Jé Mam Mete Mese M’atinan?

YÉSUS KRIST a nga jô na bôt bé yemelan “Memane ya nta’ane mam wu” a bita, zaé bidi, akon, a mimfô’ôsane mi si.—Matthieu 24:1-8; Luc 21:10, 11.

A taté mbu 1914 ényiñ abui bôt é ndamane y’amu betebe ôsu ya mesi a menda me Zambe b’abôndé bita ézezañ mesi a meyoñ me bôt. Melu ma, be fanga b’awôé bôt abui be bien bewo’o fe.

Akôsa bo beyeme mam b’avolô mfa’a ya yô bidi abui, ve angôndô ya mfumbane zaé a bi bôt tañe bemilion mintet. Mbu ôse ya yôp bôt tañe bemilion b’awu amu zaé bidi.

Akon éne ngap jia ya ndem Yésus a nga ve. Eyoñ bita bi ôsu y’émo bi lôteya, ôkone b’aloene na mboman ya panya ô nga wôé bôt tañe bemilion mewôme mebaé a wua. Melu mvus, akon éziñ é nga bi ve bôt ya ngumba vôm a ngumba miaé, ve den, akon é nga mane yiane mesi mese y’émo. Den SIDA a nga mane yiane si se, a akon aval ane ékoé, tit, meze’e, ndim, a ôkone Chaga anga yen d’ake ôsu a yametan meyoñ mene azoé.

Mbu ôse, beyeme mam b’alañ mimfô’ôsane mi si tañe betoyini mewôm. Mfô’ôsane si ôse w’aselane wuvok ngul. Akôsa bo na nyeman ô nto abui, beminsini bap be ne ngul, ve mefoé m’aliti môs ôse na, mimfô’ôsane mi si, mi ngenan mi ake ôsu atyam menda a wôé bôt.

Kalate Zambe a nga jô fe na: “Yeme na, melu y’asu’ulan mbia biyoñ bii bo. Amu na, bôt b’énye’e bebien, ôzañ akum a wumulu bebien, b’ébo mebun, a b’énye’e môman a bo bebiaé bap melo, b’ébo bikalak, te nye’e mam ya mbunan, te nye’e bivuvuman biap, miziziñ, b’abo bibôta, te jôé bebien, ayok, te nye’e mam mene mvaé, b’akoñe bôt, ôjeja’a, be nye’e mam ya mevak alôté ma ya Zambe, be bili éve’ela’a ya mboan mame ya Zambe mfa’a y’atan, ve be kate ya ngule y’été; ô sa’ale’e fe bôt bete.”—2 Timothée 3:1-5.

Nga w’ayene na, bi nga nyiñe “mbia biyoñ bite éyoñ ji”?

Ye w’ayene fo’o na, angôndô y’abui bôt b’anye’e bebien, bene ôzañ akum, a mebun?

Z’ane bo bisô na si nyô éne njalan a bôt b’asimesan ve bebien, bikalak, te nye’e ngbwa, nge mvam?

Ye w’ayene fe na ébiasé bongô be bili zañ bebiaé bap, a njet bi ayéné, sake ve mingumba mi vôm, ve si se?

Ene fo’o totii ya betotii na bi nga nyiñ si éne njalan a bôt b’anye’e mam ya mevak ve te nye’e mam ya Zambe. Nalé ate Kalate Zambe a kate bia, avale mefulu m’édañe yéné “melu m’asu’ulan.”

Y’éne wo ayaé ya yeme na bi nto melu y’asu’ulan? Yésus a nga jô fe na, melu y’asu’ulan, mbamba foé y’éjôé Zambe é taté kateban si se. (Matthieu 24:14) Ye foé éte j’akateban fo’o?

Nsoé kalate b’aloene na Tour de Garde, wo kate ve mbamba foé y’éjôé Yéhova. Nsoé kalate te, be kôñelane ya wô tañe minkobô abui alôté nsoé kalate ôfe.

Mbu ôse Bengaa be Yéhova b’ayi na môt ase awô’ô foé y’éjôé Zambe. Jamete nde mbu ôse, b’akate foé éte tañe mewolo alôté miliard jia.

Bengaa be Yéhova b’atili bekalate b’atimi Kalate Zambe tañe minkobô bebé 400, to’o bôt b’alañe nkobô te bene ôyap nge bebé, to’o bene abui nge tyôtyoé. Bengaa be Yéhova b’akañete, bôt ya mesi mese mbamba foé. B’akate fe foé éte to’o mesi mene tyôtyoé a ma betebe ôsu ya si nyô b’abiasé. Bengaa be Yéhova b’aye’ele fe bôt y’abui mesi benya mejôô.

Eyoñ mbamba foé y’éjôé Zambe ate akatebane si nyô ése, bi nji sôñe ve na foé éte éyametane si se. Bi adañe sôñe na bi ve bôt bese afôla ya liti ésemé be nyô a nga té yôp a si, be liti ésemé te mfa’a ya mba’alan metiñe mé a nye’ean bôt bevok.—Luc 10:25-27; Nlitan 4:11.

Ana’ana, éjôé Zambe j’émane vaa be bo mam abé bese si, na a bo je Paradis.—Luc 23:43.

[Encadré ya afep 6]

Melu y’asu’ulane Jé?

A nji bo asu’ulane y’émo minlañ ése. Bôt bese b’abo nkômbane Zambe, Kalate Zambe ajô na b’étabe si nyô nnôm éto.—Jean 3:16, 36; 1 Jean 2:17.

A nji bo asu’ulan ya si metek. Kalate Zambe ajô na si metek j’étabe nnôm éto.—Besam 37:29; 104:5; Esaie 45:18.

Ve ane asu’ulane ya nta’ane mam wu; w’atindi bôt évô, bingôngôm, ziñ a bôt bese b’atôñe mbia nye’elane wé.—Minkana 2:21, 22.

[Encadré/Fôtô ya afep 7]

Ye Kalate Zambe ane fo’o mejô me Zambe?

Biyoñ te lañ, bekulu mejô ya Kalate Zambe be nga tili na: “Avale di nde Yéhova ajô.” (Esaie 43:14; Jerémie 2:2) Yésus Krist fe, mone Zambe a nga ba’alane na, a ‘nji kobô mam m’aso b’émien.’ (Jean 14:10) Kalate Zambe émien ajô ne sañesañ na: “Ntilan ôse w’aso be Zambe.”—2 Timothée 3:16.

Bôt ya United Bible Societies b’akate na bôt be tili ya bekalate abui, ve be kôñelane ya Kalate Zambe abui minkobô—alôté 2 200. Teke kalate mfe a kabane ya, alôté nye—den alôte tañe bekalate bemiliard benyiñ. Nga w’ayene fo’o na mam mete m’ayiane Kalate Zambe anga tili bôt bese y’émo?

Nge w’akômbô tu’a fas mam m’aliti na Zambe fo’o nnye ane nlô ya kalate ate w’étame lañe kalate bengaa be Yéhova be nga tili b’aleone na La Bible: Parole de Dieu ou des hommes?

Nge w’alañe Kalate Zambe, a yebe na ane fo’o Mejô me Zambe, w’ébu’uban.

[Encadré/Fôtô ya afep 8]

J’éne Éjôé Zambe?

Ejôé Zambe éne ngumba aval Éjôé nya Zambe, Jéhova, nté yôp a si, a nga télé.—Jerémie 10:10, 12.

Kalate Zambe a liti na Yésus Krist ane nyô Zambe a nga ve éjôé. (Nlitan 11:15) Eyoñ a nga too si, Yésus anga liti na Zambe a nga ve nye ngul ése—ngul éte nje é nga volô nye na, a jôé ôkôs a mañ, a saé aval akon ése, a wômôlô fe bôt mesoñ. (Matthieu 9:2-8; Marc 4:37-41; Jean 11:11-44) Minkulane mejô me Zambe mi ajô fe na Zambe éve nye “ntum éjôé a jin a éjôé, na bôt ya mesi mese, minkobô mise b’ésaéne nye.” (Daniel 7:13, 14) Ekôane bôt éte éne jôé na Éjôé ya yôp. Éjôé te étele yôp. Den Yésus Krist a belane je na mam ya si me wulu abeñ.

[Befôtô ya afep 7]

Nkatan mbamba foé si se