5:9, 10) Yésus anga loene bôt b’évolô jôé nye na “mone nsamba mintômba.” Be ne 144000.—Luc 12:32; Nlitan 14:1-3.

4. Ataté Yésus anga bo Njôô, anga titan Satan a mimbia beéngele bé yôp, ane be nga zu tabe bebé si va. Jamete mimbia mi mam mi nga taté yéné aval éne fe’e ne vema si va mbu 1914. (Nlitan 12:9, 12) Bita, zaé, mbia b’akon, abui ébiasé metiñ—mam mete me ne “ndem” j’aliti na Yésus anga jôé a na nta’ane mam wu ô nto melu m’asu’ulan.—Matthieu 24:3, 7, 8, 12; Luc 21:10, 11; 2 Timothée 3:1-5.

5. Ana’ana, Yésus é tyi’i bôt mejô, a kandé be ane mba’ale biyem a kandé mintômba a bikela. “Mintômba” mi ne bôt b’éliti na b’atabe éjôé jé si. B’ébi ényiñ ya nnôm éto si va. “Bikela” bi ne bôt b’ében tabe éjôé Zambe si. (Matthieu 25:31-34, 46) Ana’ana, Yésus é jiane bôt bese b’afunane bikela. (2 Bethessalonicien 1:6-9) Nge wo kômbô bo “ntômba” Yésus, wo yiane vô’ôlô foé y’éjôé Zambe, a bo mam wo ye’é.—Matthieu 24:14.

6. Den, si éne meyoñ meyoñ. A ayoñ ése ébili éjôé jé. Meyoñ mete me wô’ô wosane meyoñ mevok. Ve éjôé Zambe j’étyendé bijôé bite bise. Ejôé te étam j’éjôé si ése. (Daniel 2:44) Bita, mewôé me bôt, nge bingôngôm bi mam. Bôt bese b’ényiñ nsamba wuwua, mvo’oé été a nlatan.—Michée 4:3, 4.

7. Yésus é jôé tañe mimbu toyini. Nté ôte ôse, benya bebuni b’ébo bezôsôô be bôt, a si ése j’ébo aval ane afup y’Eden. Memane me toyini mimbu, Yésus émane jalé mam mese Zambe anga jô nye na a bo. Eyoñ éte ébulane Zambe éjôé anga ve nye. (1 Becorinthien 15:24) Jé j’akamane wo na ô kate bemvôé bôé a bôt wo nye’e mam éjôé Zambe j’ébo?

[Eve’ela ya afep 13]

Eyoñ Yésus ébo njôé, évini ba ziñ bi man