Bia bi Zambe bi a volô nlem a ye’ele bia

KALATE Besam nye a dañe ayabe Kalate Zambe été. A bili abui bia ya ékaña’a. Kalate ate ase a nga tilibane tañe mimbu 1 000. Besam be bili bia y’ékaña’a a édo’o mbunane môt mfe a be tame tili. Besam béziñe be a kobô ajô ya mevak, duma, mveane akéva, mejôban a nkôñelane nlem. É ne fo’o été na bôte be nga tili Besam be nga to amvôé a Zambe. Éyoñe ji, bi tame fase minlô bifia ya kalate bia ate.

Yéhova a ne Njô ya zôsô. A yiane duma a ékaña’a. Bia lañe kalate Besam 83:18 na: “Nde te b’aye yeme na, wo étam, nyô jôé dé e ne Yéhova, O ne Nyô A Dañe Bôte Bese Yôp a jôô si se.” Betili Besam be nga wumulu Yéhova amu biôm a nga té. Be nga lañe nyeme yôp; ényiñe ya si; a nyôle môt (Besam 8, 19, 139, 148). Bevo’o be nga ve Yéhova duma amu a ne Zambe a kamane bôte bese b’afuti ndi nleme be nye. (Besam 18, 97, 138) Ba bevo’o fe be nga ve nye duma amu a ne Zambe ya zôsô, a nyii ba be ne étibela’a été, a fonosô fe mbia be bôt.​—Besam 11, 68, 146.

Yéhova a volô bôte bese be a nye’e nye, a wônô fe minleme miap. Jame da, jia Besam je a dañe wum é ne jia 23. David a wumulu Yéhova été ane mbamba Mba’ale mintômba, a liti mie zen, a kamane mie, a nyoñe tuñ a mie. Besam 65:2 a liti fe bebo bisaé be Zambe na Yéhova a ne “Nyô a wô’ô meye’elan.” Nge ô ne mboane jam éziñ é ne abé, w’ aye bi ngule nlem éyoñe w’ aye lañe Besam 39 a 51, David a liti été ane a jôban a nlem ôse beta abé a nga bo. A liti fe été beta mbunane a nga to a bili be Yéhova. Besam 55:22 a tindi bia na bi ve ndi nleme jangane be Yéhova, a bi suu fe minju’u miangane be nye.

Yéhova a ye tyendé si a zene ya Éjôé Messie. Abui bifuse ya kalate Besam bi a tôébane be Messie, Njô bôt a nga ka’aban. Besam 2 a liti na Njô bôt ate a ye mane jaane mbia be bôte ya meyoñe mese be a tebe nye e ngame yat. Besam 72 a liti na Njô bôt ate a ye bo na zaé, ékotekot, a étibila’a bi mane jañ. Besam 46:9 a jô na Zambe a ye mane bita a zene ya Éjôé Messie, a di’i bewagon bita nduan. Bia lañe Besam 37 na, mbia be bôte b’ aye jañ. Bezôsô be bôte mbe b’aye nyiñe si nnôm éto meva’a été a évôvoé.

​—Nkañete ôte wo so kalate Besam.