Ñye’elane 15

Volô’ô bôt bevok na be bo nkômbane Zambe

Amu jé w’ayiane kañete bôt befe mam w’aye’é? (1)

Za ône taté kañete mbamba foé? (2)

Amu jé ntabane wôé ône mfi abui? (2)

Eyoñ évé w’ayiane kañete mbamba foé akônda été? (3)

1. A zu kui éyoñe ji, ô ye’éya mimbamba mi mam ya Kalate Zambe. Nyemane ô te w’ayiane volô wo na ô bo môt a nyiñe avale minye’elane mi Krist mi ajô. (Beéphésien 4:22-24) Nyemane te étam nwô w’aliti zen y’ényiñ ya nnôm éto. (Jean 17:3) Ve bôt befe b’ayiane wô’ô mbamba foé na be fe be bi ényiñ. Benya bekristen bese b’ayiane kañete bôt befe mbamba foé. Ane atiñe Zambe.—Beromain 10:10; 1 Becorinthien 9:16; 1 Timothée 4:16.

2. Mimbamba mi mam w’aye’é, ône taté mie kañete bôt be ne wo bebé. Kañete’e mie bivuvuman biôé, bemvôé bôé, bongô mia be be mi ake sikôlô, bôt mia be be mi asaé vôm wua. Ô bo’o évôvoé nlem a ôjibi éyoñe w’akañete foé éte. (2 Timothée 2:24, 25) Tuka’a ba’ale na bôt b’adañe fombô ntabane wôé alôté mam w’akañete be. Ajôte mbamba ntaban wôé édutu bôt be vô’ôlô mam w’akañete be.—Matthieu 5:16; 1 Pierre 3:1, 2, 16.

3. Melu m’azu, w’éjalé minyiane y’akañete mbamba foé a akônda bengaa be Yéhova ya vôm ô too. Nalé ane beta ndem na wo nnañ nsisim été. (Matthieu 24:14) Ngo’o étua abui mevak nge w’avolô môt mfe na a bo mbo ésaé Yéhova a bi ényiñ ya nnôm éto!—1 Bethessalonicien 2:19, 20.