Be a jañelé ma’a ya nyiñe Paradis

ÔSUSUA na Zambe a té bôt, a nga taté kôme bitétéa bi se ngule ya yen​—beéngele. Afube ya Éden, éngana’a éngele, nyi a nga su’ulane yôbane na Satan Diable, a nga belan atyeñ asu na a du’u Ève. Ane a nga bo na a di ébuma ya élé jia ya bi Zambe a nga jô be na be bo te di.

Satan a nga bo ane nge nyo nje ja jô bôte na Zambe a nga nyume be mbamba jôm. Éngele a nga jô Ève ba nnôme na be aye ke tu’a wu nge be a di ébuma ya étyi. Satan a nga bôté Zambe ajô na, a laane bone bé minsos. Satan a nga liti mboane Zambe melo aval ane mbamba zene ya tabe fili. Mame mete mese me nga to minsos​—mi mi ôsu mi nga taté laenebane si. Beta jam a bôô si va a ne ajô ya éto njôô Zambe​—nge na, Zambe a bili ngule ya jôé biôme bié bise a nga té mfa’a ya mebu’ubane map.

Ève a nga vô’ôlô minsose mi Satan. Nde a nga taté yene na ébuma éte é nto abeñe ya yen a mis. Mvuse ya valé, nde Ève ba nnôme be nga di. Ane be nga bo bebo mam abé. Mboane ôte ô nga liti ébiasé jaba ne mvômelé. Amu be nga vañe tyame atiñe Zambe, Adam ba Ève be nga tebe Nté biôme bise, nyô a nga ve be ényiñ é ne te bijô, ngame yat.

Zambe a nga ve bebo melo bete fonose j’ayiane be. A nga ve nkulan ajô a lat nzuane ya Mvoñe be nga ka’ale nge na Nyii bôt, nyo a nga yiane zu jaane Satan, nye ate a loenebane fe na nyo. Zambe a nga bo te wôé Adam ba Ève été été. Nalé ate a nga liti mvam asu mvoñe bôt Adam é mbe é ngenane te bialé. Mvoñe bôt éte é nga bi ndi nlem amu Nyô Zambe a nga ka’ale na a ye lôm, nye ate a ye bi ngule ya vaa abé ése nseme ya afup Éden ô nga so de. Bôte be nga ye yemelan ôtete’e ôtetek avale Kalate Zambe a mbe a tiliban, jé Zambe a sôñ a lat a môt a ye lôm ane Nyii bôt, a za nye a ye ke nlôman ôte.

Ane Zambe a nga titane Adam ba Ève e Paradis. Ataté éyoñe te, asu na be nyiñ, be nga yiane saé ngul a mo map. Ane Ève a nga nyoñ abum a biaé Caïn, ntôle mon Adam ba Ève. Mvuse ya été, a nga biaé fe bendôman a bengon; Abel a mbe nsamba ôte ba Seth émvame Noé.

​—Nkañete ôte wo so kalate Metata’a, kabetôlô 3 akekui 5; Nlitan 12:9.