Aval avé ô ne ye’é mejô me Zambe

Ô ne ye’é mejô me Zambe éyoñ wo lañe Kalate woé. Melu mvus, Zambe a nga top abim bôt éziñ na be tili asimesan dé. Ba loene mintilan mite na Kalate Zambe. Melu ma, bia ye’é mejô mé éyoñ bia lañe Kalate Zambe. Amu Kalate ate a bili nkobô Zambe, ajô te nde ba loene nye na Kalate Zambe. Bi ne bi ndi nlem a mejô mé amu Zambe a ne teke lane minsos. “Zambe ase ngul ya lane minsos.” (Behébreu 6:18) Kalate Zambe a kobô benya mejô.​—Jean 17:17.

Kalate Zambe a ne beta mvean wua a so bia be Zambe. A ne aval ane kalate édiñ ésa a tili bon bé. A kate bia ngaka’a Zambe é ne na a zu kôme si nyô na é bo mbamba vôm ya tabe​—paradis. A kate bia mam a nga bo melu mvus, ma a bo éyoñ ji, a ma aye bo melu ma zu asu bon bé be to nye ndi. A liti fe bia aval avé bi ne bo éyoñ bia tôban minjuk a aval avé bi ne nyiñe mevak été.​—2 Timothée 3:16, 17.

Bengaa be Jehova be ne bemvôé be Zambe; b’aye volô wo na ô wôk jam Kalate Zambe a ye’ele. Tame be Kate na wo kômbô ye’é Mejô me Zambe. B’aye bo wo de zezé, teke sili wo moné. (Matthieu 10:8) Ô ne fe tabe bikôan Bekristen biap. Ba bo bie menda ba loene na Meba y’Éjôé. Nge wo tabe bisulan bite, nyeman mejô me Zambe wôé wo ye yaé avôl.

Ô ne yem za a ne Zambe a zen ya biôm a nga kôm. Bi ne nyoñ éve’an vôm Kalate Zambe a jô na: “Zambe a nga té yôp a si.” (Metata’a 1:1) Éyoñ Zambe a téya “yôp,” ane a nga kôm jôp. Jam avé éve’an te j’aye’ele bia mfa’a Zambe? Eve’an te j’aliti na Zambe a ne ngul abui. Nye étam a mbe kôm jôm éto ngul ane jôp. J’aliti fe na Zambe a ne fek, amu nkôman jôp d’ave ayôñ a éfufup kom ése ô nga sili fek.

Bitétéa bi Jehova bi aliti na a nye’e bia. Tame simesan bibuma bise bi ne si. Jehova a mbe ngule ya kôm ve aval bibuma da​—nge bo te kôm bie. Ve a nga ve bia bibuma meval abui, bi yené’é mis meval meval, bi to mebim mebim, ébuma ése é bili nyul jé a zam jé. Nalé a liti na Jehova a nye’e bia a to fe Zambe a ne akap, mvam a mbamba nlem.​—Besam 104:24.